
حنان: رنا، خلصتى؟
رنا: آه يا ماما، ايه رايك؟
حنان: بسم الله ما شاء الله عليكي، بدر منور. يلا يا روحي، بابا ورامز مستنين معاه وطلبوكي تدخلي.
رنا كانت حاسة بتوتر، وكانت مكسوفة، دي أول مرة تشوفه بعد الموقف المحرج، وحست إنه أول ما تشوفه هيبان عليها الإحراج. وسمت الله ودخلت وهي منزلة راسها من الخجل، وقعدت جنب والدها.
وفضلوا يتكلموا شويه، أحمد ورامز وعمر، ورنا ساكته خالص ومكسوفة تبص له. وفجأة قام والدها ورامز وسابوهم، ساعتها كان نفسها تنطق وتقول لأخوها رامز يخليه معاها، بس مقدرتش من الإحراج. أول ما خرجوا بدأ عمر الكلام وقال: ازيك يا رنا؟
رنا بارتباك: الحمد لله.
لاقته اتحرك، فبعفوية قامت وقفت.
عمر: جنبك علشان أسمع صوتك. بس ممكن أرجع مكانى تانى لو ضايقتك؟
رنا وهي بتداري إحراجها: أبدًا، أنا كنت هجيب ميه عطشانه.
عمر وهو بيضحك: الميه أهيه، عايز تشربي؟
رنا بزعل: لا خلاص مش عايزه.
عمر: طيب ومكشره ليه؟
رنا: انت بتضحك ليه؟
عمر: علشان مبسوط إني معاكى.
رنا ابتسمت وحست إنه لطيف جدًا فعلًا.
عمر: انتى بتدرسي ايه يا رنا؟
رنا: فنون جميله في سنه ثالثه.
عمر: فنانه يعنى.
رنا: بعشق الرسم، بس على قدى يعنى.
عمر: أنا متأكد إن رسمك يجنن من قبل ما أشوفه.
رنا: ميرسي لزوقك و…
عمر: و ايه؟
رنا: اسمح لي، حبيت أعتذر تانى عن أول مره اتقابلنا.
عمر: دا كان أجمل يوم في حياتى، تعتذرى عنه؟ أكيد مش هسمحلك.
رنا اتحرجت أكتر ووشها بقى ألوان.
عمر حب يعدى الكلام علشان ما يحرجهاش وقال: كنت اتكلمت مع رامز يسألك لو فيه حاجه حابه تعرفيها عنى وتحبي نتكلم فيها مع بعض قبل ما تاخدى قرارك.
رنا بارتباك: أيوا، هو سؤال بس.
عمر: انتى تسألى زي ما تحبي.
رنا ابتسمت: أنا سمعت من رامز إن إقامتك في الصعيد، وحبيت أعرف هو مش ممكن تدور على وظيفه هنا ولا في حاجه تمنع؟
عمر اتنهد وقال: الصراحه في حاجه تمنع. وكويس إننا في الموضوع دا علشان أوضحلك الصوره. أنا يا رنا من عيلة كبيره في الصعيد، لينا طبايع وعادات وتقاليد متشدده. والدى هو كبير العيله، معنديش غير أخويا عبدالله أكبر منى بسنتين، وأختى الأصغر علياء. كل اللي بيملكه والدى اخويا عبدالله، وأنا اللي بنديره علشان نحافظ على ثروة العيله ونكبرها. من طبايع العيله إننا مش بنقبل بنسب إلا من جوه العيله، إني أناسب من بره العيله ده يعتبر خروج منى على العادات والتقاليد. بس أنا فاتحت والدى وأخويا في الموضوع وقدرت أقنعهم الحمد لله، وتفهموا إني متمسك بيكى جدًا، فمقدرش بعد ما حققوا لى أمنيتى إني أخالفهم تانى وأبعد عنهم. وصدقينى لما تشوفى أهلى وتعرفيهم هتحبيهم جدًا، وهما كمان أنا واثق إنهم هيحبوكى زي ما أنا حبيتك.
رنا كانت متفهمة جدًا لكلامه. أول ما سمعت آخر جملة ارتبكت ووشها قلب ألوان، بس حبت فيه وضوحه وصراحته، وحست إنها مرتاحة لكلامه.
كمل عمر: وصدقينى يا رنا، أنا هحاول على قد ما أقدر إني أعمل كل اللي في استطاعتى علشان أسعدك وما تحسيش بأى غربه أو فرق عن حياتك هنا. واديكى شايفه، أنا كل ما بشتاق لرامز باجى القاهره، وأأكدلك إنى عمرى ما هبعدك عن أسرتك اللي أنا بقيت بعتبرهم أسرتى التانيه. ها، قدرت أجاوب على الأسئله اللي بتدور في راسك ولا لسه في حاجه؟
رنا اكتفت إنها ابتسمت بخجل، وأعلنت بإيمائه إنه لا.
عمر: يعنى نولت الرضا؟
اتكسفت رنا وقامت تجرى على أوضتها، وأخد والدها موافقتها النهائية وبلغها لعمر علشان يبلغ أهله ويتمموا الجواز.
في الأول حنان والداتها مكنتش موافقه ورافضه بنتها تبعد عنها، لكن بعد ما شافت فرحة رنا بالموضوع وسعادتها، وبعد ما شافت قد ايه عمر شاريها وبيحبها، وافقت وابتدت التجهيزات لإتمام الجواز.




