د. هشام: حمد الله على السلامه يا يوسف بيه.
يوسف: الله يسلمك.. مالك يا بابا؟ فيك حاجه؟
د. هشام: ممكن أفهم إيه اللي حصل النهارده في الكليه واتخنقت ليه؟
يوسف: سوء تفاهم بسيط وراح لحاله.
د. هشام: سوء تفاهم يخليك تمسك زميلك تضربه! وانت من امتى بتتخانق مع حد؟ طول عمرك عاقل وبتتحكم في أعصابك. إيه السبب اللي خلاك متعرفش تسيطر على أعصابك؟
يوسف: متشغلش بالك يا بابا، مشكله بسيطه واتحلت خلاص.
وجه تاني يوم، وراحت سارة الكليه وقابلت فرح ودخلوا المدرج، وهي بتتمنى إنها متشوفش اللي اسمه نادر ده، بس مش كل حاجه بنتمناها بتحصل. بعد ما دخلوا قاعدوا، لقوا نادر وقف جنب سارة وكلمها بهدوء.
نادر: صدقيني يا سارة، لو معتذرتليش انتي والواد بتاعك قدام الناس كلها هخليكي تندمي.
سارة: أعتذر لمين؟ ليك انت! دا مستحيييل، انت ليك عين تتكلم أصلًا.
نادر: والله لأخليكي تندمي يا سارة.
سارة: أطول ما في خيلك اركبه.
نادر: ماشي يا سارة، بس افتكري إني حذرتك.
عدى أسبوع على الموقف ده، سارة داخله الكليه وشايفه الطلبه كلها بتبص عليها وبتتكلم واللي يبص عليها ويضحك، وهي مستغربه من كل اللي بيحصل. لحد ما وصلت للمكان اللي واقف فيه يوسف وفرح، وكانوا واقفين بيبصوا في الموبيل ومتنحين.
سارة: فيه إيه يا جماعه؟ انتو واقفين كدا ليه؟ وبتتفرجوا على إيه؟ ورونى.
فرح: لا مفيش حاجه يا سارة، دا صوره كنت باخد رأيي يوسف فيها.
سارة: صوره؟! ومالك متوتره كدا ليه؟! طب وريني الصوره وأنا أقولك.
فرح: لا خلاص، مسحتها عشان وحشه.
سارة: وريني الصوره يا فرح، بدل ما أشوفها غصب عنك.
فرح: قولتلك مسحتها يا سا…
مكملتش كلامها، وكانت سارة شدت منها الموبيل وشافت اللي عليه. وفجأة وقعت على الأرض مغمى عليها. حاولوا يفوقوها بس مبتفوقش. شالها يوسف ووداها العربيه مع فرح وطلعوا على المستشفى.
الحلقة الثامنة
دخلوا المستشفى، ويوسف شايل سارة وبيجري. الدكاتره دخلوها الأوضه وحاولوا يفوقوها، وطلعوا يوسف وفرح بره.
فرح: وبعدين؟ هنعمل إيه في المصيبه ديه؟
يوسف: مش عارف، مش قادر أفكر، أنا خايف على سارة أوى.
فرح بعياط: يارب سارة مش ناقصه صدمات، يارب. دي تعبت أوى يارب.
يوسف: الصور اللي شافتها بالمناظر اللي فيها صعب إن حد يستحملها، وخصوصًا إنها بنت وهتضر بسمعتها.
فرح: أموت وأعرف مين اللي ركب الصور ديه.
الصور كانت عباره عن سارة ويوسف في مناظر مش لطيفه، مره يوسف ماسك إيد سارة، وصوره وهو بيبوسها، وصور تانيه كتير في مناظر وحشه، وبعتها لكل الطلبه.
يوسف: أنا عارفه وهندمه على اليوم اللي اتولد فيه.
فجأه سمعوا صوت صريخ سارة خارج من الأوضه، دخلوا يجروا.
فرح: أهدي يا سارة، متخافيش.
سارة: أنا ليه بيحصل معايا كده؟ لو قاسم كان عايش مكنش حصل كده. أنا عاوزه أروحله، سيبونى أنا مش عاوزه أعيش.
يوسف: اهدي يا سارة، متعمليش في نفسك كده.
سارة: اخرس خالص، انت مش حاسس باللي أنا فيه. أنا مش عاوزه أسمع حد.
سارة كانت في حاله جنون بتصرخ وتعيط وشدت المحلول من إيدها، ومهديتش غير لما الدكتور أداها حقنه مهدئه.
الدكتور: سيبوها تستريح، هي هتنام دلوقتى.
فرح: هي هتفضل هنا كتير؟
الدكتور: لا طبعًا، ممكن تطلع في أي وقت. لأن مشكلتها مش جسمانيه، مشكلتها نفسيه. هي خدت صدمه كانت كبيره وأعصابها مستحملتهاش.
فرح: طب إيه العلاج اللي محتجاه؟
الدكتور: هي معندهاش حاجه عضويه زي ما قولتلك، كل اللي عندها إن نفسيتها تعبانه، ولازم تبعد عن أي ضغط.
قعدوا أربع ساعات في المستشفى لحد ما سارة فاقت تاني، بس المره دي كانت أهدى، بس مكنتش بتتكلم ولا بترد على حد.
فرح: سارة، يلا بينا أوصلك على البيت عشان محدش يقلق عليكي، وخدي أسبوع أجازه استريحي فيه. ومتقلقيش من أي حاجه حصلت، كل حاجه هتتحل. ومتجبيش سيره لأهلك عشان ميقلقوش.
هزت سارة دماغها، يعني موافقه. وصلتها فرح لحد البيت وطلعتها ودخلوا.
أم سارة: مالك يا سارة؟ فيكي إيه؟ شكلك تعبان.
فرح: مفيش يا طنط، هي تعبت شويه في الكليه والدكتور قال لازم ترتاح.
أم سارة: تعبت! تعبت ازاي؟ دي نازله الصبح وهي كويسه.
فرح: أغمى عليها فجأه. المهم دلوقتى، سبوها ترتاح.
أم سارة: شكرا يا بنتي، تعبناكي معانا.
فرح: لا شكر على واجب يا طنط، سارة ديه أختى.
يوسف بعد ما نزل من المستشفى، ركب عربيته وساقها بسرعه جنونيه لحد ما وصل الديسكو اللي بيسهر فيه نادر وشلته كل يوم. وأول ما شاف نادر مسكه ضربه، وحصلت بينهم مخانقه كبيره، وانتهت بنادر كل مكان في وشه بيجيب دم وإيده مكسوره غير جروح في جسمه. يوسف برضو مسلمش من الجروح، اتعور حاجات بسيطه بالنسبه لجروح نادر.
يوسف: المره ديه سبتك عايش، المره الجايه هقتلك، فاهمنى؟
نادر بتعب: شكل المفاجأة معجبتكش؟ اوعى تقول إن الصور وحشه، دا أنا دافع فيها كتير.
يوسف: بني آدم زباله، متستحقش الواحد يتف في وشك.
خرج يوسف وراح على الفيلا، وحاول يتصل بسارة بس مردتش. وصل الفيلا وطلع أوضته على طول، وقعد يفكر بفكر حل للمصيبه اللي حصلت.
سارة فضلت قاعده في البيت أسبوع مش بتخرج من أوضتها، وفرح كانت كل يوم تكلمها تطمن عليها
