الفصل التاني
***********
خبطت في صدره ونزلت في إيده.
بصت له بعينين مليانة تحدي وقالت بصوت يرن في الأوضة زي السيف: “خد! رميت لك شرفك وشرف عيلتك اللي خايف عليه! اطلع قولهم إنك راجل وأديك جيبت البشارة!.. واقف ليه؟ يلا روح وري أهلك شطارتك!”
جبل مسك القماشة المغرقة بدمها، وبص لإيدها اللي بتنزف، وبعدها رفّع عينيه وبص في عينيها. ملامحه اتصلبت، وعينيه لمعت بتركيب غريب بين الغيظ والانبهار من شجاعتها وقسوتها على نفسها..
رواية ليلة في حضن الجبل بقلميييي زهرة الثالوث
الهدوء اللي في الأوضة كان يسبق العاصفة.
أول ما القماشة المغرقة بالدم خبطت في صدر جبل ونزلت في إيده، عينيه اتسعت من الصدمة، وصدره بقى يعلى وينزل بنفس متسارع من كتر الغيظ. كان كفيل في اللحظة دي إنه يقلب الدنيا، بس وقاره وهيبته جم في ثواني وكتموا البركان اللي جواه. بلع غيظه بصعوبة، وعضلات فكه اتصلبت وهو باصص في عينيها بثبات يخوف.
مسك القماشة ولفها في إيده بالراحة، من غير ما ينطق حرف واحد ولا يبين ضعف أو نرفزة. لف ضهره بخطوات تقيلة وواثقة، فتح باب الأوضة وطلع للحظات يسلم الشرف للكبار اللي مستنيين تحت عشان يطفي نار التار.
بعد دقائق، دخل الأوضة تاني والسكوت القاتل لسه معشّش في المكان. قلع شاله وجلبابه بهدوء شديد، ولبس جلابية بيضا خفيفة بتاعت النوم، ورما نفسه على الناحية الثانية من السرير العالي، وإداها ضهره ونام من غير ما يوجه لها ولا كلمة.
ليلة فضلت قاعدة على الكنبة طول الليل، كبرياؤها مانعها حتى إنها تغمض عين، لحد ما الفجر شقشق والشمس طلعت.
مع أول نور، اتنفض جبل من سريره بوقار وقام وقف بطوله الفارع. غسل وشه ونزل قميصه وبنطلونه، وبص لليلة اللي كانت قاعدة زي ما هي ومربطة إيدها الشاش، وقال بصوت جاف ورجولي يقطع الشك: “قومي يا ليلة.. حضري لي الفطور بسرعة، عندي مرار في الأرض ومواعيد مع الرجالة.”
ليلة رفعت رأسها وبصت له بتحدي، وقفت على حيلها وعدلت شالها وقالت بنبرة حادة وكلها كبرياء: “وهـ! ومن متى وأنا خدامة عندك يا جبل بيه؟ روح قول لحريم السرايا تحت يحضروا لك.. أنا مش خدامة حد هُنا!”
في ثواني معدودة، جبل اتعصب وعينيه شاطت نار! خطى خطوات سريعة ووقف قدامها مباشرة، هيبته وطوله غطوا عليها، وزعق فيها بصوت رن في سقف الأوضة وزلزل المكان:
”إنتِ لسانك ده عايز قطعه! إنتِ هُنا مش خدامة، إنتِ مراتي! حرم جبل العزايزي! واجب عليكِ ورغماً عن عينك تحضري فطوري، وتجهزي هدومي، وتشيلين فوق راسك كعادة حريم العيد! لما أقول كلمة تتنفذ من غير كثر حكي، وفاهمة ولا أعرفك مقامك زين؟!”
ليلة في حضن الجبل بقلميييي زهرة الثالوث .
صوت جبل وهو بيزعق كان زي الرعد اللي هز حيطان سرايا العزايزي كلها. عروق رقبته برزت، وعينيه التحموا بالأحمر من كتر الغضب والغيظ اللي كان كاتمه من ليلة إمبارح، البركان اللي حبسه جواه اتفجر كله في ثواني.
قرب منها أكتر لحد ما بقى وشّه في وشّها، أنفاسه الساخنة بتخبط في وشها، وقال بصوت جاف يهز الجبال: “إنتِ فاكرة حالك مين يا بت مهران؟! فاكرة إن الجوازة دي كانت بمزاجك ولا عشان سواد عينيكِ؟! إنتِ هنا عشان التار، عشان رقبة أبوي ورقبة أخوكِ اللي كانوا هيتقطعوا! إنتِ هُنا حرم جبل العزايزي، وكلامي يمشى عليكِ وعلى القبلة، وكلمتي هي السيف اللي يقطع وما يتردش!”
ليلة، رغم الخوف اللي هز جسمها من منظر جبل وهيبته المرعبة، كبرياؤها وعزة نفسها ما سمحوش لها ترجع خطوة لورا. رفعت رأسها بكسرة عين مليانة تحدي، وبصت له بعينين مشتعلة، وقالت بصوت حاد ومستفز: “أنا بت الشيخ مهران، وعمري ما كنت ولا هكون جارية عندك ولا عند عيلتك! عاوز تكسرني يا جبل؟ ابقى اقطع لسانك الأول قبل ما تطاول عليّ، أنا هُنا بغصب عني، والجوازة دي طين على راسي، وأنت أخر راجل في الدنيا دي ممكن أحترمه ولا أطيعه!”
الكلام نزل على جبل زي السوط. كبرياؤه ورجولته وهيبته ككبير عيلة العزايزي اتهزوا في لحظة غضب أعمى. عضلات فكه اتصلبت، وعينيه شاطوا نار، وما حستش ليلة غير بإيده الثقيلة بتترفع في الهواء وسرعة البرق..
”طاخ!”
قلم شديد نزل على خدها، صوته رن في الأوضة العالية كأنه طلقة رصاص.
من قوة القلم، ليلة اتكفت على جنب، وشعرها الأسود انفرط على وشها، وحطت إيدها المرتجفة على خدها اللي بقى بيغلي نار. الصدمة كانت أكبر من الوجع، دموعها نزلوا بسخونة على خدها، بس عينيها فضلت باصة له بذهول وكسرة مش قادرة تستوعبها.
جبل وقف يلهث، صدره بيعلى وينزل، وبص لإيده اللي ضربتها بيها للحظة وكأنه مش مصدق إنه عملها، بس غيظه وهيبته جرفوه. بص لها بنظرة احتقار وغضب ما يترسمش، وجز على سنانه وهو بيقول بصوت واطي ومبحوح بس يرعب:
”عشان تعرفي حجمك زين وتفتكري إنتِ بتكلمي مين.. لسانك ده لو اتطول تاني، هقطعه لك يا ليلة، وساعتها مش هيرحك مني حد.”
لف ضهره بسرعة، وسحب شاله وجلابه من على الكرسي بغشم، وفتح باب الأوضة ورزعه وراه بقوة هزت السرايا كلها، وسابها واقعة على الأرض بين دموعها وكبرياؤها المجروح، وصوت خطواته التقيلة بتبعد في الممر.
ليلة في حضن الجبل بقلميييي زهرة الثالوث
كان جبل قاعد في المربوعة الخارجية وسط كبار البلد ورجالة العيلة. الحسابات والأوراق كانت مفرودة قدامه على الطاولة الخشب العتيقة، والرجالة بتتكلم في أمور الأرض والمحاصيل والتار اللي اتقفل، بس هو ما كانش سامع ولا كلمة من اللي بتتقال.
عينيه كانت باصة للأوراق، بس عقله محبوس فوق.. في الأوضة العالية، عند ليلة.
