
رنا ساعتها حست برضو إن علياء ما جابتش سيرة عبدالله ورأيه، وكان عندها فضول تعرف، لأنها لما سألت عمر ارتبك ومريحهاش الرد. وقالت: آه فهمت، بس ما قولتليش، عبدالله كان في صف مين في المشكله دى؟ عمى ولا والد ساره وحماه؟
علياء برضو بان عليها الارتباك وقالت: بصى بصراحه، هو كان رافض. أصل عبدالله أخويا رغم تعليمه العالى بس متمسك جدًا بعاداتنا وتقاليدنا وضد الخروج عنها، دماغه ناشفه. أقولك حاجه بينى وبينك.
رنا: قولى.
علياء: انتى عارفه، اتجوز ساره بنت عمى وهو عمره ما حبها، بس علشان ينفذ عاداتنا. أصل احنا عندنا البنت لابن عمها.
رنا سرحت وقالت مع نفسها: واضح كده من كلام علياء إن عبدالله دا ومراته مش طايقنى. ربنا يستر. بس الحمد لله إن علياء لطيفه وحبوبه، وطنط كمان مامت عمر زي العسل، وباباه بيحبنى. أما الشخصين دول فأنا هسلم حل علشان أتقى شرهم، ما اتعملش معاهم خالص.
علياء: رنا.. رنا.
رنا: معاكى حبيبتى.
علياء: معايا ايه بس؟ ياترى مين اللي واخد عقلك؟
رنا: بقولك ايه، انتى مش قولتيلى إنك هتقوليلى بلاوى عن عمر؟ يلا قولي.
علياء: اسمعى يا ستى، أول مره بابا خدنى القاهرة ودانى أنا وعبدالله وعمر الملاهى، وفي لعبه عجبتنى جدًا، وعمر كان عايز ينزلنى ويطلع عليها هو، وأنا أبدًا مش عايزه أنزل ومستمتعه جدًا. ولما حب يضايقنى عبدالله زعق له وقاله سبها براحتها، وأول ما تخلص هاتها وتعال على الكافتريا. عمر كان عارف المكان علشان راح كتير مع أصحابه، ودايمًا كان هو وعبدالله بينزلوا مع بابا ويطلبوا منه يروحوا، وكان بيوديهم. المهم يا ستى، عبدالله مشي وساب معايا عمر، فضلت ألعب لغاية ما بصيت حواليه ما لقتش عمر. نزلت وأنا مش عارفه أروح فين ولا أجى منين، وأدور وأنا بعيط على عمر أو بابا وعبدالله. شافنى واحد من اللي بيشتغلوا في المكان وهدانى ولف بيه علشان ندور عليهم. وفجأة لقيت عمر، جريت عليه وقولت للراجل أهو دا أخويا. تتصورى عمر يرد يقول ايه؟
رنا: قال ايه؟ قولى.
علياء: قالوا: لا معرفهاش. فضلت أعيط وأقوله أنا أختك يا عمر، ودا عمل نفسه مش من هنا، وأنا أعيط.
رنا: يا نهار أبيض، هههههههههههه.
علياء بتضحكى.
رنا: طيب وحصل ايه بعد كده؟
علياء: بس أنا مسكتش، حكيت له هو بابا على اللي حصل، والاستاذ برر موقفه إنه كان مخنوق منى علشان مردتش أنزل من اللعبه وأركبه هههههههههههه.
رنا: هههههههههه، يخرب عقلك يا عمر. مشكله.
علياء: والا مشكله.
ورن جرس موبيل رنا، بصت عليه وقالت بضحك: دا هو. الوو حبيبي.
عمر: أيوااا روح قلبي. انتى فين؟ أنا سألت ماما عليكى، قالت اختفيتى انتى وعلياء.
رنا: فعلًا أنا مع علياء في اوضتها، وكنا بنم عليك.
عمر: أي حاجه تقولهالك كدب، اوعى تصدقى.
رنا: يا شيخ، قدام قولت كده يبقى حصل.
عمر: طيب هى قالتلك على ايه بالظبط؟
رنا: بقى كده؟ شكل بلاويك كتير زي ما قالت علياء.
عمر: هى قالت كده؟ طيب أنا هوريها. ويلا بقى اطلعى علشان نروح على الجناح.
رنا: لسه بدرى يا عمر، احنا لسه طالعين من شويه.
عمر: لا يلا، وحشتينى بقى.
رنا: طيب سلام.
وبصت لعلياء وقالت: معلش يا لولو، هقوم دلوقتى، وبكره نكمل.
علياء: روحي يلا، أنا كمان هقوم أنام، اليوم كان تعب وطويل. أشوفك بكره يا جميل، تصبحى على خير.
رنا: وانتى من أهل الخير حبيبتى.
عمر: هااا، ايه الأخبار؟ اتعرفتى على حريم العيله؟
رنا: كلهم لطاف جدًا وبشوشين، بس…
عمر: بس ايه؟
رنا: مرات أخوك عبدالله، الصراحه يعنى رخمه وما اتقبلتهاش.
عمر: هههههه، فعلًا. اوعى تكون ضايقتك؟
رنا: لا، علياء حبيبتى اتصرفت. ما تتصورش يا عمر، أنا حبيت علياء اد ايه، عسل جدًا وسكر وطيبه قوي ودمها خفيف. شكلنا هنبقي قريبين جدًا.
عمر: والله انتى اللي قشطه بالعسل.
رنا: البيت كله كان نايم، صحيت بالليل كعادتى عطشانه وجعانه لأنى مكلتش من الغدا. ولما أصر عليه عمر اتعشي، رفضت. حاولت أصحى عمر يجبلي مايه وأى حاجه أكلها، لاقيته رايح في النوم خالص، فقررت أقوم ألبس عبايتى وحطيت الطرحه على راسي ونزلت أتسحب على المطبخ.
عبدالله: كان يوم طويل جدًا ومتعب، وكنت جاي تعبان وراسي هتنفجر من الصداع. دخلت جناحى لاقيت ساره في وشي كلت دماغي زياده، وهي عماله تحكيلي كل اللي حصل في البيت كعادتها الممله.
ساره: اسكت يا عبدالله، دى مرات اخوك دى طلعت مش سهله خالص. دى كانت عايزه توقع بينى وبين علياء، بس أنا ادتها على دماغها من أولها.
عبدالله: ساره، فضينا من كلام الحريم دا. أنا دماغي مصدعه ومش فاضى للكلام الفارغ دا.
ساره: يعنى هو أنا اللي صدعتك؟ انت اللي جاي مصدع.




