
في اليوم التالي:
في قلب القاهرة القديمة، حيث تختلط رائحة الزمن بعطر التوابل ورنين الذهب، كانت حارة الصاغة في الجمالية تنبض بالحياة كما لو أنها كائن حي يتنفس من أنفاس ناسها، ويحكي تاريخهم على جدرانه القديمة بعزة وكبرياء.
تتمايل الأزقة الضيقة مفروشة ببلاط غير متناسق، محفور بخطوات من مروا ذات يوم. من فوق، تتشابك أسلاك الكهرباء كأنها عروق الحارة.
على جانبي الطريق، تتراص المحلات، كل منها يحرس ذاكرة مهنته؛ واجهات نحاسية لامعة، وعناقيد من الذهب تتدلى خلف الزجاج، تعكس مزيجاً من الفخامة والبساطة.
وفي عمق الحارة، يفوح عبير القهوة الطازجة من المقاهي القديمة، حيث يجلس الرجال على مقاعد خشبية، يتبادلون السيرة والحديث.
الحارة، رغم صغرها، كانت تبدو مملكة… لها كبير، وشهامة تسكن في الهواء. يوقر أهلها القيم، ويكفون عن الكلام إذا ذكر اسم سلطان الهواري… كأن ذكره يوجب الهيبة.
هو الكريم وقت الشدة، والشحيح حين الرخاء. تراه يبتسم وفي عينيه حزن أعوام. صادق ومقدام إذا لزم الأمر. يعشق الهدوء، لكنه يفي بالعهود. سلطان الهواري يحمل روح رجل حكيم، يعرف كيف يكون سيفاً ومتى يكون درعاً…
أمام أحد محلات الذهب العريقة التابعة لعائلة الهواري، وتحديداً محل عاشور الهواري، كانت الشمس تميل نحو الغروب.
وقف عز وياسر أمام المحل، سند عز على الباب يمسك بكوب شاي، وإلى جواره وقف ياسر يتأمل الشارع.
اقتربت منهما امرأة مسنة، ملامحها تحمل الوقار والرجاء، وقالت بصوت مجروح: “قولي يا ابني الله يخليك… هو المعلم سلطان رجع؟”
تبادل عز وياسر النظرات، ثم رد عز بهدوء: “لأ يا حاجة… لسه مسافر، ومحدش عارف يرجع إمتى.”
تنهدت المرأة وقالت: “يعني مش هنا يا ابني؟ أنا جاية له مخصوص… كان لازم أشوفه. أنا ليا أسبوع بجيله كل يوم.”
اقترب منها ياسر وهتف بهدوء: “والله يا حجة، سلطان ساعات بيغيب… بس بيرجع في أي وقت!”
وضعت المرأة يدها على صدرها وقالت: “أنا مستنياه يا ضنايا من أسبوع… كنت فاكرة هشوفه ويفهمني من غير ما أتكلم…”
ارتبك عز، ونظر لياسر بسرعة، ثم قال بنبرة حانية: “تعالي اقعدي يا أمي… تعالي ارتاحي، باين عليكي تعبانة!”
أسرع ياسر وأخرج كرسياً خشبياً من المحل وضعه خلفها وقال: “اقعدي يا حاجة، ولو ليكي طلب أو محتاجة حاجة، إحنا ولادك، قولي وإحنا نشوف لك طلبك.”
لكنها هزت رأسها وقالت: “محدش يقدر يساعدني غيره… أنا عايزة سلطان… هو اللي يعرف يساعدني في موضوعي.”
وقفت ببطء ثم مشت وهي تهمس بكلمات خافتة: “كنت مستنياك ترجع الحق لأصحابه…”
سارت مبتعدة بين الزحام، وظل عز وياسر ينظران إليها في صمت.
قال ياسر: “دي شكلها محتاجة مساعدة كبيرة ومحدش جنبها.”
رد عز: “سلطان دايماً هو اللي بيرجع له الناس لما تقصر حيلتهم.”
