عوده بدران المر للكاتبه هدى زايد

حمل على منكبيه فرعًا من الإضاءة، صعد على سلالم الدرج الخشبي وعيناه لا تبرح نافذتها، ود لو تخرج الآن ليحدثها قليلًا قبل ترك هذه الجهة. أما هي كانت تقف أمام التلفاز تحاول ضبط الصورة، ولكن على ما يبدو أن يتوجب عليها أن تذهب للشرفة. سارت بخطوات هادئة، فتحت بابها وجدته يغني لها بخفوت. ما أن رآها تطل عليه، التفتت خلفها خوفًا من والدها الذي لن يمرر الأمر هكذا كعادته. ردت بدهشة وذهول شديدين وهي تقول بخفوت:

يا خراب عقلك، بتعمل إيه هنا! دا بابا ممكن يزعقلك، انزل بسرعة.
غمز لها بطرف عينه وقال وهو يعقد الرابطة:

بعلق لكم زينة رمضان ببلاش، أي خدمة.
رفع بصره لها وقال باسما:

يارب رمضان الجاي تبقي في بيتي ونعلقها سوا في شقتنا.
ردت بابتسامة واسعة وهي تتجه نحوه وقالت:

ومين قالك بقى إني هوافق عليك!
رد بذات النبرة وقال:

لا ماهو أنا من يوم ما اتولدتي معروفة البت لابن عمها، وأنت بقيتي على اسمي خلاص، موافقتك دي تحصيل حاصل يا بنت عمي.
ردت بنبرة ساخرة وقالت:

طب انزل بقى أحسن عمك يجي يزعقلك.
خايفة عليا!
لا خايفة على بابا.
عشانك أنا موت نفسي ولا أن…
ردت بلهفة وهي تقول بعتاب:

بعد الشر عنك، أخس عليك كدا يا بدران، تقول كلام زي دا في ليلة مباركة زي دي!
انزل يا بدران، دول بيقولوا القمر تعذر ورمضان لسه مش بكرا، كمل الفرع دا ووقف على كدا بقى.
قالها أحد سكان الحي وهو يلملم الزينة داخل الصندوق الخشبي. نظر لها بدران وقال بابتسامة:

أما ملهمش حق، تعذر ازاي وهو واقف قصادي أهو في أبهى صوره!
ضربته بخفة في كتفه العريض وقالت:

لم نفسك، احنا في أيام مباركة، لم روحك بدل ما بابا يلمها جنب أبوك الله يرحمه.
شيرين أنت يا بت يا شيرين بتعملي إيه عندك!
قالها والد شيرين وهو يقف داخل الشرفة. تلعثمت وهي تشير بيدها تجاه جهاز الإرسال وقالت:

دا أنا كنت بظبط الدش يا بابا وووو.
رد والدها وهو ينظر لابن أخيه وقال بنبرة ساخرة:

وهو أنت طبق الدش!
رد بدران بذات النبرة وقال:

لا أنا محصل الكهربا.
تابع بجدية:

بعلق لكم زينة رمضان، هات بقى حقها.
رد عمه وقال بغضب مكتوم:

أنا مطلبتش منكم زينة، وشيلها من هنا اتفضل يلا.
أحسن بردو أنت هتذلني ولا إيه.
كاد أن يهبط سلالم الدرج لكن استوقفه عمه قائلًا:

استنى عندك هنا.
نعم!
أنت بتعمل إيه!
رد بدران على سؤاله بسؤال آخر وقال:

أنت دفعت حق الزينة!
لا.
طب احنا بنعلق زينة للي بيدفعوا وبس، معطلكش بقى.
أومال كنت طالع ليه!
رد بدران بابتسامة مزيفة وقال:

صعبت عليا بلكونتك ضالمة، قلت أنورها لك، معجبش، خدت حاجتي وماشي.
رد عمه بجدية مصطنعة وقال:

طب خلاص ركبها.
لا ادفع الأول.
يا ستير مبتعملش حاجة لله أبدا.
ما انا عملت معجبش، هتدفع ولا انزل!
عاوز كام!
خمسة وسبعين جنيه.
ك ك كام!! لا شكرا مش عاوز.
ما كان من الأول لازم، بس الفشخرة الكدابة دي!!
تابع حديثه وهو يهبط سلالم الدرج بحذر وقال:

ويرجعوا يقولوا بدران لسانه طويل ومبيحترمش عمه، ما هو من اللي بشوفه منه هو يعني كان ملاك!!
ما أن لمست قدماه الأرض ووضع فرع الأنوار داخل الصندوق، وجد فتاة لم تتجاوز الخامسة والعشرين من عمرها ترتدي ملابس بسيطة، وخصلات شعرها تتطاير بفعل نسمات الهواء. وقف ينظر إليها وهو يتسائل بفضول:

أفندم!
أنت بدران المر!
قالتها بنبرة مقتضبة ونظراتها تتفصح المكان جيدًا. عادت ببصرها له حين قال:

أؤمريني!
أنا ميرفت كريم.
وماله مايضرش بردو.
ردت بعدم فهم لكلماته، هزت رأسها علامة الإيجاب وقالت بضيق:

أنت شكلك مش واخد بالك، مافيش مشكلة هوضح لك. أنا ميرفت كريم اللي اشترت شقتك، وحاليًا جاية استلم الشقة.
مال برأسه على الجهة اليسرى ثم حك مؤخرة رأسه وقال بنبرة ساخرة:

معلش مش واخد بالي، أصلي من كتر أملاكي مش فاكر انهي شقة بالظبط.
تنهدت بعمق وهي تشير بيدها تجاه شقته وقالت:

هي دي الشقة اللي أنا اشترتها والمفروض استلمها منك من يومين، بس مكنتش فاضية فحبيت استلمها دلوقت لو امكن.
رد بدران بنبرة غاضبة جعلتها ترتعد مكانها وقالت:

تستلمي إيه يا ست! هو أنت جرا لعقلك حاجة؟ دي شقتي اللي محلتيش غيرها.
تابع بهدوء ظاهري وهو يدفع بعيدًا برفق وقال:

امشي يا ست اتكلي على الله، روحي شوفي أنت رايحة فين، مش ناقصة وجع دماغ على المسا.
تأخر الوقت ولم تأتي، قررت أن تترجل من سيارتها حيث مساعدة عمها التي تطوعت بهذه المهمة. نظرت لأبيها وقالت باسمة:

هنزل أنا يا بابا، مش هتأخر متقلقش.
رسم بسمة خفيفة على ثغره المنفرج قليلًا جهة اليسار إثر الأزمة التي تعرض لها في الأوان الأخيرة. سارت بخطواتها البسيطة حتى وصلت لهما. نظرت لها مساعدة عمها وقالت بصدمة:

دا بيقول مبعش الشقة مع إن وصله الفلوس، صدقيني.
نظرت لها وقالت بتوتر:

ازاي الكلام دا! أكيد في حاجة غلط يا ميرفت.
كادت أن ترد عليها لكن صوت رنين هاتفها قاطعها. قامت بالضغط على زر الإجابة، ما أن وجدته رئيسها في العمل:

مستر معتز، دا حصل مشكلة! والأستاذ بدران بيقول انه ماخدتش حاجة، وإيه!! امشي حالا!!
ابتعدت قليلًا وقالت بخفوت:

بس كدا لو المشكلة متحلتش هتبقى تولين في الشارع هي وباباها!! معت… حاضر يا فندم، اللي تشوفه حالا.