رواية رنا وعبدالله
تبدأ الحكاية في أحد أحياء القاهرة الراقية، وبمنزل المهندس أحمد حسين.
حنان: رنا يا حبيبتي، علشان خاطري فكري يا بنتي. أنا وأبوكي مش دايمين لك في الدنيا، وانتي لسه صغيرة ملحقتيش تتهني، ولازم يبقى ليكي سند في الدنيا. حتى بنتك، مهما حاولتي تديها الحب والحنان، صدقيني هيجي يوم وتحتاج لأب يحتويها ويحميها. وعيلة المرحوم ولاد أصول، واحنا عمرنا ما شوفنا منهم إلا كل خير. وانتي يا حبيبتي كنتي قاعدة وسطهم، وأنا شايفة إن عرض أخو المرحوم إنه يتجوزك عرض مناسب جدًا لظروفك، ومحدش هيحب بنتك أكتر منه، دي لحمه ودمه وبنت أخوه الوحيد، يعني هيحطها في عينه.
رنا: يا ماما، حرام عليكوا. ما أقدرش أتخيل نفسي زوجة لراجل تاني غير عمر، وبالذات الشخص ده. مستحيل أتجوزه، دا شخص مغرور ومتكبر وأنا مش بطيقه. وما تنسيش إنه أخو الغالي عمر، مستحيل ياخد مكانه، لا عندي ولا عند بنتي.
حنان: يا حبيبتي، انتي عارفة إني لا أنا ولا بابا هنقدر نغصبك على حاجة انتي مش عاوزاها. بس أنا عايزاكي تفكري في مصير بنتك. هما رافضين إن بنتهم تتربي بعيد عنهم، دي عاداتهم وتقاليدهم، وممكن يحاولوا ياخدوها منك. ويقدروا يعملوا كده، هما عارفين إنك لسه صغيرة، وأكيد موضوع إنك ممكن يجي يوم وتتجوزي بيفكروا فيه، وحقهم يفكروا في مصير بنت ابنهم.
رنا: أنا مستحيل أتجوز بعد عمر، وأنا هوعدهم بده. أنا عايزة أربي بنتي وبس.
حنان: ايه بس اللي انتي بتقوليه ده؟ ما توجعيش قلبي عليكي يا رنا. الحياة مش بتقف، مستمرة، وانتي لسه صغيرة يا حبيبتي ومحتاجة سند ليكي انتي وبنتك في الدنيا. ولو مش بتفكري دلوقتي والحزن على المرحوم عميكي، هيجي يوم وتحتاجي لزوج يحميكي ويضلل عليكي انتي وبنتك، وتكوني معاه أسرة جديدة.
رنا ما قدرتش تمسك دموعها أكتر من كده، وقالت بصوت موجوع: يا ماما، ما أقدرش أتخيل حياتي مع حد غير عمر. عمر مكنش جوزي وبس، عمر كان حياتي كلها، حبي الأول وأول راجل في حياتي. لما راح مني حسيت إن حياتي كلها راحت معاه. ما أقدرش أتصور إني أكون مع حد غيره. فهميني يا أمي، ما أقدرش، ما أقدرش.
وهي قلبها موجوع عليها، وفضلت تمسح على شعرها بحنان وقالت: كفايه يا روح ماما، ما تعمليش في نفسك كده. والله حاسة بيكي وفاهمة مشاعرك. بس انتي قولتيها، كان وراح. خلاص يا بنتي. وأنا وبابا لو بنتكلم في الموضوع دا أو بنحاول نناقشك فيه، فدا علشان تفكري كويس يا حبيبتي. ما تستعجليش في قرارك، وانتي عارفة إننا في الأول والآخر مش عايزين إلا اللي يريحك ويرضيكي، وربنا يعمل اللي فيه الخير.
رنا قامت من جنب مامتها ومسحت دموعها، وبتنهيدة طالعة من القلب: حاضر يا ماما، أوعدكم إني هفكر تاني كويس.
حنان: ربنا يهديكي للصالح يا بنتي. بس وانتي بتفكري، حطي في بالك إنك مش بتقرري مصيرك لوحدك، دا مصيرك ومصير بنتك معاكي.
رنا بنت في الجمال والأنوثة، ملامحها رقيقة جدًا زي طباعها، تجذب أي حد ليها من أول طلة، وأجمل ما فيها عيونها. عندها 25 سنة، ومتخرجة من فنون جميلة، وبتعشق الرسم جدًا. وهسيبكم تكتشفوا صفاتها أكتر من الأحداث.
بنتها لين عمرها 4 سنوات، سبحان من خلقها جميلة، وتشبه مامتها بكل ملامحها.
