يوسف وهو بيقف: اقعدي انتي وصاحبتك هنا وأنا هشوفلي أي مكان أو هقف عادي.
سارة: لا خليك في مكانك واحنا هنتصرف.
يوسف: أنا موجهتلكيش كلام، أنا بكلم فرح. هتقعدوا ولا هتفضلوا واقفين كتير؟
فرح: يلا يا سارة نقعد، الدكتور خلاص دخل ومفيش مكان.
قعدت فرح وسارة مكان يوسف، ويوسف فضل واقف طول المحاضره. وخرجت سارة وفرح من المحاضره.
فرح: أوف، إيه المحاضره الطويله ديه؟ والدكتور سريع أوى ملحقتش أكتب كلمه وراه.
سارة: متقلقيش، أنا كتبت كل حرف، ابقي انقليها مني.
فرح: طب يلا بينا أوصلك وأروح عشان الوقت اتأخر.
راحوا عند عربيه فرح وركبوا، بس العربيه مش راضيه تدور.
فرح: وبعدين هنعمل إيه؟ العربيه عطلت.
سارة: تعالى نركب تاكسي.
واقفوا يستنوا تاكسي يعدي، بس مفيش ولا تاكسي. يوسف لمحهم من بعيد واقفين، فراحلهم يشوف في إيه.
يوسف: في إيه يا فرح؟ انتو واقفين كده ليه؟
فرح: عربيتي عطلت وواقفين مستنين تاكسي.
يوسف: طب تعالوا معايا أوصلكم.
فرح: طب يلا يا سارة نركب مع يوسف.
سارة: لا، اركبي انتي، أنا هقف استنى تاكسي.
يوسف: مش هتلاقي تاكسي دلوقتي.
فرح: يوسف عنده حق يا سارة، مش هتلاقي تاكسي. يلا بقا عشان منتأخرش.
سارة: لو وصلت إني آخدها مشي مش هركب معاه.
يوسف: براحتك، أنا عملت اللي عليا. يلا يا فرح، هتركبي ولا هتمشى مع صاحبتك؟
فرح: لا يا يوسف، أنا مش هسيب سارة لوحدها، هقف معاها لحد ما نلاقي تاكسي.
يوسف: براحتكم، يلا سلام.
مشي يوسف بعربيته، وسارة وفرح واقفين مستنيين تاكسي يعدي، لحد ما عربيه عدت وكان فيها شباب. لما شافوهم لوحدهم قربوا عليهم و…
الحلقة السادسة
نزلوا 3 شباب من العربيه وقربوا منهم.
الشاب1: الجميل واقف هنا مستني مين؟
الشاب2: لو اللي مستنينه مش جاي، احنا هنقوم بالواجب.
الشاب3: هو فيه حد يسيب الجمال ده كله في الشارع؟
سارة: امشي يا حيوان انت وهو من هنا.
الشاب1: وليه الغلط دا؟ احنا هنبسطك يا جميل.
سارة ضربت الشاب بالقلم، وكان لسه هيضربها لقى يوسف مسك إيده وضربه في وشه.
لما يوسف ركب العربيه ومشي، لف ورجع من الشارع التاني ووقف بعيد يراقبهم لحد ما تاكسي يجي. وعدى وقت ويوسف كان مشغول وبيتكلم في التليفون، وفجأه سمع صوت سارة عالي وبتزعق مع حد. نزل من العربيه يجري.
يوسف اتخانق مع ال3 شباب بالرغم من إنهم أكتر منه، إلا إنه ضربهم كلهم وجريوا من قدامه.
يوسف: هتفضلوا واقفين بتبصولى كتير؟ يلا عشان أوصلكم ولا مستنين تتخطفوا المره دى؟
فرح: يلا يا سارة، كفايه اللي حصل لحد كده، واعتبريه سواق تاكسي.
يوسف: أخرتها أبقى سواق تاكسي؟ يلا مش مشكله.
ركبت فرح جنب يوسف، وسارة ركبت وراه وقالتله على العنوان. وصل سارة الأول واستنوا لحد ما طلعت بيتها ومشيو.
