بقلم ساره أحمد (الأيقونة) لم تكن بينهما قصة حب… بل معركة بقاء، كل منهما يحارب ليبقي الآخر حياً فيه.
هي هدنة مؤقتة في حربه… وهو نارها الأبدية التي لا تملك منها خلاصاً… في قصر فخم، يحمل بين جدرانه رقي العصور القديمة، وتفاصيله تهمس بأنامل فنان عشق الجمال، كانت هناك غرفة أنثوية الطابع، ناعمة الملامح، صاخبة الروح… كصاحبتها.
في تلك الغرفة، كانت ضي البدري تتقلب على فراشها المضطرب، يتصبب جبينها رغم دفء الغطاء، وأنفاسها تتسارع كمن يركض في حلم ثقيل. وسط نومها العميق، زارها والدها… كما اعتاد أن يفعل دائماً، بصوته الحنون الذي لا ينسى.
قال عثمان البدري، وهو يبتسم من خلف شاشة الحلم: “هااا يا ضي عين أبوكي… أنا لسه طالع من المطار وجاي على البيت، وجبتلك كل اللي طلبتيه يا حبيبتي.”
ضحكت ضي، ضحكة تشبه اسمها، خافتة كضوء القمر، وقالت بمرح طفولي: “يا روح قلبي يا بابي، أنا مش عايزة حاجة غيرك إنت… وحشتني أوي.”
هز رأسه بسعادة، وهتف: “مافيش حد وحشني أدك يا ضي… كلها ربع ساعة وهبقى عندك.”
أومأت برأسها، ثم تساءلت بحنان خافت: “بس حضرتك ماقولتش لعمار إنك راجع امتى؟ كان جالك المطار يا بابي!”
نظر أمامه، عبست ملامحه فجأة، وغمر صوته القلق وهو يجيب: “عمار مشغول ف الشغل يا حبيبتي، مش حابب أزعجه… معايا السواق والدنيا تمام.”
لكن ما هي إلا لحظات… حتى اقتربت سيارة سوداء، تسير بمحاذاة سيارته. نظر إليها عثمان نظرة عابرة، ثم عاد يحادث ابنته: “المهم يا ضي، أنا عايزك تشدي حيلك… وبلاش تشتيت مع إبراهيم، إنتي ف ثانوية عامة، وعايزك تدخلي كلية العلوم زي ما حلمنا.”
ضحكت وقالت بحب: “عيوني ليك يا عيون ضي… إنت تأمر وضي تنفذ!”
لكن كلماتها لم تكتمل… إذ حدث انحراف مفاجئ للسيارة إثر حادث سير أليم شق سكون الحلم ككابوس.
شهقت ضي برعب، وهتفت باكية: “إيه ده! إيه اللي بيحصل؟ بابااااا! بابااااا رد عليا!”
ووقع الحادث الأليم ليغيب الأب في لحظات خاطفة…
فزعت من نومها تصرخ كمن سحب قلبه عنوة: “بااااابااااا! لااااااااا!”
هرع شقيقها عمار إلى غرفتها، وجثا بجوارها وضمها إليه بشدة، وربت على ظهرها بأنامل وجعه: “اهدي يا حبيبتي… اهدي يا ضي.”
تشبثت به كالغريق، ودموعها تنهمر بلا توقف، نحيبها يمزق سكون الغرفة، وكأن القصر بأكمله دخل في حداد ثقيل وصاحت بدموع ورعب: “أنا عايزة بابي يا عمار… مش قادرة أعيش من غيره، مش قادرة!”
شد على وجنتها بحنوٍ أثقلته الصدمة، وهمس بصوت مخنوق: “بابا عند اللي أرحم من الكل يا قلبي… ادعيله يا حبيبتي، ده محتاج دعانا دلوقتي.”
هزت رأسها بنحيب، تبكي كطفلة انتزع منها الأمان: “لأ! مش قادرة… مش قادرة يا عمار، بالله عليك!”
ضمها إليه أقوى، وهمس من بين دموعه التي لم يرد لها أن تنزل: “لو بتحبيه بجد… لازم تقومي. لازم تفرحيه وهو في حتة أحسن. لازم ناخد عزاه زي ما يليق بيه، ونكمل الطريق اللي كان عايزه لينا.”
نظر في عينيها المحمرتين من البكاء، وأكمل بإصرار موجوع: “فهماني؟ لو بتحبيه، لازم تسمعي كلامه… وتنجحي… وتعيشي زي ما هو كان بيتمنى.”
هزت رأسها، ودموعها تسيل بلا مقاومة، وهمست بنحيب: “عندك حق… لازم أفرحه.”
