بصوت واطي: — يخربيت جمال أم ضحكتك.
— بتقولي حاجة!
فقاقت من سرحانها وبصت على جسمه تاني، وشها أحمر، وحطت إيديها على وشها وطلعت تجري برا الأوضة، فجأة اتخبطت في كرسي التسريحة وهي مغمية عينيها.
— اااه، رجلي.
— مش ملاحظة إنك كل ما تهربي مني تحصل حاجة تمنعك!
بصتله بعصبية: — أنت مش مكسوف وأنت من غير هدوم كدا قدامي؟ ايه، مفيش حياء خالص!!
— حياء! ليه؟ سمانة رجلي بتغريكي مثلا؟
— أنت مُهزء والله.
— وبعدين بقي في لسانك الطويل دا!
— أنت عاوز أيه؟ ما تدخل تلبس حاجة واستر نفسك بعضلات بطنك دي، استغفر الله العظيم.
— أنتي عمرك ما شوفتي رجالة لابسة مايوه ولا ايه!
— والله أنا بعد ما شوفتك أتأكدت إني مشفتش رجالة قبل كدا. هو فيه كدا!!
— بتبصيلي كدا ليه؟
بصت في الأرض بإحراج: — أنت لو مدخلتش لبست دلوقتي، أنا هصوت ولم عليك سمك البحر كله.
— لأ، ريحي نفسك، أحنا اللي هنروحله دلوقتي.
— هنروح لمين!!!
— البحر، هو فيه غيره؟
— أنت مجنون؟ الجو برد، أحنا في الشتا!
— وفيها ايه يعني؟ البحر هيقولنا لأ؟
— أنت شكلك مستغني عن نفسك. ولا أقولك روح يالا مع السلامة.
— هنروح مع بعض.
— نعم!! دا على جثتي. البحر صاحبي أه، بس صحتي أنا أولى بيها. قال بحر قال، وفي الشتا وبالليل كمان، دا أنت جاحد.
— هتيجي معايا ولا أفضل قاعدلك كدا طول الليل بمنظري دا؟
بتلقائية: — أتفضل قدامي على الشاطئ، أنا طول عمري بشجع السباحة بالليل، ولا في الشتا والمطر نازل كدا. الله، بجد أحييك على اختيارك.
ضحك حمزة وهو ماسك فوطه في إيده ونازل وراها.
— ها، تحبي تجربي؟
— ياريت، بس أنت شايف رجلي، للاسف الميه غلط على الجبس. يالا تتعوض إن شاء الله، أتفضل أنت.
— طيب، خلي الفوطة دي معاكي.
— هاتها، احتمال تبقي ذكري ولا حاجة.
ضحك وبعدها نزل البحر غطس.
بفرحة وهي بتبص عليه: — نفسي الوقت يقف على اللحظات الحلوة اللي ما بنا. مبقتش قادرة أبعد عنك زي الأول، أنا بقيت عاوزة أستغل كل لحظة في حياتي وأنت جمبي.
بصت عليه تاني لاحظت إنه مش باين.
قامت بخضة وفضلت تبص عليه في كل حتة: — حمزة!
— حمزة، أنت فين؟ رد عليا.
قلبها انقبض من الخوف وصوت البرق جامد، عيونها بدأت تدمع، بصوت عالي: — حمزاااا، حمزة بالله عليك بطل هزار وأطلع.
زاد الخوف في قلبها لما ملقتش رد، وكانت خلاص هترمي نفسها في الميه من خوفها عليه، بس فجأة يطلع من تحت الميه وهو باين عليه التعب.
بدموع: — حمزة، حمزة، أنت كويس؟
طلع على الشط نزل على ركبته وهو حاطط إيده على صدره بألم.
جريت عليه وبدأت تنشف وشه بالفوطة وهي بتعيط: — حاسس بأيه؟ رد عليا.
بصوت مُجهد: — متخفيش، أنا كويس.
بعياط: — كويس أزاي وأنت مش قادر تاخد نفسك كدا؟
الجو بدأ يمطر جامد: — حمزة، أحنا لازم ندخل جوا بسرعة.
— وعد.
— أسند عليا، متخفش هتبقي كويس.
مسك إيديها وضمها لقلبه: — أسمعيني.
المطر كان جامد والميه نازلة على وشهم وشعرهم بغزارة.
— عاوز أعترفلك بحاجة.
بعياط: — حمزة، أنت تعبان والمطر هيتعبك أكتر.
بصوت خافت من التعب: — مفيش حاجه بتتعبني قد دموعك دي. أنا عاوز البحر والرمل والمطر وجو إسكندرية الشتوي يكون شاهد على اعترافي ليكي.
وهي باصة في عينيه بحب: — حمزة، أنت ااا…
— أنا بحبك.
بصدمة: — أييه!!
— بحبكك.
دموعها نزلت وهي بتبصله، مشاعرها متلخبطة، مش عارفه تفرح ولا تخاف وتزعل: — حمزة، أنت متعرفش عني حاجة، أنا…
بلع ريقه بتعب وهو لسه ضاغط إيديها على قلبه: — بحبك أنتي، بحب وعد اللي قدامي، مهما كانت هي مين ولا بنت مين. بحب وعد اللي الوحيدة حسيت معاها بفرحة عمري ما حسيتها مع حد قبل كدا. سيبك من الظروف والمشاكل، حُبنا هو الأهم، هو السلاح اللي بقوته هنحل كل حاجة تقف قدامنا، وأي ظروف هتواجهنا، فهماني؟
هزت رأسها بمعنى أه، وفجأة حضنته بقوة وهي بتعيط، بعدها بثواني حست برأسه تقلت على كتفها وبدأ يميل عليها.
— حمزة، مالك؟ في أيه؟
وقع في الرمل بتعب مغمي عليه.
— حمزاااا، رد عليا بالله عليك، فوق.
