— مالك؟ حاسة بأيه؟
— متقلقش، هرتاح شويه وهبقي كويسة.
— طب استني بس هقولك.
طلعت بسرعة الأوضة وقفلت على نفسها.
حطت إيديها على قلبها بخوف: — لأ لأ، أكيد مش كل حاجه هتنتهي بالسهولة دي. بس… بس دا خلاص جه، هو كان متفق معايا إنه أول ما ييجي هيقول لحمزة عن كل حاجة، لو مكنتش قولتله بنفسي.
بعياط قعدت ورا الباب وهي محاوطة رجليها بإيديها: — يارتني مشيت من زمان. دا اليوم اللي كنت خايفة منه، خلاص مبقاش فيه أعذار ولا حجج. هيعرف، يعني هيعرف. مش قادرة أتخيل ردة فعله ولا إحساسه ناحيتي لما يعرف إني اا… إني مش بنت. يارتني كنت موت لما جده خبطني، زي اللي في بطني مات وارتاحت.
من تلات شهور
— ايه يا وعد؟ مش كفاية لحد كدا ولا ايه؟ بقالك شهرين قاعدة في السكن مبتنزليش المستشفي، أجازتك خلصت من أسبوع، كدا هتترفدي.
— يبنتي طب عرفيني مالك. أنتي لا بقيتي تتكلمي معانا ولا بتقعدي معايا أنا والبنات زي الأول، دايما قاعدة في أوضتك وقافلة على نفسك. أحكيلي يا حببتي، فيكي ايه؟
بملامح باهته وهالات سودة تحت عيونها من الحبسة والإكتئاب: — عاوزة أفضل لوحدي.
— وعد، مش انا صحبتك واا…
قاطعتها بخنقة: — قولت عاوزة أفضل لوحدي، اطلعي برا.
تاني يوم
— اااه، بطني، يا ساره ألحقينيي.
فتحت الباب وهي ماسكة بطنها بألم، ملقتش حد من اللي معاها في السكن، كلهم في الشغل.
بوجع: — اااه، مش قادرة، همووت.
فتحت الباب ورنت جرس الجيران علشان حد يساعدها، أول ما الباب اتفتح وقعت وعد في الأرض مغمي عليها.
— ماماااا، الحقيني، اطلبي الاسعاف بسرعة.
في المستشفي
— الحمد لله على سلامتك.
— هـ هو فيه ايه؟
— أبدا، يستي أنتي زي الفل.
بصوت خافت: — انا تعبانة أوي، حاسة جسمي كله مكسر.
— دا طبيعي لأن عندك أنيميا شديدة، ومع الحمل جسمك مقدرش يستحمل.
— أييييه، حامل!!!
— انتي مكنتيش تعرفي ولا ايه؟ دا انتي حامل في شهرين. على العموم ألف مبروك، تقدري تخلصي المحلول اللي في إيدك دا وتروحي، بس لازم تتغذي كويس والأدوية في معادها، والأحسن تتابعي مع دكتور نسا. عن إذنك.
انهارت وعد وهي حاطة إيديها على بوقها ودموعها نازلة بقهرة، حطت إيديها على بطنها وهي بتحسس عليه بعياط وبتفتكر اللي حصلها.
— لالا، مستحيل، أنا أكيد بحلم.
ضربت بطنها جامد فصرخت بألم: — اااه، يارب خدني، أنا خلاص مبقتش قادرة أعيش.
شالت الإبرة من إيديها وهي بتقوم بتعب، مش شايفة كويس بسبب عياطها المستمر.
خرجت من الأوضة وبعدها على الشارع وهي ماشية دموعها على خدها، بتفتكر اليوم بتفاصيله ونظرته ليها وهو بيقولها: “افتكري شكلي دا كويس، علشان لو طلعتي من هنا عايشة، هيفضل ملازمك طول حياتك.”
— حاسب يا حسن، دوس فرامل بسرعة، حاااسب.
نزل سالم، جد حمزة، لقاها واقعة في الأرض غرقانة في دمها مبتتحركش، خدها بسرعة على المستشفي. دخلت العمليات في وقتها، وبعد ما فاقت عرفت إن الجنين نزل. كان سالم معاها في الوقت دا وطلب منها يساعدها وياخدها بيته بعد ما عرف حكايتها.
فاقت وعد من سرحانها على خبط الباب.
مسحت دموعها بسرعة: — مين؟
— انا يا هانم.
— عاوز ايه؟
— حمزة بيه قالي أجيب الدوا دا من الصيدلية لحضرتك.
بصوت مخلوط بالبكاء: — سيبه عندك وأمشي.
قامت من على الأرض وهي بترشف: — أنا لازم أتكلم معاه وأعرف هو ناوي على ايه.
— كان لازم تيجي دلوقتي يا جدي. يا الله، أنا حاسس إن تعبي طول الفترة دي راح في الهوا. دا أنا رفضت أفاتحها في أي حاجة من اللي عرفتها لحد ما تثق فيا وتعرف إني مستحيل أسيبها. نظرتهم لبعض خلتني أخاف أكتر. ياتري وراكي ايه يا وعد؟ وحكايتك ايه مع جدي؟
بص على لبسه في المراية: — ولابس ومتشيك بعد حبسة أسبوع علشان نخرج، وفي الآخر مفيش. لو أعرف بس مين اللي باصصلي في حياتي كدا.
بالليل، في أوضة المكتب
الباب بيخبط.
— مين؟
— ااا أنا وعد، ممكن أدخل؟
— تعالي يا وعد.
دخلت وهي عمالة تفرق في إيديها بتوتر.
بإبتسامة: — أقعدي، واقفة ليه؟ أنتي عارفه أنا قلقت عليكي الفترة اللي فاتت دي قد ايه.
— أنا أسفة، بس التلفون ااا…
قاطعها وهو بيخلع النظارة الطبية: — عارف ومقدر اللي أنتي فيه، وعارف أنتي جاية ليه دلوقتي، بس مينفعش تنسي أتفقنا.
بدموع تراكمت في عيونها: — أنا عارفة إنك ساعدتني كتير، وإنك مكنتش مضطر أبدا لدا. فتحتلي بيتك وعاملتني أحسن معاملة، لو كان ليا أهل مكنوش عملوا معايا ربع اللي عملته أنت، بس أنا اا…
— أنتي ايه يا وعد؟
— مقدرتش ومش هقدر، اللي حصل صعب عليا أنساه ولا حتي أتخطاه لحد دلوقتي. تفتكر حمزة هيقدر يتقبله!
— أنا شايف إنه متعلق بيكي وحبك بجد، وأعتقد إنك أنتي كمان نفس الحكاية.
بصت في الأرض بقهرة: — الحب مش كل حاجه. أنا بسبب شيطان في شكل إنسان انتهيت، وانتهت حياتي كلها. أول مرة بعدها حسيت إني لسه عايشة لما حبيته، حسيت إني اتولدت من جديد. مش هقدر أقوله وأظلمه معايا، أنا كدا بحطه قدام الأمر الواقع.
— خلاص، هقوله أنا.
قامت بخوف: — لااا، أبوس إيدك. دا هو الحاجة الوحيدة اللي في حياتي حسيت إني عايشة بسببها. بدموع: خليه يطلقني وأنا هبعد عنه خالص، أو قوله إني مت. قوله أي حاجة بس علشان خاطر ربنا، سبني أفضل نظيفة في عينيه.
— بالسهولة دي هتتخلي عن حبك ليه!!
