راضي ضحك على منظرها، وكان لابس تيشرت نص كم.
سهر بقت ترجع لورا بخوف وهي بتقول: بقول لك ايه، اوعى تعمل زي امبارح، المرة دي هأذيك بجد، خليك مكانك.
بس اتخبطت في الدولاب وراها وقالت بدموع وخوف: والنبي ما تقرب.
راضي ضحك بخفة ولبسها الجاكيت بتاعه، وطلع شعرها من الجاكيت ونزله على ظهرها، وقرب منها وقال بهمس عند ودنها: سهر.
سهر نزلت عيونها بكسوف من كلامه، وهو ابتسم ومد إيده وقال: يلا تعالي معايا هارجعك لأهلك.
سهر بصت لإيده وما ترددتش كتير في إنها تمسكها، ما كانتش عارفة جايبة الثقة دي من فين، لكن كانت مرتاحة جدًا وواثقة فيه.
ولسه هيمشوا، قالت بسرعة: آه صحيح، أنا امبارح كنت ههرب، بس ثريا والراجل اللي معاها كانوا تحت.
راضي اتنهد وقال: تفتكري زمانهم لسه موجودين؟
سهر قالت: مش عارفة والله، معتقدش يقعدوا لحد دلوقتي، يلا نشوف.
ونزلوا سوا بحذر، وكانوا ثريا ونجيب مش موجودين في المدخل، وقفوا عند المدخل وبصوا لقوهم قاعدين في العربية نايمين هما الاتنين.
راضي ابتسم وشاور لها، وطلعوا جري سوا.
بعد شوية كانوا قاعدين على البحر، وراضي قال بضيق: يا بنت الحلال ارحمي اللي خلفوني، يعني أخوكي الضابط ده نلاقيه فين؟
سهر قالت بغضب منه: يعني أعمل لك ايه؟ ما أنا بقول لك مش عارفة، هو في مأمورية بقى له أيام، ويمكن يطول ويمكن يجي، معرفش غير رقمه لأني حفظاه. انت رجعني على البيت وامشي.
راضي قال بضيق من غبائها: طب ما طالما أخوكي مش معاكي، حتى لو رجعتك على البيت هيرجعوا ياخدوك تاني، ده ايه الغباء ده؟
سهر قالت بدموع: وأنا أعمل ايه يعني؟ مش قدامك أهو، بتصل بيه ومش بيرد أصلاً، دي عادته لما يكون في مأمورية مش بيفتح التليفون.
راضي اتنهد وقال بضيق: وانت ما عندكيش أي حد قاعد أوديكي عنده؟
سهر قالت بحزن: احنا ملناش غير بعض.
راضي نفخ بغيظ وقال: ليكي ربنا يا أختي، قومي معايا.
سهر قالت باستغراب: على فين؟ هنروح البيت؟
راضي اتنهد وقال: تعالي معايا وانتي ساكته.
بعد شوية كانوا في منطقة شعبية بسيطة، ونزل بيها من التاكسي وبقى يمشي بيها، وكانوا شباب المنطقة بيبصولها وفيه اللي بيصفّر بمعاكسة.
سهر مسكت في إيد راضي بقوة، وراضي أول ما لاقاها خايفة بص لهم بحدة وقال: ايه، يلا انت وهو، قرطاس لب ماشي معاها، أجيب لكم تقزقزوا؟
نزلوا عيونهم في الأرض وفضلوا ساكتين.
وراضي أخدها ودخلوا لوكاندة صغيرة.
أول ما دخلوا، البنت اللي واقفة في الاستقبال قالت بضيق: ما بدري يا راضي بيه، على أساس إني شغالة هنا 12 ساعة سايبني واقفة ليل ونهار وقاعد تتسرمح، ما حدش حتى عارف طريقك. وبصت لسهر بضيق شديد وقالت: ومين دي كمان؟ هو انت ما تجيش فاضي أبداً.
راضي قال: هاتي مفتاح الأوضة بتاعتي عشان اللي معايا وقع، وأجلي الرغي ده يا نوجا عشان أنا تعبان جدًا.
نوجا بصت له بدهشة وقالت: أيوه يعني مين اللي معاك دي؟
راضي ابتسم باستفزاز وقال: دي مراتي، سلمي على طنط نوجا يا سهر.
نوجا شهقت بشدة وقالت: نعم؟ طنط؟
سهر استغربت إنه قال متجوزين وقالت: أهلاً يا طنط نوجا.
نوجا بصتله بذهول وقالت: ماشي يا راضي، خد مفتاحك أهو، وابقى شوف لك حد يقعد لك في المخروبة دي بقى.
راضي أخذ المفتاح ومشي هو وسهر على الأوضة فوق.
سهر قالت باستغراب: انت مش هتنادي لها؟
راضي ضحك وقال: هي كده كل مرة تقولي شوف لك حد يقعد فيها وبترجع تاني، سيبيها.
وأول ما دخلوا الأوضة، بصت له باستغراب وقالت: انت ليه قلتلهم إني مراتك؟
راضي اتنهد وقال: عشان ما حدش يسأل سين وجيم، من فين وليه.
سهر قالت بضيق: أيوه بس مش هينفع نقعد في أوضة واحدة.
راضي قرب منها وقال وهو بيبصلها جامد: ليه؟ لسه خايفة مني؟
سهر بلعت ريقها بارتباك وقالت: لا لا طبعًا مش خايفة منك، خايفة المرة الجاية أخبطك بحاجة تموت فيها.
راضي ضحك جامد لما فهم إنها بتهدده، ولسه هتمشي شدها عليه بقوة بقت بين إيديه، وبص لعيونها وقال: تعرفي إن عيونك عاملة زي أكلة حراقة بتلهلب بس ما يتشبعش منها، وخدودك عاملة زي تفاحتين.
سهر قالت بارتباك: انت بس شكلك جعان.
سهر بصتله بغضب شديد وقالت: سيبني لو سمحت، انت جايبني هنا عشان كده؟ واطي صحيح، ابعد سيبني أنا همشي.
راضي حاول يوقفها وجري وراها وشدها عليه وقال: انت عجباني قوي، طالعة من عيني كمان، بس ما تقلقيش أنا مش جايبك هنا عشان كده.
وسابها وبقى يختار حاجة يلبسها وهو بيقول: ده مجرد فك كبت يعني.
سهر قعدت على السرير بغضب شديد وقالت: طب خليك كابت في نفسك، وإياك تقرب لي كده تاني.
راضي بصلها بطرف عينه وقال: هي ما عجبتكيش ولا ايه؟