ثم اقتربت خطوات وثيقة، وصوت مهيب اخترق المكان.
هتف عاشور الهواري وهو ينظر لابنه: “في إيه يا عز، الست دي كانت عايزة إيه؟”
اعتدل عز في وقفته وقال بهدوء: “كانت عايزة سلطان يا حاج، بس مردتش تقول محتاجاه في إيه ومشت.”
قال عاشور بجدية: “يا ابني كنت ساعدتها بفلوس، انت عارف أخوك بيراعي الناس الغلابة.”
هز ياسر رأسه وقال: “لا يا عمي… دي مش طالبة مساعدة مالية، شكلها وراها حكاية كبيرة محتاجة حكمته.”
أومأ عاشور وغمغم وهو يلتفت لصاحبه جمال العتال: “ربنا يجيبك يا سلطان يا ابني بالسلامة…”
أومأ جمال برأسه وتمتم: “ربنا يكتبله السلامة يا خويا.”
………………………..
في بيت الهواري:
في قلب حي الجمالية، كان بيت الهواري يعلو شامخاً كقصور الزمن الجميل، بباؤه الفخم ونقوش حديده المشغول بعناية.
في صالونه الواسع، كانت بطة تقف معاتبة ابنتها حياة التي خرجت برداء عصري لا يتناسب مع التقاليد المحافظة للمنزل: “إيه اللي إنتي لابساه ده يا بت؟ ادخلي غيري هدومك دي حاجة ما تليقش ببيتنا.”
ردت حياة بقلة اهتمام: “إيه يا ماما، وبعدين سلطان مسافر… مش هيشوفني يعني.”
ارتفعت نبرة بطة وهي تقول: “ما إنتي عارفة أخوكي، بييجي فجأة من السفر! لو شافك مخترقة تقاليد البيت هيزعل منك جداً، وأنا مش هتدخل بينكم!”
تبدل وجه حياة وظهر القلق في عينيها؛ فهي تعرف أن سلطان شديد الحرص على تقاليد العائلة والالتزام. تمتمت: “خلاص، هدخل أغير.”
انصرفت مسرعة، بينما جلست بطة والتفتت إلى عايدة الشاردة بالفكير في ابنها سلطان وقالت: “شوفي البت وعمايلها!”
هزت عايدة رأسها بشرود وقالت: “سيبيني يا بطة… بقاله شهر غايب ومفيش خبر يطمننا عليه. قلبي واكلني عليه.”
اقتربت منها بطة وقالت بصوت حنون: ” ده سلطان الهواري يا عايدة! راجل يعتمد عليه ويقدر يدبر نفسه في أي مكان.”
تنهدت عايدة: “عارفة يا بطة… بس قلبي مش مطمن.”
همست بطة بالدعاء: “ربنا يردك يا سلطان يا ابن بطني سالم غانم يا ضنايا. يارب يرجعلنا سند بيتنا.”
……………………………….
في اليوم التالي صباحاً:
كانت شمس الصباح قد بدأت تطرق نوافذ القصر الكبير. الباب الحديدي الثقيل انفتح ببطء لتدخل منه السيارة التي أقلت ضي وإبراهيم من المقابر بعد زيارة قبر والدهما.
توقفت السيارة، ترجل إبراهيم أولاً، ثم فتح الباب لضي التي نزلت بملامح شاحبة.
عند مدخل القصر، كان عمار يقف، وإلى جواره رجل يرتدي بدلة رسمية يحمل أوراقاً وأختاماً.
اقترب إبراهيم بخطوات ثقيلة وقال بصوت متوجس: “إيه اللي بيحصل هنا؟ مين ده؟”
ابتسم عمار في وجه ضي مجاهداً كي يطمئنها وقال: “مفيش حاجة يا ضي… روحي إنتي فوق وارتاحي، إنتي تعبانة يا حبيبتي.”
رفعت ضي حاجبها ونظرت لأخيها، ثم اكتفت بإيماءة صغيرة ودخلت.




