حمزة: أي دا كله يا ماما؟
مامت حمزة: عريس بقى ولازم نفرح بيك. يلا بقى روح عند عروستك.
حمزة: ماشي يا حبيبتي، تصبحي على خير.
قفل مع مامته، وحورية كتبت ورقة: حمزة، أنا آسفة في اللي هقوله، بس أنا وفقت عليك عشان شوفت الفرحة في عيون بابا. أتمنى تفهمني، أنا عارفة إنك اتجوزتني عشان شفقت عليا، بس أحب أطمنك، كلها شهرين تلاتة ونطلق. أنا هنام في الأوضة بتاعت الأطفال.
حمزة بحزن رد عليها: اللي يريحك يا حورية، بس نامي انت في الأوضة التاني وأنا هنام في بتاعت الأطفال. تصبحي على خير.
سابها ودخل الأوضة وهو دموعه على خده. عندها حق يا حمزة، مهو محدش يصدق إنك وقعت في حبها. نام بعد تفكير وتعب.
إنما حورية كانت بتصلي ودمعها نزل. يارب، أنا راضية بقضائك، بس حمزة ملهوش ذنب يعيش مع واحدة خرسة، هو يستاهل واحدة أحسن مني. فضلت تدعي كتير لحد ما نامت مكانها.
تاني يوم الصبح، جرس الباب بيرن. حمزة قام من النوم، كان هيفتح بس افتكر حورية، رجع الأوضة تاني، رتبها وراح يصحي حورية.
حمزة: حورية، يا حورية.
حورية اتخضت.
حمزة: اهدي، تقريبًا باباكي وأختك بره وماما معاهم. يلا اصحي علي ما أفتح الباب.
حورية هزت دماغها بمعنى تمام.
حمزة فتح الباب ودخلوا.
خالد: مبروك يا عريس.
حمزة: الله يبارك فيك يا عمي.
خرجت حورية.
مامت حمزة: تعالي يا مرات ابني يا غالية.
حورية ابتسمت وحضنتها.
حمزة: اعرفك يا حورية، دي عمتي وبنتها سارة.
حورية سلمت عليهم بس متكلمتش.
عمت حمزة: هي مالها؟ مش بتتكلم ليه؟
سارة بضحك: أصلها خرسة يا ماما.
حمزة بعصبية: سارة، مسمحلكش تقولي على مراتي كده.
عمت حمزة: هي يعني قالت حاجة غلط؟ ما هي فعلًا خرسة.
حمزة: طب اتفضلوا اطلعوا بره بيتي.
عمت حمزة: يلا يا بت، ادي آخرتك اللي يجي للناس، متستهلش.
حورية كانت واقفة ودمعها على خدها.
حمزة قرب منها وأخدها في حضنه: آسف يا حورية، متزعليش منهم.
حورية مسحت دمعها وهزت دماغها بمعنى تمام. دخلت أوضتها فضلت تعيط كتير أوي لحد ما نامت.
مامت حمزة: متزعلش يا ابني من عمتك، انت عارفها وعارف كلامها.
حمزة: مكنش ينفع اللي حصل ده يا ماما، دي مهما كان مراتي، واللي يمسها يمسني.
مامت حمزة: ربنا يهدي سركم يا حبيبي. أنا هنزل بقى وانت راضي مراتك.
حمزة: حاضر يا ماما.
حمزة فضل يخبط على الباب لحد ما حورية سمعت وصحيت.
حمزة: آسف يا حورية إني صحيتك، بس كنت عايز أتكلم معاكي شوية.
حورية هزت دماغها بمعنى ماشي. خرجت حورية وقعدت، شاورت بإيديها بمعنى ايه؟
حمزة: متزعليش من اللي حصل، حق على قلبي.
حورية جابت ورقة وكتبت فيها: مش زعلانة، خلاص اتعودت على الكلام ده.
حمزة: من النهاردة مش هسيبك زعلانة. بس هو يعني.. يعني كنت عايز أعرف انت مولودة كده ولا ايه حصلك؟
حورية بصتله ودمعها نزلت.
حمزة: اهدي، أنا آسف، خلاص متحكيش طالما هتعيطي. هروح أجيبلك ماية وأجي.
حورية مسكت إيده وكتبت: هحكيلك، اقعد.
حمزة قعد وبصملها.
حورية كانت بتكتب في ورقة: زمان وأنا صغيرة، ماما ماتت وأنا كنت واقفة وشوفت العربية وهي بتخبطها. صرخت كتير أوي عشان حد ينقذها، ملقيتش حد. ماتت بين إيديا. صدمتي وقتها كانت كبير، لأني كنت متعلقة بماما، بس هي راحت مني وأخدت كل حاجة حلوة. وساعتها أنا دخلت في صدمة 3 شهور، بس بعد عرفت إني اخرست ومش هعرف أتكلم. بابا أخدني عند دكاترة كتير، بس أنا كنت محتاجة ماما جنبي.
حمزة قرأ الورقة وقالها: حورية، من النهاردة مفيش زعل، كل اللي جاي فرح وبس. ويلا بقى اعملي فشار وتعالي نتفرج على كارتون.
ابتسمت حورية ودخلت تعمل فشار، وحمزة شغل الكارتون.
