منوعات

للعشق اسرار

رنا: أنا الحمد لله كويسه، وانت؟

عمر: أنا كويس طول ما انتى بخير وكويسه. بس أنا فعلًا كنت متصل المره دى عايز أقولك على حاجه.

رنا: حاجة ايه؟

عمر: أنا استأذنت من بابا وطلبت منه إني أعزمك على العشا، وهو وافق.

رنا بفرح: بجد؟ النهارده؟

عمر: أيوا، اجهزى، هفوت عليكى الساعه 7، اوكى؟

رنا: اوكى.

رنا لبست فستان قصير للركبه موف في أسود، ورفعت شعرها، كان شكلها خيال. عمر أول ما شافها اتسحر بجمالها، وخرجوا اتعشوا واستمتعوا جدًا بوقتهم مع بعض.

رنا: الا قولي يا عمر، انت كلمتنى عن أخوك عبدالله كتير، وعرفت إنه ليه مكانه خاصة بقلبك، بس ما شوفتوش جه في الخطوبه ولا حتى بيجى معاك انت وعمو لما تزورونا.

عمر بارتباك: أصل عبدالله دايمًا مشغول، الله يعينه، هو اللي بيدير معظم املاكنا، وعلشان كده معرفش يجي. وإن شاء الله تشوفيه وتتعرفي عليه لما نسافر. مش يلا بينا علشان ما نتأخرش.

رنا حست إن عمر مش بيقول الحقيقه، بس توهت الموضوع: طيب أنا هقوم أروح الحمام وارجع نمشي.

قامت رنا وسرح عمر في موقف عبدالله من جوازه برنا.

عبدالله: انت أكيد اتجننت.

عمر: هو لما أحب وأبقي عايز أرتبط بالبنت اللي حبيتها وحسيت إني عايزها تبقي شريكة حياتى، يبقى اتجننت؟

عبدالله: عمر، انت فاهم أنا أقصد ايه؟ بلاش لف ودوران في الكلام. أهلنا لو سمعوا الموضوع دا، الدنيا هتتقلب علينا. انت ناسي إن أبوك هو كبير العيله؟ وبعدين مش عارف خبر زي دا ممكن يضايقه؟

عمر: ما تخافش، سيب بابا عليا، أنا هقدر أقنعه إن شاء الله. المهم انت هتيجى معايا علشان نطلب إيديها.

عبدالله: شايفك مرتب نفسك وناسي خلود بنت عمك وشايلها من حساباتك.

عمر: ومالها خلود؟ أنا موضوعها قفلته من بدري وانتوا عارفين رايي في الموضوع دا.

عبدالله: انت مش هتبطل الاستهتار والأنانية اللي فيك دى؟ انت دلوقتى مسئول، والموضوع دا مفيهوش دلع. دى عاداتنا وتقاليدنا اللي لازم تحترمها وتمشي عليها. كل أهلنا عارفين إن خلود لك وانت لها.

عمر: دى عادات وتقاليد غلط. مفيش حاجه تجبرنى أربط مصيرى بمصير واحده أنا مش شايفها إلا أخت ليه وبس.

عبدالله: الله أكبر، لحقت بنت البندر تغسلك مخك هي وأهلها.

عمر: رنا بنت محترمه ومن أسره طيبه، وملها دعوه بموقفى أو أى رأى بقوله.

عبدالله: وياترى البنت المحترمه دى هتقدر تيجى وتعيش عشتنا؟ هتقدر تستحمل طبايعنا؟ هترضى تكون من حريم الدار وتتعامل زيهم؟ هتقدر تربى عيالك على عاداتنا وتقاليدنا؟ ولا انت خلاص بعتنا احنا كمان مع العادات والتقاليد الغلط بجوازك منها وناوى تعيش اسبور على كيفها؟

عمر: الله يسامحك. بس انت بقى تعالى وقولى، حياتك اللي ماشيه على العادات والتقاليد شكلها ايه؟ اتجبرت على الجواز من بنت عمك ساره وانت ما بتحبهاش، شوف حياتك عامله ازاى دلوقتى. مفيش أسبوع بيعدى إلا وهي في بيت أهلها. انت فاكرنى مش حاسس بيك وبالمشاكل اللي انت فيها؟ فاكرنى مش حاسس بتعبك؟ انت أكبر دليل ليه إن عاداتنا وتقاليدنا غلط، والموضوع لما يوصل للارتباط ما ينفعش يتم بالطريقه دى.

عبدالله حس إن عمر داس على جرح بينزف جواه. هو فعلًا حياته متلغبطه ومش مستقره، وعمره ما حس بأى سعاده في أى قرار بياخده، رغم إن كل قراراته بيحافظ بيها على العادات والتقاليد. بس عبدالله عنيد واكتفى إنه قال لعمر: خلاص يا ابن والدى، انتهى الكلام بينا. واعمل اللي يريحك، أنا ماليش دخل بحياتك، انت أدرى بمصلحتك.

عمر: عبدالله، انت عارف إني مقدرش أعمل أى شىء في حياتى من غيرك، وعارف معزتك في قلبي. ازاى تتخلى عنى وأنا محتاجلك؟ أنا كنت معتقد إنك هتقف معايا في إقناع الحاج.

عبدالله: أقنعه بحاجه أنا مش مقتنع بيها؟

عمر: يعنى مش هتقف جنبي ومعايا؟

عبدالله: عمرى ما اتخلى عنك وانت عارف، بس إلا الموضوع ده. وخلص الكلام.

عبدالله عنده 30 سنه، طويل وعريض، فيه ملامح من عمر بس هو وسيم جدًا عنه، وبيميزه سكسوكه خفيفه بتزيد من جاذبيته، ليه طله وهيبه ملفته. شخصيه جديه جدًا بس برغم كده حنين جدًا على كل اللي حواليه. كل حياته شغل وبس، رغم تعليمه العالى بس دا ما قدرش يغير فكره المتشدد لعادات أهله وتقاليدهم. مثله الأعلى هو والده اللي لا يمكن يرفض له أى طلب حتى لو ضد رغبته. أما والده فبيعتبره سنده، بيعتمد عليه في كل كبيره وصغيره. اتجوز بنت عمه ساره وخلف منها بنت اسمها ريماس عندها 7 سنين، ولكن لكثرة المشاكل والخلافات انفصل عنها قبل وفاة عمر. قرار انفصاله عنها مكنش سهل، بس قدر ياخد قراره لسبب هنعرفه خلال الأحداث. ساعة الغضب ما بيقدرش يتحكم في تصرفاته.

وقفت رنا قدام دولابها علشان تجهز شنطتها هي ولين، لأن عبدالله اتفق مع والداها إنه هيمر عليهم الصبح علشان ياخدهم ويسافر. وهي بتفتح شنطه من الشنط شافت فيها الألبوم، طلع الألبوم جوازها من عمر. قلبها وجعها قوي وسرحت بخيالها في عالمها الجميل.

عمر: حياة قلبي، يلا اصحى، مفيش وقت.

رنا: هو الساعه كام يا حبيبى؟

عمر: 10 يا روح قلب حبيبك، ويدوبك نلبس علشان نلحق نوصل في النور. الكل منتظرنا في البلد.

رنا بدلع: تيب.

عمر: ايه ده؟ رايحه فين؟ مفيش صباح الخير؟

رنا: صباح الخير على عيونك.

عمر: لا ما تنفعش، لازم عملي.

رنا: عمر، بطل دلع، هنتأخر.

عمر: لا مش هتقومى الا لما تصبحى عليه.

رنا قربت منه وباسته في خده وقالت بدلع: صباحك سعاده.

عمر قربها منه وهو بيقول: صباح الدلع والعسل.

رنا: يلا بقى سيبنى علشان أروح ألبس.

عمر: مش قادر، خليكى شويه.

رنا: لا هنتأخر، يلا بلاش دلع. أنا لسه هدور على لبس مش عارفه ألبس ايه.

عمر: فكرتينى بموضوع اللبس في حاجه مهمه عايزك تعرفيها يا حبيبتى.

رنا: ايه هي يا حبيبى؟

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى