لبارت 5
— حسيتك كارهه الفيلا بسبب وجود سحر وعم عبده معانا، وأحنا لسه عرسان جداد، فجبتك هنا شقتي علشان ناخد راحتنا.
— أحيييه، شقتك!
ضحك من تعبيرات وشها وهي مصدومة.
— أنت عاوز تفهمني إنك أخو لين!
ضحك أكتر: — يا الله، حقيقي ما شفتش في حياتي حد بذكائك أنتي. عاوزة تقنعيني إن دماغك مشتغلتش ولو لثانية وشكيتي إن كل دي ممكن تبقي لعبة؟
قعدت مكانها ولسه مش قادرة تستوعب كلامه: — عرفت أزاي أني كنت هقولها تهربني؟
— الحقيقة دي مكنتش متوقعها. هي اللي جت قالتلي إنك طلبتي منها كدا علشان تاخد فلوس. أمال كنتي فاكرة إيه؟ مفتاح شقة أخوها معاها بالصدفة؟ وكمان كاتبة العنوان في ورقة مجهزاه وفلوس التاكسي؟ كل دا صدفة؟ ولا مين هي علشان أخوها يبقي عنده شقة في عمارة زي دي!
بعدم إستيعاب: — أفرض مكنتش قولتلها تشوفلي مكان؟
— كانت هي اللي هتعرض عليكي العرض دا بطريقة غير مباشرة، وكنتي برضو هتوافقي، لأنك مكنتيش هتلاقي حل تاني. تفكير واحد معقد بقي.
بعصبية وصوت عالي: — لأ، أنت أكيد ضغط عليها وعذبتها علشان تجبرها تعمل دا يا حيوا…
قاطعها بنظرة حادة وهو بيقربلها: — أنا بقول تخلي بالك من كلامك، علشان أحنا هنا لوحدنا وسهل عليا أعاقبك بالطريقة اللي تسكتك خالص.
فضلت ترجع لورا لحد ما خبطت في الحيطة وراها، بخوف بصتله وصوت نَفسها بيعلي: — ااا أنت هتعمل أيه؟
بص على لبسها وبعدها رفع عينه في عنيها وهو قريب منها أوي: — لسانك.
بخوف: — ماله؟
— يقصر علشان مزعلكيش.
— ح حاضر.
— وصوتك.
— ماله دا كمان؟
— يبقي واطي، وياريت مسمعهوش خالص. أنتي هنا في عالمي الخاص، الشقة دي محدش يعرف إني شاريها أصلا، حتي جدي. وأنتي بالنسبة لهم هربتي خلاص، وأنا معرفش عنك حاجة، يعني مصيرك بإيدي أنا.
ضربات قلبها زادت من قربه وتعبيرات وشه المخيفة.
— وعنيكي دي.
بدموع: — مالها؟
بسرحان: — مش عارف! القميص دا حلو عليكي أوي، ما تخليكي بيه على طول.
بخوف: — أ… أنت أنت…
بصوت هادئ وهو قريب منها: — أنا أيه؟
— أنت سافل ومشفتش ساعة تربية.
عض شفايفه بغل: — دا أنا…
بعدته عندها وجريت على الحمام بسرعة، قفلت على نفسها.
ظبط نفسه بجدية: — أنتي أزاي أصلا تلبسي حاجة مش بتاعتك كدا وفي بيت أنتي مش عارفاه؟ أفرضي فعلا كانت شقة حد غريب ودخل وأنتي كدا!
من ورا الباب: — وأنت مالك؟ بتتحشر ليه في حياتي! مش كفاية إنك أنت السبب في كل دا؟
— الهدوم قدام الباب، أنا جبتلك شنطة هدومك، ألبسي وتعالي علشان عاوزك.
بتأفف: — حاضر.
كتفت إيديها بضيق: — نعم، عاوز أيه؟
— اقعدي.
— بقولك اقعدي!
— أهو قعدنا، جاي عاوز أيه؟
فتح قدامها قسيمة الجواز بهدوء: — إيه دا؟
بخوف: — دي… دي ورقة القسيمة.
بزعيق: — لا بجد! تصدقي كنت بحسبها ورقة بفرة.
عنيها بدأت تدمع بخوف: — والله قسيمة جواز.
مسك أعصابه وبهدوء: — ما أنا عارف إنها زفت. إيه اللي مكتوب دا؟ فين الشهود؟ أبوكي ممضيش ليه؟ وليه مفيش أي حقوق ليكي في العقد؟
— لأ، ما أنتي هتتكلمي، يعني هتتكلمي، مفيش حل تاني. أنتي مين وبنت مين علشان جدي يضحي بمستقبلي علشانك ويجوزنا بالطريقة دي!!
مسحت دموعها وتكلمت بصوت خافت: — بابا كان صاحب أُنكل سالم جدك، فلما مات مكنش ليا حد خالص، وخصوصا إنه كان عارف من بابا إن فيه مشاكل بينه وبين أعمامي، علشان كدا صمم يجوزني ليك علشان يحميني منهم.
— لا والله، دخل عليا أنا كدا فيلم الخمسينات دا صح!!
