عمر أول ما شافها مقدرش ينزل عينه من عليها، اتسحر من جمالها ورقتها.
رنا بارتباك: آسفة، أنا أنا…
لاحظ عمر توترها وصدمتها من اللي حصل، حاول يهديها وقال: فاهم، محصلش حاجة، روحي قبل ما رامز يجي.
رنا اتمنت الأرض تتشق وتبلعها من الموقف، وجريت بسرعة على أوضتها وقفلت الباب، وهي ما صدقت تلم نفسها. وفضلت تضحك وتقول لنفسها بصوت طفولي: ايه الهبل والغباء اللي أنا فيه دا؟ مش قادرة أفرق بين أخويا وصاحبه. يانهار، هيقول عني ايه دلوقتي؟ بس ماله كان بيبصلي كده ليه؟ بتسألي يا هبلة، ما انتي…
لاقت الباب بيخبط، اتخدت من الخضة وبصوت واطي جدًا: أيوا.
حنان: أنا ماما يا رنا. خلي بالك أخوكي عنده زميله، اوعى تخرجي من الأوضة.
رنا: بعد ايه يا ماما؟ دا أنا طينت الدنيا.
حنان: بتقولي حاجة يا رنا؟
رنا: ها، لا يا ماما، بقولك حاضر.
فاقت رنا من ذكرياتها على صوت لين وهي بتقول: ماما، لين كحانه عايزه مام.
رنا: عيوني يا قلب ماما. بس نوضب نفسنا الأول ونغير هدومنا علشان نبقي حلوين ونطلع ناكل عالطول.
رنا كانت سرحانة وهي بتسرح شعر لين في قرارها المصيري، وما سمعتش صوت والداتها وهي بتندها.
لين: ماما، تيته.. ماما.
حنان: أنا حضرت يا حبيبتي. هاتي لين هكملها تسريح، وروحي انتي اغسلي وشك كده وحصلينا. بابا ورامز مستنينك، قالوا مش هيتغدوا من غيرك.
رنا: حاضر يا ماما.
رامز: النهارده كان أول يوم في تقفيل السنة، وبالعافية عرفت أروح. طلعوا عنينا النهارده في البنك.
أحمد: ربنا يوفقك ويقويك يا ابني. المهم مستريح في البنك؟
رامز: جدًا، الحمد لله.
حنان كانت خارجة بلين، جري عليها رامز.
أحمد: رنا عاملة ايه دلوقت؟
حنان: لسه زي ما هي، سرحانة وحالتها حالة.
رامز لاحظ إنه فيه حاجة: هو انتوا فاتحتوا رنا تاني ورفضت ولا ايه؟
رنا: لا يا رامز، أنا موافقة بس بشرط.
الكل اتصدم من رد رنا المفاجئ.
وعلى قد ما أحمد باله ارتاح بردها، بس كان خايف لتكون اتسرعت وبعد ما يرد على عبدالله ووالده تغير رأيها. وقال: وايه شرطك يا بنتى؟
رنا: مش عايزة فرح، ولا هلبس فستان، ولا عايزة أشوفه إلا يوم ما يجي ياخدني بعد كتب الكتاب.
أحمد: رنا يا بنتى، انتي متأكدة من قرارك؟ ولا أسيبك تفكري تاني علشان لو حسيتي إنك استعجلتي؟
رنا: لا يا بابا، أنا متأكدة. أنا اخترت أكون مع بنتى مكان ما تكون.
أحمد: ربنا يوفقك يا بنتى ويكتبلك اللي فيه الخير.
قعدت معاهم على السفرة يتغدوا، وهي راحت في عالم تاني خالص.
حنان: رنوشة، ممكن تسيبي اللي في إيدك؟ عايزاكي شويه.
رنا: مامتي حبيبتي، دي رسمة مهمة جدًا لازم أخلصها علشان هسلمها بكره. ساعتين بس وهبقي معاكي.
حنان: لا، هكلمك في موضوع وارجعي لرسمك عالطول. يلا يا بنت.
رنا: دا شكله موضوع مهم بقى. اوكي، اديني سيبت اللي في إيدي وكلي آذان صاغية. فيه ايه بقى يا ماما؟ احكي.
حنان: مفيش يا عيون ماما. بنتى كبرت وعلى وش جواز، والخطاب ابتدوا يدقوا الباب.
رنا: خطاب ويدقوا الباب؟ يا ليله هباب ههههههه.
حنان: بنت اتلمي، بتكلم جد. جالك عريس وكلم أبوكي.
رنا: ودا مين؟ أنا أعرفه؟
حنان: لا ما أعتقدش إنك شوفتيه. صاحب رامز.
رنا أول ما قالت صاحب رامز، جه في بالها الشخص اللي شافته في أوضته، واتبسطت جدًا واهتمت، وأصرت إنها تعرف ايه الحكاية ومين الشخص دا.
رامز دخل وأكد لها الموضوع وقال: عمر شخص محترم جدًا وابن ناس ومجتهد، بس فيه مشكلة، ومعرفش هيكون رايك ايه فيها. بابا قالى لازم أقولك قبل ما تشوفيه ويقعد معاكى.
رنا باهتمام: مشكلة؟ ايه هي؟
رامز: عمر مش عايش في القاهرة، عايش في الصعيد. وانتي لو وافقتى وفيه نصيب، هتروحي تعيشي معاه هناك.
حنان: ايه؟! انت ازاي انت وابوك ما تقولوليش موضوع الصعيد دا؟ أنا مش موافقة، بنتى ما تبعدش عنى.
رامز: يا ماما، هو دا سبب ما توفقتيش علشانه؟ ماهو كان ممكن يتقدملها واحد وياخدها ويسافر بره مصر، كنتى هتعترضى؟ دا نصيب. وهي برضو تقعد معاه وتشوف يمكن يتفقوا وتوافق.
حنان: لا يمكن، بنتى ما تقدرش تبعد عنى. مش كده يا رنا؟
رنا كانت سرحانة في كلامهم، وكل الشعور اللي مسيطر عليها فضول إنها تعرف شخصيته أكتر، لأنها رغم إنها ما شافتوش إلا لحظات وفي موقف صعب، بس قدر يسيب جواها انطباع لطيف عنه. وأخيرًا نطقت وحسمت الموقف: أنا موافقة أقعد معاه، وبعدين أقرر وأقول رايي.
حنان: كده يا رنا؟ يعني انتي ممكن توافقي وتسيبنى وتبعدى عنى؟
حنان طبطبت عليها وهي بتقول: ربنا يكتبلك الخير يا حبيبتى.
عمر شخص طيب جدًا وأخلاقه طويلة، بس نحيف، قمحي يميل للسمار، وسيم، وبيميزه شعره الطويل الناعم الكثيف وعيونه الواسعين. صديق رامز الروح بالروح من أول ما نزل من الصعيد يدرس التجارة بجامعة القاهرة، وأول ما تعرفوا على بعض نشأت بينهم صداقة وطيدة جدًا. وبرضو هنتعرف على شخصيته أكتر من الأحداث الجاية.
فاقت رنا من شرودها على صوت والدها وهو بيكلم أبو عمر وبيتفق معاه على كل شىء. قامت ودخلت أوضتها ومسكت اللاب توب بتاعها وفتحته، وفضلت تتفرج على صورها وذكرياتها مع عمر، ومع أول صورة دموعها نزلت، ورجعت لعالمها اللي عشقت كل لحظة فيه مع حبيبها عمر.
