حمل على منكبيه فرعاً من الإضاءة، وصعد على سلالم الدرج الخشبي وعيناه لا تبرح نافذتها، ودّ لو تخرج الآن ليحدثها قليلاً قبل ترك هذه الجهة. أما هي فكانت تقف أمام التلفاز تحاول ضبط الصورة، ولكن على ما يبدو أن يتوجب عليها أن تذهب للشرفة. سارت بخطوات هادئة، فتحت بابها، فوجدته يغني لها بخفوت ما أن رآها تطل عليه.
التفتت خلفه خوفاً من والدها الذي لن يمرر الأمر هكذا كعادته، ردت بدهشة وذهول شديدين وهي تقول بخفوت:
* يخرب عقلك بتعمل إيه هنا! دا بابا ممكن يبهدلك، انزل بسرعة.
غمز لها بطرف عينه وقال وهو يعقد الرابطة:
* بعلق لكم زينة رمضان ببلاش، أي خدمة!
رفع بصره لها وقال باسماً:
* يارب رمضان الجاي تبقي في بيتي ونعلقها سوا في شقتنا.
ردت بابتسامة واسعة وهي تتجه نحوه وقالت:
* ومين قالك بقى إني هوافق عليك!
رد بذات النبرة وقال:
* لا ماهو أنا من يوم ما اتولدتِ معروفة البت لابن عمها، وأنت بقيتي على اسمي خلاص، موافقتك دي تحصيل حاصل يابنت عمي.
ردت بنبرة ساخرة وقالت:
* طب انزل بقى أحسن عمك يجي يموتك.
* خايفة عليا؟!
* لا خايفة على بابا.
* عشانك أموت نفسي ولا أ…
ردت بلهفة وهي تقول بعتاب:
* بعد الشر عنك، أخس عليك كدا يا بدران تقول كلام زي دا في ليلة مفترجة زي دي!
* انزل يا بدران، دول بيقولوا القمر تعذر ورمضان لسه مش بكرا، كمل الفرع دا ووقف على كدا بقى.
قالها أحد سكان الحي وهو يلملم الزينة داخل الصندوق الخشبي. نظر لها بدران وقال بابتسامة:
* أما ملهمش حق! تعذر إزاي وهو واقف قصادي أهو في أبهى صوره!
ضربته بخفة في كتفه العريض وقالت:
* لم نفسك، إحنا في أيام مفترجة، لم روحك بدل ما بابا يلمها جنب أبوك الله يرحمه.
* شيرين! أنتِ يا بت يا شيرين بتعملي إيه عندك؟!
قالها والد شيرين وهو يقف داخل الشرفة. تلعثمت وهي تشير بيدها تجاه جهاز الإرسال وقالت:
* دا أنا كنت بظبط الدش يا بابا وووو…
رد والدها وهو ينظر لابن أخيه وقال بنبرة ساخرة:
* وهو أنت طبق الدش؟!
رد بدران بذات النبرة وقال:
* لا، أنا محصل الكهربا.
ثم تابع بجدية:
* بعلق لكم زينة رمضان، هات بقى حقها.
رد عمه بغضب مكتوم:
* أنا مطلبْتُش منكم زينة، وشيلها من هنا، اتفضل يلا.
* أحسن بردو، أنت هتدذلني ولا إيه!
كاد أن يهبط سلالم الدرج، لكن استوقفه عمه قائلاً:
* استنى عندك هنا.
* نعم!
* أنت بتعمل إيه!
رد بدران على سؤاله بسؤال آخر وقال:
* أنت دفعت حق الزينة؟!
* لا.
* طب إحنا بنعلق زينة للي بيدفعوا وبس، معطلكش بقى.
* أومال كنت طالع ليه!
رد بدران بابتسامة مزيفة وقال:
* صعبت عليا، بلكونتك ضلمة، قلت أنورها لك. معجبش، خدت حاجتي وماشي.
رد عمه بجدية مصطنعة وقال:
* طب خلاص ركبها.
* لا، ادفع الأول.
* يا ستير، مبتعملش حاجة لله أبداً!
* ما أنا عملت معجبش، هتدفع ولا أنزل؟!
* عاوز كام؟!
* خمسة وسبعين جنيه.
* كـ كـ كام!! لا شكرا مش عاوز.
* ما كان من الأول، لازم بس الفشخرة الكدابة دي!!
تابع حديثه وهو يهبط سلالم الدرج بحذر وقال:
* ويرجعوا يقولوا بدران لسانه طويل ومبيحترمش عمه، ما هو من اللي بشوفه منه، هو يعني كان ملاك!!
ما أن لمست قدماه الأرض ووضع فرع الأنوار داخل الصندوق، حتى فوجئ بفتاة لم تتجاوز الخامسة والعشرين من عمرها، ترتدي ملابس عملية وتبدو على محياها الجدية التامة. رفع بصره إليها وهو يتساءل بفضول:
* أفندم!
* أنت بدران المر؟!
قالتها بنبرة مقتضبة ونظراتها تتفحص المكان جيداً.
عادت ببصرها له حين قال:
* أومريني!
* أنا ميرفت كريم.
* وماله، مايضرش بردو.
ردت بعدم فهم لكلماته، هزت رأسها علامة الإيجاب وقالت بضيق:
* أنت شكلك مش واخد بالك، مافيش مشكلة هوضح لك أنا؛ أنا ميرفت كريم اللي اشترت شقتك، وحالياً جاية استلم الشقة.
مال برأسه على الجهة اليسرى ثم حك مؤخرة رأسه وقال بنبرة ساخرة:
* معلش مش واخد بالي، أصلي من كتر أملاكي مش فاكر أنهي شقة بالظبط.
تنهدت عميقاً وهي تشير بيدها تجاه شقته وقالت:
* هي دي الشقة اللي أنا اشترتها، والمفروض استلمها منك من يومين بس مكنتش فاضية، فحبيت استلمها دلوقت لو أمكن.
رد بدران بنبرة غاضبة جعلتها ترتعد مكانها:
* تستلمي إيه يا ست هو أنت جرا لعقلك حاجة، دي شقتي اللي محلتيش غيرها!
وتابع بهدوء ظاهري وهو يدفعها بعيداً برفق:
* امشي ياست اتكلي على الله، روحي شوفي أنت رايحة فين، مش ناقصة وجع دماغ على المسا.
—
تأخر الوقت ولم تأتِ، قررت أن ترجل من سيارتها حيث مساعدة عمها التي تطوعت بهذه المهمة. نظرت لأبيها وقالت باسمة:
