
عمر: احنا بره الصعيد لما نسافر أو نروح لأهلك البسي اللي انتى عايزاه، أنا معنديش أى مانع. لكن عند أهلى مينفعش تظهرى قدام أى رجاله أو تخرجى من الجناح بتاعنا إلا بالعبايه وشعرك متغطى. يعنى حتى لو لبسك ساتر، لازم تحطى عليكى العبايه. دى عاداتنا هناك. بس عايزك تكونى راضيه، واوعى تضايقي.
رنا: أنا بالعكس يا حبيبي، كويس إنك عرفتنى. قدام هقعد معاهم يبقي لازم أطبع بطبعهم وأمشي على عاداتهم، وإن شاء الله أشرفك قدام أهلك.
عمر: ربنا يكملك بعقلك يا رنو يا قلبي انتى. وبعدين انتى مشرفانى في أى مكان، انتى أجمل حاجه حصلتلى في الدنيا دى.
رنا: وأنا عندى رضاك بالدنيا كلها.
عمر: لا، أنا كده ممكن أتهور والغي السفر.
رنا: لا يا قلبي، أنا عايزه نسافر علشان نفسي جدًا أتعرف على أهلك وعلى بيتنا اللي إن شاء الله نقضى فيه أحلى سنين عمرنا.
عمر: يلا يا قلبي، ادخلى انتى عند الحريم، وأنا هروح أسلم على الرجاله اللي جايه تبارك في المندره.
رنا بارتباك: ايه ده؟ يعنى مش هتدخل معايا؟
عمر: لا ما ينفعش، جوه كلهم حريم وعيب أدخل.
رنا بقلق: بس أنا مش عايزه أدخل لوحدى.
عمر: ما تقلقيش، علياء أختى أول ما تشوفك أنا موصيها عليكى.
رنا: حاضر، بس لو رنيت عليك تيجى.
عمر: حاضر.
وقبل ما رنا تدخل كانت علياء في استقبالها.
علياء: يا مرحب بعروستنا الجميله.
رنا: أهلًا بيكى، أكيد انتى علياء.
علياء بشحمها ولحمها: هههههه، أنا علياء أخت عمر الوحيده، واللي هتفتن لك على كل بلاويه.
رنا: عمر ليه بلاوى؟
علياء: يوووه كتيررر، بس اعرفك على قرايبنا وأخدك ونطلع على اوضتى ونم ونقطع في فروة عمر للصبح.
رنا: اوكى.
خدت علياء رنا وخلتها تقلع العبايه، وكانت لابسه تحتيها فستان جميل جدًا عليها. أول ما دخلت العيون كلها كانت عليها، بانبهار من جمالها، وعرفتها علياء على والدة عمر اللي فرحت بيها جدًا واستقبلتها بحفاوه كبيره. رنا حسيت بيها قد ايه مامت عمر طيبه وحبوبه. وبعدين خدتها وسلموا على بنات خال عمر وبنات أعمامه، لغاية ما وصلوا لوحده قاعده نظراتها ليهم، رنا قلقت منها وحست بعدم راحه من ناحيتها، ودا نفس حال ساره اللي من ساعة ما شافت رنا وهي حست إنها مش طايقاها.
علياء: ساره بنت عمى ومرات أخويا عبدالله يا رنا.
رنا جت تقرب تسلم عليها، بعدت عنها وسلمت بطرف إديها وبتعالى وسخرية قالت: أهلًا، هو انتى بقى بنت البندر؟ مجايب ابن عمى.
رنا استفزت من طريقة كلامها جدًا، بس فضلت تمسك نفسها علشان دى أول مره تتعرف على الموجودين، وأكيد الكل مركز في تصرفاتها. رنا بهدوء وفخر: أيوا، أنا عروسة عمر.
ودخلت علياء اللي لحقت الموقف وقالت: وأجمل وأرق عروسه دخلت عيلتنا.
ساره: جرى ايه يا بنت عمى؟ مش شايفه إنك بقيتى مجامله زياده عن اللزوم؟
علياء: أنا ما قولتش إلا الحقيقه، والعينه بينه. بس واضح إنك انتى اللي محتاجه لكشف نظر.
ساره: قصدك ايه؟
رنا حبت تدخل وتهدى الوضع وقالت: أكيد ما قصدهاش حاجه، علياء بتهزر.
ساره: وانتى ايه اللي دخلك؟ أنا بتكلم أنا وبنت عمى. ولا عايزتها تولع نار من أولها؟
رنا اتصدمت من رد فعلها اللي أكد إنها مش متقبلاها أبدًا.
علياء: مفيش حد عايز يولعها نار غيرك. واتلمى بقى بدل ما أنادى عبدالله وأحكي له على اللي بتقوليه وبتعمليه.
وكانت كلمة السر اللي خلت ساره تسكت وما تنطقش بأي كلمه تانيه. رنا استغربت حتى من ملامح الخوف اللي بانت على وشها من جملة علياء.
علياء: تعالى يا رورو، ولا يهمك من كلامها، أصلها مدب وبتاعت مشاكل، ولو كانت كترت كنت عرفت أوقفها عند حدها.
رنا: أنا بس مستغربه، هي ليه مش طيقانى مع إني لسه ما اتعاملتش معاها ولا حتى تعرفنى؟
علياء: أقولك بس دا سر.
رنا: في بير، ما تقلقيش، بس علشان أفهم السبب.
علياء: بصي يا ستى، أصل ساره ليها أخت اسمها خلود، كان المفروض إنها من عرفنا وتقاليدنا تبقي زوجة عمر، بس عمر رفض، بالذات لما شافك يا جميل، وأقنع بابا وعبدالله بالعافيه. الصراحه بابا لما راح مع عمر وشافك وشاف أهلك شكر فيكم جدًا، وأعلن قرار عمر في الارتباط من بره العيله قدام كل أهلنا، ودا سبب زعل عمى وولاده مننا، وحصل بسبب الموضوع دا مشاكل كتير بينا وبينهم، لكن بابا قدر يراضى عمى ويهدى الدنيا. فهمتى بقى هي ليه بتعاملك كده؟



