سارة: اتفضل اطلب.
يوسف: نبقى صحاب.
سارة: نعاااام؟ نبقى إيه؟ أصحاب! لأ طبعًا.
يوسف: لا، انتي فهمتيني غلط. قصدي اعتبريني زي أخوكي الكبير، مش أكتر. ولو احتجتي حاجه قوليلي، ولا أقولك اعتبريني زي فرح.
سارة: لو زي فرح يبقا ماشي، مع إن فرح أحلى طبعًا.
يوسف: قصدك إني وحش يعني؟
سارة: لأ… آه.. عادي يعني.
يوسف: أول واحده تقولي عادي دي، بس مش مشكله هعديها.
فرح: بتتكلموا في إيه من ورايا أنا وهي؟ هههههه.
يوسف: اتفقنا أنا وسارة، مفيش خناق وهنبقا أصحاب.
فرح: أحلى خبر ده، ولا إيه؟ هههههههههههه.
قعدوا يتكلموا مع بعض شويه عن المحاضرات والدراسه.
يوسف: أنا هستأذن عشان أروح الشركه، لو احتاجتوا حاجه اتصلوا بيا.
فرح: متشكرين يا زوق. ههههه.
الكل: ههههههههههههههه.
الحلقة السابعة
عدت سنه، ويوسف وسارة وفرح بقوا أصحاب جدًا. يوسف اتخرج من الكليه وبيدير الشركة، بس مفيش مانع إنه لسه بيروح عشان يقعد مع فرح وسارة. سارة وفرح نجحوا بتقدير امتياز وراحوا سنه تانيه. وطبعًا أهل سارة كانوا مستمرين في الضغط على سارة إنها ترتبط بأي عريس من اللي كانت بتجبهم جارتهم على أمل إن سارة تنسى قاسم.
لحد ما جه يوم، فرح كانت تعبانه ومنزلتش الكليه، وسارة راحت لوحدها ودخلت المحاضره. لقت شاب، نادر، شاب غني ومستهتر، لسه ناقل من هندسة إسكندرية لهندسة القاهرة، سنه تانيه، مشهور بمغامراته مع البنات وبغروره الزايد عن الحد، جه قعد جمبها وبدأ يتكلم معاها.
نادر: انتي اسمك سارة صح؟
سارة: افندم؟! وانت يخصك في إيه اسمي؟
نادر: عادي يعني، بنتعرف. أنا اسمي نادر.
سارة: وأنا مش عاوزه أتعرف على حد.
نادر: مش نادر اللي حد يقوله لأ، فوقي لنفسك يا حلوه.
سارة بصتله بغيظ سبته وهي في قمه غضبها وخرجت، وكلمت يوسف في التليفون وطلبت منه يجي ضروري. وقالها تستناه في الكافتريا. وبعد دقايق قصيره وصل يوسف.
يوسف: خير يا سارة؟ إيه اللي حصل؟
سارة: واحد قعد يضيقني في المحاضره، فقومت وسبت المدرج واتصلت بيك.
يوسف: متضيقيش نفسك بس، أنا هقوم أجيبلك حاجه تشربيها عشان تهدي.
يوسف راح يجيب عصير وساب سارة قاعده لوحدها على التربيزه. وفجأه لقت نادر واقف قدمها.
نادر: بقا حته بت زيك تنفضلي أنا وتسبيني وتمشي؟
سارة: انت مين أصلًا عشان تكلمني كده؟
يوسف شافهم من بعيد فراح جري عليهم وسمع سارة بتزعق وصوتها عالي.
يوسف: في إيه يا سارة؟ بتزعقي ليه؟
نادر: هو ده حبيب القلب اللي نفضتيلي عشانه؟
سارة: اخرس يا حيوان.
يوسف: امشي من هنا يا عم الأمور، ولو كلمتها تاني مش هخليك تعرف تتكلم بقيت حياتك.
نادر: ما تهدي حبيب القلب يا سوسو، وقوليله إن مش نادر اللي يتهدد.
يوسف: صدقني انت لو ممشيتش من هنا مش هيحصلك خير.
نادر: هتعمل إيه يعني؟ اللي عندك اعمله، أنا……
ملحقش نادر يكمل كلامه، لقى يوسف نزل عليه ضرب لحد ما طحنه، وفصل بينهم الأمن واخدهم على مكتب العميد.
العميد: ممكن أفهم إيه اللي حصل ده؟
نادر: يا دكتور، أنا واقف بتكلم معاه لقيته نزل فوقي ضرب.
العميد: أنا مكنتش أتوقع منك كده يا يوسف.
يوسف: كداب يا..
العميد: مش عاوز كلام كتير، اللي حصل ده ميتكررش، وأنا ليا كلام مع د.هشام يا يوسف.
خرجوا من أوضه العميد، ويوسف كان متعصب جدًا، ونادر قرر إنه هيرد ليوسف وسارة القلم قلمين.
سارة: أنا آسفه يا يوسف على اللي حصلك كل ده بسببى.
يوسف: متعتذريش يا سارة، انتي مالكيش ذنب، هو اللي يستاهل اللي حصله.
سارة: طب انت هتعمل إيه دلوقتى؟
يوسف: هرجع الشركه عشان ورايا شغل.
سارة: معلش يا يوسف، عطلتك معايا.
يوسف: بلاش الكلام اللي بيضيقني ده. المهم انتي وراكي هتعملي إيه دلوقتى؟
سارة: أنا هروح، أنا مش هقدر أقعد وأشوف البني آدم ده تاني.
يوسف: خلاص، تعالى معايا أوصلك وأطلع على الشركه.
سارة: لا متتعبش نفسك، أنا هركب تاكسي من هنا.
يوسف: مش فاكره آخر مره قولتي الجمله ديه حصل إيه؟
سارة: ….
يوسف: يلا بينا يا سارة، ربنا يهديكي. وبعدين اعتبريني سواق تاكسي عشان مش مستعد أتخانق مع حد تانى.
سارة: خلاص ماشي، بس بشرط.
يوسف: كمان هتتشرطي؟ ماشي، قولي يا ستي.
سارة: هتاخد الأجره. ههههههههه.
يوسف: لا، دا انتي صدقتي نفسك بجد ومتخيلاني سواق تاكسي.
سارة: خلاص يا عم، بهزر معاك.
ركبت سارة مع يوسف ووصلها لحد البيت، وأول ما دخلت الشقه راحت على أوضتها وكلمت فرح في التليفون وحكت لها اللي حصل.
فرح: كل ده حصل عشان مجاش يوم واحد بس؟ أمال لو غبت أسبوع هتعملوا إيه من غيرى؟
سارة: ماشي يا ستي المهمه، بكره هتيجي أكيد عشان أنا مش هروح لوحدى.
فرح: إن شاء الله.
جه باليل، ويوسف رجع من الشركه ولقى باباه مستنيه في البيت.
