في أحياء القاهرة، وتحديدًا في منزل إبراهيم الأسيوطي، وفي تمام الساعة الثانية صباحًا بتوقيت القاهرة، تنام فتاة على أرضية المطبخ. وفجأة يسقط فوق وجهها دلو من الماء، لتستيقظ بفزع على إثر ذلك. نظرت أمامها فوجدت امرأة في الأربعين من العمر، زوجة عمها، المدعوة سميرة. الفتاة بخوف ورعب:
— في إيه يا سميرة؟
سميرة:
— اتفضلي قومي قدامي عشان عايزاكي تنظفي البيت ده قبل ما تروحي شغلك.
الفتاة:
— يا طنط احنا قبل الفجر، أعمل إيه دلوقتي؟
سميرة:
— في ناس صحابي جايين عندي بكرة، ولازم البيت يكون زي الفل. هتقومي بالذوق ولا أجيب السنيورة أختك تعمل مكانك؟
الفتاة بسرعة بالغة وخوف شديد:
— لا خلاص، أنا هعمل كل حاجة.
سميرة بنبرة ساخرة:
— قومي يا أختي، وابقي اعملي كام صينية كيك حلوين كده. تعالي هنا بصحيح، فين مرتبك بتاع الشهر ده؟
الفتاة بتلعثم:
— انتي عارفة إني بجهز فلوس العملية بتاعت أختي، وكان لازم أجيب لها علاج، واخدت المرتب وجددت لها العلاج.
سميرة بنبرة غاضبة:
— نعم يا الدلعدي؟ علاج ايه؟ إن شاء الله ما خدت علاج ولا اتعالجت. ضيعتي المرتب في الهواء كده. أعمل فيكي إيه انتي وأختك؟
ثم نظرت إلى القلادة المعلقة، وارتسمت ابتسامة خبيثة على شفتيها، ولكن استوقفها يد الفتاة التي منعتها بقوة.
الفتاة:
— حضرتك عايزة إيه من السلسلة دي؟
سميرة:
— عجباني بصراحة، ومن زمان قوي نفسي فيها، وأظن إنك مش محتاجة حاجة زي دي.
الفتاة:
— أرجوكي، كلوا إلا دي. الحاجة الوحيدة اللي بتقويني على الشغل وبتديني أمل.
سميرة بتفكير:
— خلاص مش عايزاها، بس اعملي حسابك كل شغل البيت يخلص قبل ما تروحي شغلك.
غادرت سميرة وتركت تلك الفتاة تبكي على حالها. مسحت دموعها ونهضت حتى تفعل ما طلبته زوجة عمها.
تعالوا نتعرف الأول مين البنت دي. مرام، تبلغ من العمر خمسة وعشرين عامًا، تخرجت من كلية التجارة، تعمل في شركة الشروق للمعمار. فتاة تبلغ من الجمال ما يكفيها، ليست كغيرها من الفتيات، تعشق عملها، تحمل قلبًا طيبًا وهمومًا أكبر من سنها. الحياة دائمًا لا تعطي كل شيء. لديها أخت واحدة فقط، رهف، فتاة جميلة مشاكسة في الحادي والعشرين من العمر، تدرس في كلية الهندسة، لديها عيب خلقي في القلب منذ طفولتها، مخطوبة منذ سنتها الأولى في الجامعة لزميل لها أكبر منها بعامين، وهو الآن يقضي واجبه الوطني بالجيش المصري في سيناء. أحبها وتقدم لخطبتها. توفي أهلها منذ أكثر من عشرة أعوام، وتعيش حاليًا في منزل عمها إبراهيم الذي توفي منذ عامين، وترك خلفه بنات أخيه تحت رحمة زوجته التي تستغل ضعفهم وحاجتها إلى راتب مرام.
أنهت مرام عملها وهي لا تقدر على الوقوف من قلة نومها، ولكن استمعت إلى صوت هز أوصال قلبها، له صوت تعشقه، إنه صوت أذان الفجر. ذهبت حتى تتوضأ وتصلي فردها، وبعدما انتهت من الصلاة جلست تبكي تناجي الله داعية:
— لا إله إلا أنت سبحانك إني كنت من الظالمين. يا رب ارحمني برحمتك واغفر لي. يا الله اشفي أختي ونجيها ليا. مش عايزة غيرها من الدنيا. طمعانة في رحمتك يا رب.
جلست تناجي الله حتى دقت الساعة السادسة والنصف. نهضت وجهزت الفطار، وذهبت إلى غرفة شقيقتها الصغيرة وفتحت نافذة الغرفة حتى تدخل أشعة الشمس إلى الغرفة.
مرام:
— قومي يا كسلانة، لسه نايمة حضرتك وعندك جامعة؟ أكيد سهرانة مع حبيب القلب سي إسلام. أنا مش فاهمة الواد ده ازاي في الجيش ومعاه ايفون هناك؟ ده أنا بسمع إنه يبقى كتر خيره لو اخد معاه موبيل بكشاف.
كانت تتصنع النوم حتى لا تستمع إلى حديث أختها الذي تخبرها به كل صباح.
مرام:
— أنا عارفة إنك صاحية. هتقومي ولا أكلم طنط ليلى ونلغي الخطوبة اللي هتكون السبب في إنك تفشلي في جامعتك؟
نهضت من فرشها مسرعة حتى وقفت فوق السرير وهتفت بنبرة باكية:
— لا بالله عليكي، كلوا إلا كده. أنا مليش غير إسلام. أبوس إيدك يا مرام.
مرام بقلق وفزع من بكاء أختها:
— في إيه يا رهف؟ مالك يا حبيبتي؟ أنا بهزر معاكي. ليه الدموع دي؟
رهف:
— والله العظيم أنا مكنتش سهرانة مع إسلام، أصلًا هو مكلمنيش من امبارح، وخايفة وهموت من القلق عليه عشان كده سهرانة.
مرام:
— إن شاء الله خير. اطمني مفيش حاجة. وبعدين هو أكيد عنده ظروف، ده في الجيش يعني مش رايح يلعب. وبعدين دي هي كلها سنة اللي اخدها في الجيش. ما بالك بقى لو كان زي الناس اللي بتاخد اتنين وتلاتة؟ احمدي ربنا، كلها شهر واحد ويخلص ويرجع لنا بالسلامة.
في مكتب المدير، كان حسين يجلس مع مرام.
حسين:
— نعم، حضرتك بعت الشركة؟ بس ازاي وليه؟ مفيش حد عارف.
حسين:
— الإجراءات كانت سرية وتمت مع المحامي، وده طلب من المدير الجديد. وبصراحة أنا مش عايز حد يعرف إني فلست خلاص يا مرام.
مرام:
— بس احنا كنا قادرين نرجع الشركة تاني في أقرب وقت.
حسين:
— خلاص يا بنتي، العمر مبقاش فيه قد اللي راح، والمدير الجديد أحسن مني ويستاهل كل خير. هو هيكون هنا على الساعة عشرة، وأنا هبلغ الموظفين بكل التفاصيل. بس كان لازم أفهمك انتي الأول. عايزك تخلصي للشركة دي، أنا كلمت المدير عنك وهو أكد ليا إنه هيخلي باله منك.
مرام والدموع تلمع في عينيها:
— ربنا يسهل. أنا هروح مكتبي بعد إذنك يا حسين.
خرجت من المكتب وتركت لدموعها تصريح النزول. كانت تعتبر مديرها بمثابة والدها، وها هو تركها. ذهبت إلى مكتبها تجهز بعض الملفات الخاصة بالحسابات حتى تعطيها للمدير الجديد.