أخذ يدها، قبلها برقة، وقال بثقة: “أنا عارفك قوية… وهتقفي على رجلك عشان بابا… وإحنا كلنا معاكي.”
ثم وقف، وسحبها بلطف لتقف، رغم رجفة جسدها.
قال وهو يتنهد: “يلا… في ناس كتير تحت جايين يعزوا، ولازم تبقي واقفة قدامهم يا قلبي.”
بلعت الغصة التي تخنق حلقها، وهمست بصوت مرتجف: “حاضر… هنزل، وراك على طول.”
قبل جبهتها، وقال: “ما تتأخريش.”
خرج عمار، وبقيت ضي على طرف الفراش، تحمل صورتها مع والدها، وتضمها إلى صدرها كأنها آخر ما تبقى لها منه.
همست والدموع تتساقط من عينيها: “هعمل كل حاجة تخليك فخور بيا يا حبيبي… أنا ضي عينك… وهتفضل في قلبي طول العمر.”
……
في بهو القصر الكبير، لفه السواد ولفحته رائحة البخور، اختلطت همسات المعزين بنشيج مكتوم كأن الجدران تبكي على من غادر، وكان الحزن يسير فيه بثقل الظل.
نزلت ضي على الدرج بخطى بطيئة لكنها ثابتة، تحمل فوق أكتافها ألماً أثقل من جسدها الرقيق، وعيناها المحمرتان توزعان نظرات شاحبة على الوجوه الكثيرة، التي بدت غريبة عليها فجأة.
وقفت في منتصف البهو، تحاول أن تزرع صلابتها في الأرض كي لا تسقط، ورغم أن جسدها كان يرتجف من الداخل، إلا أن ظهرها كان منتصباً كأنها تستمد قوتها من طيف والدها.
اقتربت منها تهاني… وعيناها مزينتان بحزن متكلف، وابتسامة باهتة زاحفة على شفتيها، اقتربت منها بخطى محسوبة وكأنها تراقب كل نفس تتنفسه ضي، ثم قالت بنبرة لا تخلو من عتاب مغلف بالعزاء: “قلبك جامد يا ضي… نازلة بسرعة كده! كنت فاكراك هتفضلي فوق كتير… بس شكلك قوية زي ما هو كان دايماً شايفك.”
نظرت لها ضي بنظرة جامدة، تخبئ خلفها ألف شعور، ثم ردت بهدوء ممزوج بوجع مكبوت: “أنا نازلة آخد عزاه… وأوفيه حقه… هو علمني أقف وقت ما الكل يقع.”
ابتسمت تهاني بسمة سريعة، ثم تنحت جانباً.
في تلك اللحظة، دخل عمها، مرتداءً بدلة سوداء مع علامات الحزن، يجر قدميه جراً كأن الصدمة أكلته، اقتربت منها واحتضنها، وهمس بصوت متهدج: “خسارتنا كبيرة يا ضي… أخويا كان سندي وسندكم، ربنا يصبركم، ويصبرنا كلنا.”
ردت ضي بهمس مهتز، وهي تكاد تختنق: “كان قلبي يا عمي… ربنا يرحمه ويغفرله.”
نظر لها وأردف بحزن: “كان معوضني عن أبايا الله يرحمهم الاتنين يا بنتي.”
ابتعد عنها وهو يتنهد بكآبة، لترك الساحة فجأة على وقع خطوات سريعة دافئة، وذراعين فتحتا لها بلا حساب.
اندفعت آية نحوها واحتضنتها كأنها تعيدها إلى الحياة، بلا كلمات، فقط عناق صادق خرج من قلب منكسر.
ربتت آية على منكبها وهي تنحب: “كان بالنسبالي أب يا ضي… أكتر من أبويا… مش قادرة أصدق إنه راح.”
انهارت ضي بين ذراعيها، دفنت وجهها في عنقها، وبدأت بنحيب صادق، وهمست وهي تشهق: “أنا ضايعة من غيره يا آية… الدنيا كلها سودة… سودة أوي.”
ربتت آية على ظهرها برفق، دموعها تتساقط فوق شعر ضي، وغمغمت بحرقة: “بس أنا جنبك… وهفضل جنبك طول العمر، وهو فوق شايفك، وفخور بيكي يا ضي.”
وظل بهو القصر صامتاً، كأنه يحترم ذلك العناق النقي وسط الألم… صامتاً إلا من صوت قلبين يبكيان أباً، كل واحد بطريقته…
جلست ضي وسط عتمة السواد الذي أحاط بالقصر الذي طالما كان يضج بالفرحة والسعادة.
…………………………….