سارة دخلت البيت ولقت مامتها وباباها قاعدين في الصاله.
أم سارة: إيه اللي أخرك لحد دلوقتي يا بنتي؟ احنا كنا هنتجنن عليكي وتليفونك مقفول.
سارة: معلش يا ماما، عربيه فرح عطلت ووقفنا استنينا تاكسي…. وحكت سارة كل اللي حصل لباباها ومامتها.
محمد: كويس إن زميلكم ده كان موجود، لولا وجوده مكنش حد عارف كان حصلكم إيه.
سارة: الحمد لله إننا رجعنا بالسلامه.
أم سارة: لما يكون عندكم محاضرات متأخر، ابقي قولي لباباكي وهو يجي يخدك.
سارة: حاضر يا ماما.
محمد: ابقي اشكريلي زميلك على اللي عمله معاكي.
سارة: مفيش داعي يا بابا، أي حد مكانه كان هيعمل كده.
أم سارة: لازم نشكره برضو يا بنتي، اللي عمله مش قليل. ابن حلال والله.
سارة: طب أنا هدخل أغير هدومي وأذاكر وبعدين أنام.
دخلت سارة الأوضة وفضلت تذاكر لحد ما لقت رقم غريب بيتصل عليها.
سارة: ألو.
المتصل: ألو، دا تليفون سارة؟
سارة: أيوا، حضرتك مين؟
المتصل: أنا يوسف.
سارة بغضب: يوسف… انت جبت رقمي منين؟ واتصلت عليا ليه؟ وعاوز إيه؟ اوعى تكون فاكر موقف الشهامه يخليك تفكر إنك تتصل بيا في وقت زي دلوقتي.
يوسف: إيه؟ براحه، كل ده عشان اتصلت؟ أنا جبت رقمك من فرح.
فلاش باك… في العربيه
يوسف: فرح، انتي كتبتي محاضره النهارده؟
فرح: لا مكتبتش، الدكتور كان سريع أووى وملحقتش أكتب وراه.
يوسف: أنا كنت عاوز المحاضره عشان أذاكرها، انتي عارفه إنها مهمه.
فرح: سارة صحبتي كتبت كل حاجه.
يوسف: طب هاتيلي رقمها، اتصل عليها أقولها تجيبلي المحاضره بكره.
فرح: رقمها……
الوقت الحالي
سارة: وعاوز مني إيه؟
يوسف: عاوز محاضره النهارده، فرح قالتلي إنك كتبتيها.
سارة: وانت مكتبتهاش ليه؟
يوسف: أظن إنك لسه فاكره إني وقفت طول المحاضره عشان حضرتك مكنتيش لاقيه مكان وقعدتك مكاني.
سارة: انت هتذلني يا عم؟ خلاص هجبلك المحاضره بكره.
يوسف: هستناكى الساعه 11 في الكافتريا.
جه تاني يوم، وراحت سارة الكليه وقابلت فرح وحضروا أول محاضره وخرجوا وراحوا على الكافتريا يفطروا لحد ما جت الساعه 11 وجه يوسف.
يوسف: اللي ياكل لوحده يزور.
فرح: حماتك بتحبك يا جو، تعالى افطر.
يوسف: شكرا، أنا أكلت قبل ما أنزل. أنا جاي آخد المحاضره.
فرح: طب أنا هقوم أجيب حاجه نشربها، تطلبوا إيه؟ ولا أقولكم أنا هجيبلكم مانجا، أنا عارفه إنكم بتحبوها.
مشيت فرح وقعد يوسف مكانها.
يوسف: أخيرا في حاجه بتحبيها.
سارة: المحاضره أهيه، اتفضل. محتاج حاجه تانى؟
يوسف: شكرا.
سارة: صحيح، أنا كنت عاوزه أقولك شكرا على اللي عملته معايا امبارح، وآسفه كمان على إني خبطت فيك، مكنش قصدي والله.
يوسف: مفيش مشكله، أنا نسيت الموضوع أصلًا. بس عندي شرط.
سارة: كمان هتتشرط عليا؟
يوسف: اعتبره طلب.
