حمزة – الحلقة الأولى
في مجلس صلح بين عائلتين، وهما عائلة الصياد وعائلة الأزهري، اجتمع كبار البلاد وأعيانها في محاولة للصلح بينهم وإعادة الأمور إلى هدوئها.
كان حمزة الصياد واقفًا بغضب، وقال:
“إنتوا لو حلفتوا على المية تتجمد، مش هنصدق إنكم ملكمش علاقة باللي حصل لعمي. وأنا وإنتوا والزمن طويل يا عيلة الأزهري. أنا سايبكم دلوقت بس عشان لسه متأكدتش إن ليكم يد في اللي حصل ولا لأ.”
عماد الأزهري، شاب في بداية الثلاثينيات، وكان صديق حمزة المقرب، وقف أمامه وقال:
“حمزة، خلينا نتكلم بالعقل شوية. إحنا إيه مصلحتنا في اللي حصل لعمك؟ قولنا إيه المصلحة اللي ترجع علينا؟”
رد حمزة بسخرية:
“المصلحة يا ولد الأزهري إنكم تتخلصوا منه عشان السوق يفضى ليكم، عشان كان مسيطر على السوق كله.”
عماد باستغراب:
“ده مش مبرر أبدًا للي بتقوله، إنت متسرع في حكمك.”
حمزة بعصبية، وأمسك عماد من ياقة جلبابه:
“احترم نفسك يا ولد الأزهري، بدل ما أخلي الكلام بينا يوصل لطريق مسدود.”
عماد كان لسه هيرد، لكن حمدي الأزهري، والد عماد، صاح:
“عماااد خلاص!”
ثم نظر إلى كل من يجلس في المجلس وقال:
“أنا وولدي هنمشي من القعدة دي، لأننا ما اتقدرناش، وكلكم قاعدين تتفرجوا على اللي حصل وساكتين. أنا جيت وقدرت الناس الكبيرة اللي جات، لكن أنا ما اتقدرتش يا مختار.”
نظر مختار إليه بسخرية، وهو جالس على مقعده بهيبة، وقال:
“ولا عمرك هتتقدر يا حمدي، طول عمرك هتفضل إكدي.”
حمدي بضيق:
“يلا يا عماد.”
عماد مشي وراء والده بكل احترام.
حمزة قال بتريقة:
“أيوه، اسمع كلام بوك أحسن.”
في منزل الصياد
تجمعت جميع السيدات في المنزل، وكل واحدة منهن مشغولة بعملها.
كانت رقية، زوجة حمزة، تجلس بتعب بجانب حماتها، وقالت:
“آه يا بوي، ضهري انقسم نصين. أنا تعبت النهارده.”
نظرت إليها أمل بسخرية وقالت:
“ضهرك إيه يا عيني؟ مالك؟ متكونيش حبلة وإحنا منعرفش!”
نظرت إليها رقية بحزن وقالت:
“في إيه يا مرت عمي؟ لا، مش حبلة، بس مهدودة من صبح ربنا في الدار.”
ردت أمل ببرود:
“إيه يعني؟ ما الحريم كلها إكدي. ولا تكوني بتعملي حاجة غير الحريم؟ ومال لو جايبة الواد، كنتي هتعملي فينا إيه؟”
ثم أضافت:
“أومال مني صح؟ ياما عرفتي إن سعاد بت أمينة جابت ولد ثالث.”
قالت أمل باستهزاء:
“ما شاء الله، ما شاء الله! جلابِة ولاد كيف أمها، أصل ده وراثة يا بتي.”
تجمعت الدموع في عين رقية من كلامها، لكنها حاولت ألا تظهرها.
قامت لتذهب إلى غرفتها، المكان الوحيد الذي تشعر فيه بالراحة، لكن أمل أوقفتها:
“على فين كده يا سنيورة؟”
وقفت رقية وهي تعطيها ظهرها حتى لا ترى دموعها وقالت:
“طالعة أوضتي أرتاح شوية قبل ما حمزة يرجع والبنات ترجع من المدرسة.”
أمل:
“والشغل اللي ورانا؟”
رقية بدموع:
“أنا خلصت كل اللي ورايا.”
أمل:
“ما إحنا لسه هنعمل الأكل عشان جوزك وبويا وإخواتي.”
ردت هاجر بغيظ من والدتها:
“هعمل أنا معاكي يا أمي، خلاص سيبيها تطلع ترتاح شوية قبل ما حمزة والبنات يرجعوا.”
اقتربت مني من هاجر وقالت:
“ماشي يا حنينة إنتِ.”
بعد فض الجلسة
بعد انتهاء مجلس الصلح، لم يبقَ في المكان سوى مختار الصياد وأولاده.
قال مختار بفخر:
“بجد يا ولدي، رجل وسبع من يومك. وقفتك كانت قوية قدام بيت الأزهري.”
رد حمزة:
“تربيتك يا بوي. وصدقني، يوم ما أتأكد إنهم فعلًا ليهم علاقة باللي حصل لعمي، مش هسيب حقه يضيع.”
ثم أضاف بحزن:
“إنت عارف عمي كان غالي عليّ إزاي، كنت بعتبره كيفك إكدي.”
قال مختار:
“الله يرحمه يا ولدي.”
ثم نظر إليه معتز وقال:
“إيه يا بوي؟ ولا إني قاعد ماليش في الحديث الحلو ده ولا إيه؟”
ابتسم مختار وقال:
“كلكم ليكم في قلبي كل شيء حلو يا ولدي، وإنتوا خابرين إكدي زين. إنتوا اللي ليا في الدنيا.”
ساد الصمت للحظات، وكل واحد منهم يحمل في قلبه الكثير من الأسرار والأسئلة التي لم تجد لها إجابة بعد.