أحمد والد رنا، مهندس بيعمل بشركة بترول، معندوش في حياته أهم من بيته وأولاده رنا ورامز.
حنان والدة رنا، ربة منزل حنونة جدًا، أولادها وزوجها كل حياتها.
رامز أخو رنا الوحيد وتوأمها، بيعمل محاسب في بنك، وكان صديق عمر زوجها.
وتعالوا بينا نرجع تاني للأحداث.
قامت حنان وسابت رنا في حيرة من أمرها، ودخلت لاقت زوجها مستنيها.
أحمد: ها، طمنيني يا حنان. عرفتي تقنعيها؟
حنان بتنهيدة: والله ما عارفة أقولك ايه يا أحمد. أنا قلبي موجوع عليها قوي، ومش قادرة ألومها على حيرتها.
أحمد: لا حول ولا قوة إلا بالله. صدقيني يا حنان، أنا لو شاكك إن عيلة عمر الله يرحمه أو أخوه عبدالله مش هيصونوا رنا وبنتها، كنت أول واحد رفضت الموضوع نهائي، حتى لو كان هيحصل ايه. بس الناس ما شوفناش منهم إلا كل خير، وانتي بنفسك شوفتي تعاملهم مع رنا وبيحبوها ازاي.
حنان: والله عارفة إنهم ولاد أصول. رنا عمرها ما اشتكت منهم، بس بنتك رافضة فكرة الجواز نفسها، عايزة تعيش على ذكرى المرحوم وتربي بنتها. أنا نفسي مستحيل أوافق على كده، أنا نفسي أكون مطمنة عليها.
أحمد: الحاج عز الدين والد المرحوم وعبدالله، كل يوم بيكلموني وبيكلموا رامز علشان يعرفوا ردها. متتصوريش الراجل بيتحايل عليه ازاي، ووعدني إن رنا تكون بعيونه هو وعبدالله. وبيني وبينك، حسيت إنهم مصرين إن البنت تتربي وسطهم. انتي عارفة عاداتهم في الصعيد، حاسينها عيبة في حقهم إن بنتهم تتربي بعيد عنهم.
حنان: حقهم يا أحمد يطمنوا على مصير البنت. بس قولي، مش عبدالله دا متجوز بنت عمه وعنده منها بنت؟ أنا قلقانة برضو من الموضوع ده.
أحمد: بصي، أنا قعدت معاه أكتر من مرة الفترة اللي فاتت. الصراحة بني آدم محترم جدًا، ما يتخيرش عن أخوه الله يرحمه. ومن هيبته وشخصيته واضح جدًا إنه راجل يعتمد عليه. واللي فهمته منه إنه منفصل عن زوجته من قبل وفاة عمر، بس ما وضحش الأسباب. وبعدين ياريت بس بنتك توافق على المبدأ، وأنا أطلب منه يقعد معاها، ولو فيه أي حاجة عايزة تسأل أو تتأكد منها هيبقى من حقها، ولا ايه؟
حنان: عندك حق، ربنا يعمل اللي فيه الخير.
رامز: بطل إحراج يا بنى وتعالى ادخل، مش هتعرف تسافر في الجو دا. استنى معايا نشرب حاجة دافية عقبال ما المطر يهدى، وما تخافش أنا اللي هقوم أطردك ههههههه.
عمر: الوقت مش مناسب، ويمكن والدك ووالدتك يضايقوا من وجودي.
رامز: لا ما تخافش، احنا برضو كرمه زيكوا في الصعيد. ادخل خد واجبك بقى، مش بتقولوا كده عندكم؟
عمر: بالظبط يا لمض.
ودخلوا الغرفة وسابوا رامز وخرج يبلغ والداته ويطلب منها تجهزلهم حاجة يشربوها تدفيهم.
عمر اتجمد مكانه ومكنش عارف يتحرك، أما رنا فكملت بدلع: يلا بقى لو كنت نسيت هقتلك.
صوتها ودلعها أسروا قلب عمر، وفهم إنها أخته، وكان نفسه يلف ويشوف شكل صاحبة الصوت الناعم اللي أسرت قلبه، بس مش عارف يعمل ايه علشان ما يحرجهاش، وخاف رامز يرجع فجأة ويبقى موقف بايخ. وبصوت هادي قال: أنا مش رامز. ولف بكل هدوء.
أول ما حس بيها اتنفضت وبعدت. رنا أول ما سمعت صوته شالت إيديها وبعدت عنه واتجمدت مكانها وهي مش مستوعبة ومكسوفة جدًا.
