الفصل الرابع رواية الكاتبة ملك إبراهيم
فارس بص له بغموض وقال: “نطمن بس على الست المريضة دي.. وانا بنفسي هعرفك انا مين.”
عباس حس ان الراجل اللي قدامه مش شخص عادي واتوتر من ثقته وهيبته اللي كانت طالعة من عينيه، هز راسه بتوتر وقال: “وانا مستني يا باشا.”
بعد كام دقيقة عربية الإسعاف وصلت والشارع كله اتقلب، كل أهل الحارة اتجمعوا قدام البيت اللي أمل ساكنة فيه وقلوبهم بتدق من الخضة.
رجال الإسعاف شالوا والدة أمل بسرعة، وأمل كانت بتبكي وقلبها هيتقطع وركبت مع والدتها وهي ماسكة إيديها بإيديها الاتنين ومش قادرة تسيبها كأنها لو سابتها هتضيع منها للأبد.
فارس ركب عربيته واتحرك وراهم بسرعة وعينه مش بتفارق عربية الإسعاف، كان قلبه مقبوض وخايف على أمل أكتر من أي حاجة.
عباس نده على واحد من الصبيان بتوعه وقاله بغل: “اطلع وراه بالموتوسيكل، عايز أعرف الباشا ده مين.”
بيوصلوا المستشفى وبيلاقوا عدد من الدكاترة في انتظارهم وكل الاستعداد معمولة عشانهم، أمل بصت لفارس باستغراب ودموعها نازلة وسألته: “هي ماما حالتها خطيرة ؟”
فارس بص لها وطمنها بهدوء وقلبه بيتوجع على منظرها وقال: “متقلقيش، هتبقى كويسة.”
أمل وقفت جنب فارس وهي بتبكي وجسمها كله بيترعش ومرعوبة على مامتها، بعد كام دقيقة الدكتور خرج ووشه متغير.
أمل سألته بلهفة وصوتها مخنوق من العياط وقالت: “طمني يا دكتور.”
الدكتور بص لفارس واتهرب من عينيها وقال لها: “اطمني يا آنسة.. ثواني بس هتكلم مع باشمهندس فارس عشان نكمل باقي الإجراءات.”
واتحرك الدكتور مع فارس بعيد عن أمل كام خطوة وقاله بصوت واطي مليان أسف: “البقاء لله يا باشمهندس فارس.. المريضة وصلت المستشفى في لحظاتها الأخيرة.. واضح انها بتعاني من المرض بقالها كتير وكانت في المرحلة الأخيرة.”
فارس اتصدم وحس ان الكلمة نزلت على صدره زي الحجر، بص على أمل اللي كانت بتبص عليهم بخوف وقلق وقلبها حاسس.
بص للدكتور وقاله بصوت مكتوم: “الله يرحمها.. تمام يا دكتور.. خلصوا كل الإجراءات بس في هدوء من فضلك.. ومش عايز حد يعرف بنتها الخبر دلوقتي.”
لدكتور هز راسه بالموافقة، وفارس بعت رسالة بسرعة لدنيا عشان تيجي المستشفى وتكون جنب أمل لأنه مكنش قادر يشوفها بتنهار لوحدها قدامه.
أمل بدأت تحس ان في حاجة خطر على حياة والدتها، بس قلبها مش متخيل أبدا انها تكون ماتت، كانت بتحارب الفكرة جواها.
قربت من فارس وسألته بقلق وصوتها بيترعش: “هو الدكتور قالك ايه؟ ماما حالتها خطر؟”
فارس بص لها وحس ان قلبه بيتقطع عليها ومش قادر يبص في عينيها من الوجع، قالها بصوت بيحاول يكون ثابت: “اهدي يا أمل.. ان شاء الله كل حاجة هتبقى تمام.”
أمل قالت برجاء وهي ماسكة في دراعه كأنها بتستنجد بيه: “طب انا عايزة أشوف ماما واطمن عليها.”
فارس مكنش عارف هيقولها ازاي، كان حاسس انه عاجز قدام دموعها، هز راسه وقالها: “تمام يا أمل.. اقعدي بس شوية وانا هتكلم مع الدكتور.”
أمل بدأت تحس ان في حاجة فارس مخبيها عليها، قلبها كان بيدق بسرعة مرعبة، حطت إيديها على قلبها بوجع وسألته: “هي ماما كويسة بجد؟ انا حاسة ان في حاجة وانت مش عايز تقولهالي.”
فارس بص لها وهو مش عارف يرد، كانت صعبانة عليه وروحه بتتوجع معاها، طلب منها بحنية: “اقعدي واستني شوية كمان.”
أمل قعدت وهي مش مطمنة وروحها مسحوبة منها، وبعد شوية لقت دنيا داخلة المستشفى وهي حزينة ومعيطة ووشها أصفر، قربت منها وحضنتها بسرعة.
أمل في اللحظة دي حست ان أمها ماتت، قلبها اتقبض مرة واحدة، بصت لدنيا وقالت لها بصوت بيرتجف: “انتي عرفتي منين؟”
ردت دنيا بهدوء وهي بتعيط: “فارس كلمني وقالي.”
أمل بصت لها وبدأت الدموع تنزل من عينيها بغزارة وسألتها بصوت بيتقطع: “قالك ان ماما ماتت؟”
دنيا مقدرتش ترد وعيطت بحرقة.
دي كانت الضربة اللي كسرت قلب أمل نصين، هي خلاص اتأكدت من اللي كانت بتفكر فيه، أمها ماتت وسابتها لوحدها في الدنيا.
دنيا حضنتها جامد وقالت لها بصوت مبحوح: “البقاء لله يا حبيبتي.”
جسم أمل كله اتجمد، مش قادرة تنطق ولا تتحرك، كل لحظة بينها وبين أمها بتعدي قدام عينيها، مش فاهمة يعني ايه أمها مش هتكون موجودة تاني في الحياة، حست ان الدنيا كلها فضيت.
