
فاقت رنا للواقع على صوت والداتها.
حنان: رنا، جهزتى يا حبيبتى؟ عمك وعبدالله بره مع بابا ورامز ومعاهم المأذون، ومنتظرينك تخرجى.
رنا بجمود: جاهزه.
رامز: ها يا رنا، الناس مستعجلين علشان هيسافروا بعد كتب الكتاب، والطريق طويل.
رنا: جايه معاك يا رامز.
خرجت رنا معاه وهي بتتمنى إنه يحصل حاجه توقف اللي هيحصل دا، ومفاقتش من جمودها إلا على صوت المأذون وهو بيقول: هل تقبلين يا بنتى بعبدالله زوجًا لك؟
رنا حست ساعتها إن لسانها اتعقد ومش قادره تنطق بأي كلمه.
المأذون: اتكلمى يا بنتى، لو حد غاصبك قولي.
ساعتها ما فكرتش رنا غير في بنتها لين، واللي ممكن يحصل لو قالت رغبتها الحقيقه.
رنا: لا، مفيش حد غاصبنى. أيوا، موافقه.
المأذون: متأكده يا بنتى؟
رنا بغصه: أيوااا.
بعد ما المأذون مشي، طلب عبدالله يقعد مع رنا ويشوفها قبل ما يسافر، ودخل رامز ووالداتها يبلغوها.
رنا بعصبيه: أنا قولت لا، يعنى لا. مش هيشوفنى ولا أشوفه إلا يوم ما يجى ياخدنى.
رامز: عيب يا رنا، تحرجينى وتحرجى ماما. الراجل مستنى بره.
رنا: حرام عليكوا بقى، أنا مش طايقه نفسي. سيبونى براحتى.
رامز: اللي انتى بتعمليه دا غلط. هو من حقه يشوفك، وانتى وافقتى بإرادتك. خلاص بقى يا رنا، كفايه اللي بتعمليه في نفسك وفينا دا.
دخل أحمد: رامز، كفايه. واتفضل اقعد مع الناس بره، وأنا جاى وراك مع رنا. حنان، ممكن تعملى لرنا كوباية لمون من إيديكى الحلوه؟
حنان: حاضر عيونى ليها.
أحمد: تعالى يا بنتى، اقعدى هنا جنبي واستهدى بالله.
رنا بدموعها وشهقاتها: بابا، مش أنا متفقه مع حضرتك إني ما أقعدش معاه إلا يوم ما يجى ياخدنى؟
أحمد: أيوا يا بنتى، وأنا ممكن أتصرف النهارده ومطلعكيش، بس تفتكرى دا حل؟ المفروض إنك خدتى قرارك على اقتناع. بس اللي بتعمليه بيقول غير كده.
رنا: لا يا بابا، أنا راضيه وموافقه ومقتنعه إن المكان اللي بنتى هتكون فيه هو مكانى، بس محتاجه وقت بس. وأوعدك الوقت اللي يحدده هكون جاهزه.
أحمد: رنا، متقلقينيش عليكى وتحسيسينى إنى برميكى.
رنا: لا يا بابا، أنا آسفه، أنا مقصدش كده. بس القصه كلها في إني محتاجه وقت، مش من حقى يا بابا؟
أحمد: من حقك يا بنتى. خلاص ما تقلقيش، أنا هخرج أفهمه، وربنا يعمل اللي فيه الخير.
أول ما خرج أحمد من أوضتها، دخلت رنا في نوبة عياط جديده، وهي حاسه إنها مقهوره وقليلة الحيله، وحاسه بكره غير عادى لعبدالله. وقالت بحسره: والم ووعيد. آآه يا عبدالله، لو تعرف اد ايه بكرهك ومش بطيقك. انت غصبتنى على الجواز منك ببنتى، اللي كنت ممكن تاخدها منى لو رفضت. بس أنا هوريك، مستحيل أكون ليك، ولا هتقدر تاخد مكان عمر في حياتى.
حنان: البنت دى مش عارفه أعمل معاها ايه. عبدالله كل شويه يتصل عايز يكلمها، وهي منشفه دماغها.
أحمد: طيب وهو لسه على التليفون؟
حنان: لا، قفل بعد ما اعتذرت منه زي امبارح، وقولتله بتحمى لين مش فاضيه، اعذارى كلها خلصت.
أحمد: رد عليكى قال ايه؟
حنان: أبدًا، سأل على أحوالها هي ولين، وقالى ابلغ سلامه ليك ولرامز وبس.
أحمد: علشان كده بقولك إنه عاقل وهيستحمل عندها. وأكيد فهم موقفها. ادعيلهم ربنا يسر بينهم الأحوال.
حنان: رنا، انتى فين؟
رنا: أيوا يا ماما، أنا أهو يا حبيبتى.
حنان: عمر على التليفون.
رنا بارتباك: طيب أنا هرد عليه من الأوضه.
وجريت على الأوضه وقفلت الباب ورفعت السكه.
رنا: الوو.
عمر: الوو حياتي. بس انتى كل مره كده الوو بس من غير أى حاجه.
رنا باستعباط: حاجة ايه؟
عمر: يعنى حبيبي.. روحي.. عمرى.
رنا بكسوف: عمر.
عمر: ايه بس، مش من حقي؟
رنا: لا لسه مش من حقك.
عمر: ماشي يا رنا، هانت، كلها يومين وتبقي في بيتى، وساعتها أخليكى تقوليها.
رنا وشها احمر من الخجل وبارتباك.
عمر: بطلي، بدل ما أقفل.
عمر: خلاص هسكت، بس ما تحرمنيش إني أسمع صوتك. قوليلى بقى عامله ايه؟
رنا: هههههه، انت عارف سألتنى السؤال ده كام مره النهارده؟
عمر: يعنى كمان مش عايزانى أطمن على قلبي؟




