بصت حواليها ملقتش حد خالص، والبرق شغال، وحمزة جسمه بيترعش جامد.
بعياط وهي بتحاول تمسك نفسها من الخوف: — لأ، أنا لازم أتصرف، لازم يروح لدكتور بسرعة.
جمعت كل قوتها، حطت دراعه حولين رقبتها وسندته لحد ما وصلوا الشاليه، دخلته الصالون وقفلت كل الأبواب والشبابيك كويس، شغلت الدفاية وهي بتجري في كل حتة بسرعة بتحاول تعمل أي حاجة علشان يفوق.
طلعت بسرعة جابت قميص وبنطلون ليه وفوطة دافئة، بدأت تملس على جسمه وتنضفه من الرمل، وبعدها بدأت تلبسه.
حمزة مكنش فاقد الوعي كليا، هو كان مجهد لدرجة مش قادر يتحكم في أعصابه ولا يتحرك لوحده من البرد والتعب.
قفلت زراير القميص ورأسه سانده على كتفها، وبعدها نيمته على الكنبة وراحت بسرعة تعمله حاجة ساخنة يشربها.
— حمزة، مفيش هنا غير شاي، معلشي بقي، أهو حاجة ساخنة وخلاص.
سندته لحد ما قعد وشربته واحدة واحدة بالملعقة لحد ما خلصت، لقت حرارته بدأت ترتفع.
— يا ربي، أعمل أيه؟ أنا حتي ممعييش تلفون أتصل بجده يبعتلنا دكتور، ومعرفش تلفونه فين.
خدت نفس وهي بتترعش: — أهدي يا وعد، أنتي ممرضة برضو، لازم تتصرفي. هو أكيد مش هيحصله حاجة، أنا واثقة في ربنا.
طلعت بسرعة جابت تيشرت وميه من التلاجة، وبدأت تعمله كمادات طول الليل. بعد تلات ساعات الحرارة بدأت تنزل وجسمه ياخد حرارته الطبيعية، مسكت إيده وهي قاعدة جنبه على الأرض، سندت رأسها على الكنبة اللي نايم عليها وراحت في النوم.
تاني يوم
فاق حمزة وجسمه بيترعش، صحيت وعد على رعشت إيده اللي كانت حضناها، فرقت في عينيها بنعاس: — حمزة، حاسس بأيه؟
عطس بقوة ومناخيره بدأت ترشف، شاورلها إنه عاوز يقوم، فسندته وحطت مخده ورا ضهره، قعد.
— حمزة، أحنا لازم نمشي من هنا، نروح أي مستشفي، أنت تعبان.
عطس تاني بتعب: — مفيش داعي، دول شويه برد.
— على الأقل لازم دكتور ودوا. يالا بالله عليك، لازم نمشي من هنا وبسرعة.
طلعت جابت حاجتها ومفتاح العربية، سندته لحد العربية ركبته جنب كرسي السواقة.
— بتعملي ايه؟ أمال مين اللي هيسوق؟
— متخفش، أنا بعرف أسوق.
بتعب: — أنتي متأكدة!
— ثق فيا، متقلقش.
— أنا خايف عليكي أنتي، مش على نفسي.
مسكت إيده بحب: — أنا معاك.
ظبطت الطريق على الـGPS وبدأت تسوق وحمزة نايم جمبها من التعب، كل شويه تبص عليه.
— حمزة، دا طريق فيلا جدك!!
بصوت خافت: — أيوا، هو.
— طب ليه هنروح هناك؟ أحنا عاوزين دكتور.
— نوصل هناك وأي حد منهم هيطلب دكتور، أنا معرفش دكاترة هنا، مبجيش كتير.
— بس أنا أعرف دكاترة كويسين.
— قربنا نوصل، متقلقيش.
بعد ساعة
— عنده دور برد شديد مأثر على أعصابه، هكتبله على محاليل ياخدها بانتظام، واحد دلوقتي والتاني بالليل.
— حاضر يا دكتور.
— الدوا دا ياخده تلات مرات في اليوم.
— تمام يا دكتور.
