سهر قالت بغضب: لا طبعًا ما عجبتنيش.
وهي بتقول كده قرب منها وقال: أغيرهالك في حاجة أحلى.
سهر بعدت بسرعة وقالت: راضي همشي.
راضي اتنهد وقال: يا سلام على راضي من شفايفك، راضي أخيرًا بقى راضي عن اسمه.
وأخذ هدوم ودخل على الحمام.
هي بصت لطيفه بكسوف وقالت: ايه المجنون ده.
بعد شوية خرج من الحمام وهو بيصفر بهدوء، سهر بصتله بضيق وقالت: استحميت وروقت، أنا كمان عايزة أستحمى، ومتقوليش ما تدخلي.
راضي ابتسم وهو بيسرح شعره وقال: عرفت منين إني هقول كده؟
سهر قالت بضيق: راضي بجد هاستحمى ازاي؟ أنا ما عنديش حاجة ألبسها.
راضي قعد واتنهد وقال: خلاص انت ادخلي وأنا هاروح أجيب لك حاجة تلبسيها وأجي.
سهر قالت باستغراب: أيوه هتجيب مين فين يعني؟
راضي قال: هجيب لك من عند نوجا.
سهر ضحكت وقالت: تفتكر هترضى تديني حاجة ألبسها؟ حاسة إنها مش طايقاني خالص.
راضي ضحك وقال: حاسة؟ لسه مجرد إحساس، عندك أمل والله.
سهر اتنهدت بضيق من سخريته، وهو قال: مش هتبقى طايقاكي، أكيد طنط نوجا حاطة عينها عليا، هي فاكرة إنك مراتي يعني بتغير منك.
سهر ضحكت وقالت: آه واضح إن عينها عليك، مع إن أنا شايفة إنها غلطانة، يعني مش انت البني آدم اللي يتخاف عليه قوي كده.
لسه هتمشي شدها عليه وقال بسرعة: الله الله الله، احنا هنخبط ولا ايه؟ ليه مش عاجبك يا بت؟
سهر قالت بدلال: لا مش عاجبني، أنا مش نوجا عشان تعجبني.
راضي بقى يبص لها بإعجاب شديد وقال: طب ايه اللي يعجبك؟ أنا بالنسبالي معجب قوي، عجباني وتعباني، تعباني خالص.
سهر نزلت عينيها بكسوف ودفعته وجريت على الحمام وقالت: هات لي حاجة ألبسها، اتصرف.
راضي حط إيديه في وسطه ومش مصدق إنها هربت من بين إيديه، اتنهد وقال: اتصرف، أنا اللي جبته لنفسي أصلاً، اتحدفتي عليا منين؟ بس الصبر من عندك يا رب.
بعد دقائق دخل ومعاه بيجامة بيتي ليها، خبط على باب الحمام وسهر فتحت وطلعت إيدها عشان تاخد منه اللبس، بس اتصدمت لما دفعها ودخل وقفل الباب وراه.
سهر بقت تبصله بذهول وكانت بالفوطه وقالت: انت مجنون، بره يا حيوان، انت از…
بس قبل ما تكمل حط إيده على بقها وقال وهو بيبص لعيونها بخوف: ثريا ونجيب بره.
سهر اتسعت عينيها بصدمة، هو شال إيده من على بقها بهدوء.
سهر ارتجفت بخوف وقالت بهمس: هترجعني ليهم؟ هتسيبهم ياخدوني؟
راضي بص لعيونها وقال بثقة: متقلقيش مش هسيبك لأي حد، أنا معاكي، خليكي هادية عشان ما يحسوش إننا هنا.
سهر هزت راسها بالموافقة وهي ماسكة فيه بقوة.
وجات ثريا وجوزها وفتحوا باب الأوضة بغضب، وكانت نوجا وراهم وبتقول: انتم مجانين، بقول لكم ما جاش هنا النهاردة، والأوضة دي أصلاً أنا مأجراها لحد تاني، عيب كده، ما تعملوش مشاكل بدل ما أتصل على البوليس.
ثريا بصت لها بغيظ وقالت: ماشي أنا هسمع كلامك يا نوجا، انتي مش بتكدبي علينا، بس لو اتضح إنك مستترة عليه هنا مش هيحصل طيب.