وهي بتفرك في إيدها بتوتر: — صدقني دا اللي حصل، وقالي كمان إن الجواز دا هيبقي لفترة قصيرة وبعدها هنطلق.
— مستحيل يكون دا السبب الحقيقي. جدي مش قليل، وكان قادر يحميكي من أي حد مهما كان، ومن غير ما يعمل كل دا. وبعدين أزاي بتقولي إنه عمل كدا علشان خايفة من أهلك، وفي نفس الوقت كنتي هترجعي برجلك أسكندرية تاني!؟
قامت وهي بتعيط ولسه هتمشي، صرخت بقوة من رجلها لما داست عليها بشدة فوقعت في الأرض: — اااه.
قام حمزة بسرعة وشالها بدون أي كلام ودخلها على السرير: — أنتي لازم ترتاحي، كدا رجلك هتورم والجبس هيطول.
بعيون حمرة من كتر العياط: — أنا بجد أسفة.
— نامي، أنتي لازم ترتاحي.
— هو أنت هتعمل معايا أيه؟
بصلها بغضب ممزوج بحزن: — معنديش حل غير إني أستني وأشوف القدر مخبيلي أيه معاكي. كنت جاي وفي بالي إني هلاقي إجابة لكل سؤال معنديش إجابته وهرتاح، بس حتي إجاباتك بتخليني محتار أكتر. شايف في عنيكي حاجات كتير عكس اللي بيطلع منك، والمصيبة إني معرفش أول ما ببص في عنيكي بيحصلي أيه. مبعرفش أنا كنت بقولك ايه أصلا، وكأن غضبي كله بيروح في ثانية. هو أنتي بتعملي لي أيه! على العموم مضطر أصدقك على الأقل لحد ما جدي يظهر.
— طب هترجعني الفيلا تاني؟
— مش هينفع، أنتي هتفضلي هنا. دي الطريقة الوحيدة، إلا لو كلامك صح، هتخلي جدي يظهر بسرعة.
— مش فاهمة.
— أنا عارف جدي كويس، هو مستحيل يسافر بالطريقة دي ويقفل كل أرقامه كدا من غير ما يعرف اللي بيحصل معانا.
— ااا قصدك إنه بيكلم حد وبيعرف منه كل حاجة؟
بصلها بإبتسامة خفيفة: — ما شاء الله، دماغك طلعت بتشتغل.
— بس أنت قولت إن تلفونه مغلق!
— هي مدة ذكائك تلات ثواني بس ولا ايه؟ ما كنتي بدأتي تفكري صح. هو جدي هيغلب يعني؟ يجيب خط تاني وتالت وعاشر. وبعدين أنا بتكلم معاكي ليه أصلا؟ يالا نامي.
— طب وأنت؟
بغمزة: — أيه، تحبي أنام جنبك هنا ولا ايه؟
عيطت أكتر بخوف.
— يخربيت اللي يفكر يفك معاكي في الكلام. أنا غلطان، أتخمدي، أنا همشي بس هقفل عليكي بالمفتاح. عارفه لو عملتي حاجة ولا عرفتي حد إنك محبوسة هعمل ايه!
— أحم، هتعمل أيه؟
قرب منها: — هاجي أعيش معاكي هنا، وبصراحة لو دا حصل موعدكيش إني أفضل محترم كدا كتير.
— دا على أساس إنك محترم أصلا!
بضيق: — طب بما إني كدا كدا قليل الأدب، فثانية كدا.
قرب منها وحاول يقبّلها رغم مقاومتها، وهي اتحركت فجأة واتخبطت شفتها في سنانه وظهر جرح صغير بينزل دم. فجأة تلفونه رن.
بعد عنها بسرعة وهو متفاجئ باللي عمله. وعد كانت مبرقة ومش بتتحرك من الصدمة، كان فيه جرح بسيط على شفتها اللي تحت بينزل دم.
— هو أنا ااا…
فجأة لاقي عينيها بتغمض بالتدريج، ومالت على السرير مغمي عليها.
اتصدم وقرب منها بخوف: — وعد… واااعد، فوقي! دي… دي ماتت دي ولا أيه يا ربي؟ أعمل أيه؟ دا كله علشان قربت منها بس!!!
جاب برفان وحاول يفوقها. فضلت دايخة شويه، بس عرف إنها خلاص هتبقي كويسة. جاب لزقة وحطها مكان الجرح وهو بيقول لنفسه: — أنا هقوم أمشي بسرعة قبل ما تفوق، وساعتها هتلم عليا العمارة بجد.
غطاها كويس وخرج.
تاني يوم، في الفيلا
— حمزة يا يابني، قوم، الساعة تسعه، تلفونك مش بطل رن.
— سحر، سبيني، لسه بدري، أنا تعبان.
— أنت راجع البيت الساعة واحدة بالليل إمبارح، لازم تبقي تعبان، وكمان نايم بهدومك!؟ قوم فَوَق كدا، وأنا هجهزلك الفطار بسرعة، أنت أول مرة تتأخر على الشغل كدا.
