ابو الرجاله

الفصل الأول

الفراشة شيماء سعيد

أبو الرجالة

بمنزل راقي به لمحة من التراث رغم بساطته، بعروس البحر المتوسط، مكون من طابقين: الأول به محلات، والثاني خاص بصاحبة المنزل به شقة كبيرة مكونة من خمس غرف ومطبخ كبير ومرحاض بحجم غرفة.

على أغنية أم كلثوم “أنت خلتني أعيش الحب وإياك ألف حب” بدأت السيدة ثريا إعداد وجبة الإفطار في السادسة صباحًا قبل موعد ذهابها للمدرسة. وضعت الطعام على المائدة وأردفت بنبرة مرتفعة بعض الشيء:

— عطر، يلا أدخلي صحي الهانم، عايزين نفطر.

خرجت عطر من المرحاض وهي تربط رأسها بقطعة سميكة من القماش قائلة:

— البرد تقيل عليا أوي ومش قادرة أفرهد نفسي مع الست هادية.

رفعت ثريا حاجبها ساخرة من أصغر بناتها بارعة عطر بتمثيل المرض حتى تهرب به من مصائبها، رفعت سكينة الطعام الصغيرة مشيرة للأخرى بالاقتراب قائلة:

— والبرد ده جالك فجأة كدة؟ ولا عشان باقي على فرحك أسبوع!

بلعت عطر ريقها بتوتر من نظرات والدتها الثاقبة، وفرت من أمها بسرعة البرق وهي تزيح عن رأسها قطعة القماش مردفة:

— خمس دقايق وهنكون عندك يا ماما، أنا ورايا كلية ولازم أفطر.

أجابتها ثريا بقوة وهي تجلس على أحد مقاعد السفرة مردفة:

— طلعي من دماغك ابن أبو الدهب يا بنت بطني وارضي بنصيبك.

أغلقت عطر الباب خلفها بقوة. تبقى أسبوع واحد فقط على تنفيذ حكم الإعدام الذي حكمت به والدتها. رأت هادية مثل عادتها تقف أمام المرايا تتأمل بجمالها الساحر وتغازل نفسها بكل ما لذ وطاب. جزت عطر على أسنانها مردفة بغيظ:

— أنت مالك باردة ومستفزة كده ليه؟ مش الأولى تقفي جانبي وتوقفي المهزلة اللي ماما عايزة تعملها دي؟

تركت هادية الروج من بين أصابعها ودارت بوجهها لشقيقتها الصغرى مخرجة تنهيدة طويلة من أعماق صدرها قبل أن تقول:

— هو أنت خليتي قدام ماما حلول تانية بعد عمايلك السودة؟ نوح أبو الدهب الكل عارف إنه مطلق مرتين، ده غير إن أخوه مطلق أختك، وأكبر منك، وفوق كل ده جنابك مقفوشة من أمك. احمدي ربنا إنها جات على قد جوازك من حسن، وإلا كانت ماما غسلت إيديها.

شهقت عطر مردفة:

— عار إيه يا متخلفة أنت؟ إحنا كنا بنتكلم مع بعض عادي، وبعدين أنا بحبه ومتأكدة من حبه ليا. اتقدم لأمك بدل المرة عشرة ومفيش فايدة.

ردت عليها هادية ساخرة:

— مش كفاية اللي حصل في فيروز؟ هتبقى أنت كمان متعلم عليكي من عيال أبو الدهب؟ كدة كتير. أنا رايحة أفطر.

تركتها بمفردها وخرجت. تلقى عطر بنفسها على الفراش بقلة حيلة. ظلت صامتة لعدة ثوانٍ قبل أن تسمع باب الشقة يفتح وتدلف فيروز بعد نهاية عملها، فهي كانت تعمل بالمساء بأحد المشافي الخاصة.

دلفت إليها فيروز مردفة بابتسامة حنونة:

— الصغنن قاعد حزين لوحده ومش بيفطر ليه!

— ماليش نفس. مفيش حد في البيت ده كله حاسس بيا. حرام عليكم أنا مش عايزة أتجوز غير نوح.

جلست فيروز بجوارها على الفراش وحركت يدها على ظهر الأخرى بحنان قائلة:

— أنت لسة صغيرة ومش فاهمة الدنيا يا عطر، بس نصيحة مني ارضي بنصيبك. لو نوح ده بيحبك بجد زي ما بتقولي ومش بيلعب بيكي، هيعمل المستحيل عشان تبقي على إسمه.

رفعت عطر عينيها لها بالكثير من الأمل مردفة:

— تفتكري يا فيروز!

— أيوة طبعًا. يلا نفطر بقى قبل ما ماما تقيم علينا الحد، وربنا هيحلها من عنده.