ومشيوا ونوجا نزلت وراهم.
راضي اتنهد بارتياح وبصلها ولسه هيكلمها لقاها بترتجف بشدة وماسكة فيه جامد وحاطة إيدها على بقها وبتتبكي.
راضي بص لعيونها وقال بحزن: اهدي يا سهر، أنا معاكي، مشيوا خلاص، اهدي أنا جنبك.
سهر ما حستش بنفسها واترمت بين إيديه وبقت تبكي جامد، وهو بقى يهديها.
سهر بعدت عنه بكسوف وقالت: أنا آسفة، أنا ما كانش قصدي أعمل كده بس…
قبل ما تكمل قرب منها جامد، سهر اتفاجأت وبقت تضربه بإيديها بس مسبهاش ضربته وبعدت بذهول وقالت بغضب: أنا غلطانة إني امنت لك، واحد وسخ وحقير.
وطلعت من الحمام جري وهي بتبكي.
راضي كان بيتألم من ضربتها وجذب شعره لورا بضيق شديد من نفسه وقال: وبعدين فيك، ما تمسك نفسك، يلا فيه ايه.
وأخذ البيجامة بتاعت نوجا وطلع وراها وقال بحرج: احم، جبت لك دي تلبسيها.
سهر قالت بغضب شديد: وألبس ليه؟ ما انت ماشاء الله شوفت كل حاجة.
راضي ضحك وقال: لا مش كله، اللي تحت الفوطة لسه.
سهر بصتله بغضب وغيظ من وقاحته، وهو ابتسم وقال: متحبيكهاش بقى يا سوسو، ما كانش قصدي والله، والله دخلت عشان أحذرك منهم بس لما لقيتك كده ما قدرتش أمسك نفسي، حطي نفسك مكاني وانتي ملبن كده.
سهر بصتله باستغراب من كلامه وقالت: وأحط نفسي مكانك ازاي؟ أنا عمري ما كنت راجل.
راضي ضحك جامد على كلامها وقرب منها وقال: الحمد لله إنك مش راجل، تبقي راجل ازاي بس، أصلاً الأنوثة اتخلقت عشانك.
سهر نزلت عينها بكسوف وقالت: راضي بجد مش هينفع، لو سمحت حاول يبقى في حدود بيننا أكتر من كده، كده غلط وحرام.
بس قاطعها لما شدها ليه وقال: عارف والله.
سهر اتنهدت بغيظ وقالت: كده عارف؟ لما انت عارف ليه كل شوية تشديني عليك زي المغناطيس؟
راضي بص لعيونها وقال: معجب، معجب قوي.
سهر بصت له بدهشة وقالت بارتباك: أيوه بس احنا ما بقلناش مع بعض يومين.
راضي ابتسم وبص لعيونها وقال: بس أنا معجب بالعيون دي من أول دقيقتين.
سهر حاولت تبتسم وقالت برقة: انت غريب قوي يا راضي، وكلامك غريب.
وكملت بحدة وقالت: ويعني وحتى لو كنت معجب، ما ينفعش تلمسني، ابعد يلا.
وأخذت الهدوم وراحت على الحمام، وهو فضل واقف باصص على طيفها بذهول من قلبتها المفاجأة دي وقال بصوت عالي: على فكره انتي ملبوسة يا بت، بجد عليكي واحدة متابعة رضوى الشربيني، بس أنا هعرف أطلعها، أنا مش سهل على فكره.
سهر ضحكت على كلامه من جوه ومردتش عليه، وابتسمت بخجل شديد وهي بتفتكر قربه منها وكلامه ليها ونظرات عيونه.
راضي كمان كان قاعد على السرير بيفتكر وقت ما كانت في حضنه ومتخبية فيه بشدة، ووقت ما ضربته، ابتسم وحط إيده على قلبه وقال: عجيب قوي أمرك، معقولة شخص ما يكملش معاك يومين يبقى أقرب لك من اللي عشت معاهم عمر؟ ولا بتفهم ودايمًا بتدق في الوقت الغلط وللشخص الغلط.