— ألف سلامة عليه.
— متشكرة يا دكتور، اتفضل.
جابت كرسي وقعدت على سريره: — ينفع كدا اللي عملته في نفسك دا؟
بإبتسامة: — أنا طول عمري بحب أنزل البحر في الشتا، مش عارف، فجأة مكنتش قادر أخد نفسي ليه وأنا في الميه.
عطس.
— دا جو إسكندرية يا أستاذ، وعاملي فيها تمساح نص الليل، وهنزل دلوقتي الميه وبتاع، مش قد بحر إسكندرية بتنزلوه ليييه.
عطست هي كمان بقوة ومناخيرها رشفت.
— ااه، ياني عاجبك كدا أهو، شكلي هتعب أنا كمان. أنا هقوم أعملك طبق شوربة لسان عصفور يظبطك، كل دا.
حمزة فضل تحت الرعاية أسبوع، في الأسبوع دا بدأت صحته تتحسن وعلاقته بـ وعد بتقوي. سحر عرفت إنه لقاها ورجعوا على فيلا إسكندرية، فرحت أوي، وفريد وصله الخبر، كان عاوز يروح يطمن عليه بسرعة بس الشغل منعه.
— يالا بقي علشان نطلع نشم شوية هوا، كفاية حبسة أسبوع دي.
— يااه، أخيرا. متنسيش الجاكت.
بتريقة: — أمم، جاكت دلوقتي؟ من أسبوع كان مايوه وفاردلي عضلاتك.
ضيق عنيه بغيظ: — حاسك بتتريقي، إحساسي دا صح!
ضحكت ومسكت في دراعه: — دا كان أحلي يوم في عمري كله.
نزلوا على السلم ماسكين إيد بعض وبيضحكوا، ولسه هيطلعوا فجأة وقفوا بتفاجئ: — جدي!!
تلاشت فرحة وعد أول ما شافته وسابت إيد حمزة.
البارت 13
نزلوا على السلم ماسكين إيد بعض وبيضحكوا، ولسه هيطلعوا فجأة وقفوا بتفاجئ: — جدي!!
تلاشت فرحة وعد أول ما شافته وسابت إيد حمزة.
بصلها بستغراب وبعدها بص لجده.
— ايه، مفيش الحمد لله على السلامه ولا أيه؟
— أهلا يا بيه، نورت بيتك، اتفضل، أتفضل.
— مالكوا مصدومين ليه؟ أنا جيت في وقت غلط ولا أيه؟ تحبوا أمشي؟!
— احم لأ، أبدا يا جدي، أنت وحشتنا أوي.
— كنت فاكر إني مش هخلص من كلامكم. أول ما أجي سكوتكم دا أفهم منه أن أموركم تمام، الحمد لله.
وعد واقفة مكانها بتبصله بخوف وكأن حمزة نساها، في كل حاجة، وفي لحظة جه جده ومعاه كل ذكرياتها.
— وعد… حط إيده على كتفها: وعد!
شهقت بخضة: — نعم.
— مالك؟ أنتي اتخضيتي كدا ليه؟
— لأ، أنا بس ااا…
— مش عاوزة تسلمي عليا يا وعد ولا أيه؟
وشها بدأ يعرق وإيديها بتترعش. لاحظ حمزة خوفها ففهم اللي بتفكر فيه، مسك إيديها بقوة.
— أنا بقول تطلع ترتاح يا جدي شويه ونبقي نتقابل كلنا بالليل على العشا. ايه رأيك؟
— وهو كذلك، أنا فعلا محتاج أرتاح شويه. يالا أشوفكم بالليل.
طلع خطوتين وبعدها التفت وبص تاني لوعد اللي عينيها منزلتش من عليه.
طلع بعدها على طول وهي خايفة أكتر من نظرته اللي مقدرتش تحدد هي نظرة ايه بالظبط.
— يالا بينا.
التفت لحمزة بخوف: — بينا على فين؟
— في ايه؟ أحنا مش كنا رايحين نتمشي؟
— معلشي يا حمزة، حاسة نفسي تعبانة شويه.