— يلا.

شيماء سعيد

على بعد مسافة صغيرة من منزل أم البنات نجد عمارة أخرى، ولكنها أكثر فخامة من الطراز الحديث، بمساحة أربع شقق ملفتة للأنظار بشكل غريب، وأسفلها أكبر سلسلة محلات ذهب بمحافظة الإسكندرية.

بداخل المحل الرئيسي رفع نوح أبو الدهب ساقيه على سطح مكتبه ثم وضع ساق على الآخر، وهو يسمع لأحد رجاله الذي يقول:

— كله زي ما أمرت يا باشا.

رسمت على ملامحه الوسيمة ابتسامة واثقة وهو يسأله بنبرة صوته الخشنة:

— وعريس الغفلة أخباره إيه!

رد عليه مرتضى بقوة:

— لما نخلص اللي حضرتك عايزه هيتحاسب يا باشا.

أومأ إليه نوح برضا تام، وقبل أن يرد عليه دلف كمال للمحل بهيبته ووقاره، من يراه يستحيل أن يعطي له عمره أبدًا. أشار نوح لمرتضى بالانصراف ليختفي بنفس اللحظة، قام من مكانه باحترام لوالده ليجلس محله مردفًا:

— ناوي على إيه يا ابن كمال؟ أنا مش مرتاح لك.

ابتسم نوح ابتسامة هادئة قبل أن يقول:

— المثل بيقول ابن الوز عوام، وأنا بصراحة يا وز مش ناوي أسيب حاجة نفسي فيها لحد مين ما كان.

ضحك كمال ضحكة رنانة مردفًا بفخر:

— صح يا واد، طول عمري بقول عليك ابن أبوك. بس عايزك تلعبها صح وعلى الهادي.

غمز إليه نوح وهو يتجه لمحل آخر قائلًا بذات المغزى:

— متخافش يا كبير، أنا عامل حساب اللي ليك كويس أوي. هاخد اللي يخصني من غير أضرار.

حرك كمال رأسه بمعنى لا فائدة، ثم أخذ نفس عميق وأخرج هاتفه من جاكيته وقام بإرسال رسالة صغيرة عبر تطبيق الواتساب:

“عايزك بالليل الساعة 11 تكوني في الشقة.”

شيماء سعيد

بمنطقة المعادي بشقة من الطراز الحديث استيقظ خاطر أبو الدهب، الابن الأصغر والنسخة الحقيقية من والده. تلك العائلة يمكن أن نطلق عليها لقب أسوأ عائلة على وجه الأرض. نظر أمامه بضجر وهو يزيح كف زوجته بعيدًا عنه مردفًا:

— جرى إيه يا نوسة؟ أنا بدأت أفصل منك. قولتلك تخفي من وشي لحد ما أصحى بمزاجي.

رفعت له حاجبها وهي تعود خطوة للخلف مبتعدة عن الفراش مردفة:

— وأنا عملت إيه بس يا سي خاطر؟ ده نوح باشا برة.

انتفض خاطر من فوق الفراش بالقليل من التوتر قائلًا:

— أطلعي أعملي لنا فطار، وبعدها إياكي تخرجي من الأوضة فاهمة؟

أومأت إليه بابتسامة واسعة وخرجت. بعد دقيقة دلف لغرفة الصالون ليجد نوح ينام على الأريكة بكل أريحية وكأنه بمنزله. جلس خاطر على المقعد المقابل إليه ثم قال بسخرية:

— معلش لو هقلق منامك يا باشا، بس أنت هنا بتعمل إيه!

تكاسل نوح عدة مرات ثم اعتدل بجلسته ورد على أخيه ببرود:

— قول للبنت دي تشوف لها مكان تاني تقعد فيه الفترة الجاية، الشقة تلزمني.

رفع حاجبه بسخرية وسأله:

— من امتى ليك في الجواز ده؟ أنا ياما قولتلك تفرفش عن نفسك شوية بعد ما طلقت.

رفع نوح رأسه بكبرياء وهو يضع ساقًا على الآخر قائلًا ببساطة:

— لأ، اطمن يا حبيب أخوك.

انتفض خاطر بفزع، من المحتمل إن يكون ينقصهم هم ووالدهم الكثير والكثير من التربية والأخلاق، ولكن لكل شيء خطوط حمراء. تحدث بأعين غير مصدقة:

— لأ عندك يا نوح، كله إلا الحرام. مالناش فيه. عايز واحدة أتجوزها، غير كدة لأ يا ابن الحاج كمال.

رد عليه نوح ساخرًا:

— يعني كدة هيبقى حلال؟ وبعدين حاج إيه ده! يمكن احنا غلط، بس غلط عن غلط يفرق.