رفعت رأسها بذهول: — ح… حمزة!!
التفت للصوت: — أنتي!
قامت بفرحة: — كنت عارفه إنك هتيجي.
— وأنا مكنتش أعرف إنك كدابة.
تلاشت فرحتها وبصت في الأرض: — حمزة أنا اا…
بصوت عالي خضها: — كفاااية! كفاية كدب بقي. جاية هنا ليه؟ ناوية تألفي كدبة إيه المرة دي؟ ولا تكوني هربتي علشان تيجي تزوري قبر باباكي صاحب جدي؟
بدموع: — كان غصب عني والله.
قبض على إيده بقوة: — متعيطيش، مش عاوز أشوف دموعك دي. أنتي دمرتيني بلعبتك السخيفة أنتي وجدي. بقيت قاعد أسمع من كل واحد قصة مختلفة ليكي. لسه فيكي كام لون عاوزة تطلعيه!!
بعياط: — أنا أسفة.
— أسفك دا ميصلحش ولو جزء واحد من حاجات كتير اتكسرت جوايا. دخلتي حياتي فجأة وهربتي بعد ما…
سكت وهو بيغمض عيونه بوجع.
— أنا هربت علشان وجودي كان غلطة. أنت مقدرتش تتقبلني ودا حقك.
— وأنتي كنتي جاية وفاهمة إيه؟ المفروض إني أموت عليكي من أول نظرة!
رفعت عينيها في عنيه وهي بتعيط بقوة: — علشان كدا هربت. أنا عارفه إنك بتكرهني. هربت لما بدأت… بدأت أحبك، وأنا عارفه إن عمرك ما حبيتني ولا هتحبني. مقدرتش أستنى معاك وأنا شايفة الكره في عنيك اتجاهي.
بتفاجئ: — أييه؟ أنتي قولتي أنتي ايه!!
جت تجري بعد ما استوعبت اللي قالته، فجأة مسك إيديها بقوة وشدها لحضنه وضمها جامد. برقت بصدمة من ردة فعله ومتكلمتش. استمر المشهد خمس دقايق وحمزة مغمض عنيه في حضنها وهي دقات قلبها بتزيد بخوف.
كسر سكوتهم إيد إسلام وهو بيبعد حمزة عنها.
قرب منها وحط إيده على وشها: — وعد، مالك؟ أنتي كويسة؟
وعد لنفسها: — فن اختيار الوقت الغلط دا غريب جدا.
بغضب: — أنت عبيط؟ يالا، مين أنت وبتدخل ليه أصلا!
وعد بخوف: — إسلام، معلشي، أمشي أنت دلوقتي بسرعة.
— أنتي كمان عارفة اسمه دا؟ أنتي يومك مش فايت معايا.
مسك إسلام إيديها وبص لحمزة: — ما توريني كدا هتعمل ايه.
بصت وعد على إسلام وهو ماسك إيدها بصدمة، رفعت عينيها لحمزة وسحبت إيديها بسرعة وهي شيفاه في قمة غضبه وبيبص لإيديهم.
جز حمزة على سنانه بغيظ: — لأ، دا أنت عاوز تتربي بقي.
كانوا خلاص هيمسكوا في بعض، أدخلت وعد ومسكت إسلام: — حقك عليا، علشان خاطري أمشي.
حمزة بغل: — تعالي هنا أنتي كمان. بص لإسلام بكره: صدقني لو قربتلها تاني لأخليه أخر يوم في عمرك.
وعد بينهم مش لاحقة تتكلم ولا عارفه تقول ايه، مش قادرة تقول إنها مراته وهو أصلا مش معترف بيها، ولا قادرة توقف إسلام اللي فاكر حمزة بيعاكسها.
— طب ما توريني كدا هتعمل ايه.
مسكوا في بعض، ضربه إسلام بوكس في وشه بقوة وقعه على الأرض.
صرخت وعد وقربت منه: — أنت كويس؟
شدها إسلام بعيد عنه: — بتعملي ايه؟ هو قريبك!؟
— كفاااية بقي يا إسلام، دا يبقي اا… يبقي اا…
كان حمزة وقف تاني، وفجأة نزلوا ضرب في بعض جامد.
قربت من حمزة وبعدته عن إسلام بالعافية وهي بتعيط.
إسلام وبوقه بينزل دم: — أبعدي، أنتي ملكيش دعوة.
بعياط: — علشان خاطر ربنا بقي، أمشي، متردش عليه.
— أمشي ازاي وأسيبك مع الحيوان ده… دا كان حاضنك!!
— وأنت مال أهلك واحد ومراته؟ أنت ايه؟ حشرك يا بن الفصيلة.
بصتله وعد بتفاجئ أول ما قال مراته، نسيت الموقف كله وفضلت مركزة في عنيه بفرحة إنه أول مرة ينسبها لاسمه.
— نعمم!! جوزها مين؟ وأزاي أنت بتخرف؟ تقول أيه!!
— يا حلاوتك، كمان مش معرفاهم إنك متجوزه.
إسلام وهو بيبصله بقرف: — ااه، هو دا بقي اللي كنتي هتنتحري بسببه؟
بعصبية زعقت وعد: — إسلااام!
حمزة بخنقة: — بقولك ايه، انتي حواراتك كترت خلاص، جبتي أخرك معايا.
قرب منها بلعت ريقها بخوف وهي بترجع لورا.
— في ايه؟ هتقتلني ولا ايه؟
قرب اكتر، شالها بسرعة ومشي بيها على الشاليه بتاعه.
شهقت بخضة: — عاااا، حمزة!! حمزة نزلني بقولك.
— طب أنت هتعمل فيا ايه بالله عليك؟ مش عاوزة أموت دلوقتي، أنا لسه مفكتش الجبس.
— أنت مبتردش ليه؟ نزلني بقااااا.
دخل بيها الشاليه، طلعها في أوضة قفل عليها ونزل.
— افتح الباب، أنت حبستني ليه؟
بدموع وقعت في الأرض وهي شايفة الأوضة متربة وكلها عنكبوت كأنها مقفولة من زمان: — ح… حمزة بالله عليك متمشيش وتسبني لوحدي، أنا خايفة.
— استني هنا. أنت رايح فين؟
— عاوز مني ايه تاني؟ مش مراتك معاك!
— وأنت مالك زعلان كدا ليه إن شاء الله؟
خد نفس بعمق: — خلي بالك منها لأنها بجد تعبانة ومحتاجاك جنبها، ولازم تاخد الدوا بانتظام، والأفضل متسبهاش لوحدها. وعد كانت هتنتحر قبل كدا.
— دوا ايه؟ أنا عاوز اعرف هي مالها.
— الدكتور قال إن عندها انهيار عصبي وبتجيلها نوبات، فلازم حد يكون جنبها طول الوقت. ونصيحة متخسرهاش لأنها بجد بتحبك.
— وانت تعرفها منين وعرفت ازاي كل دا؟!
حكاله إسلام عن أول لقاء منهم.
— أول ما شوفتك مكنتش أعرف إنك هو، بسبب عصبيتي وخوفي عليها افتكرتك بضايقها، بس لما هديت أتأكدت إنك أنت.
— أنا ايه؟
— الصورة اللي شوفتها جمبها وهي تعبانة كانت صورتك. حاولت أساعدها بس رفضت تحكيلي حاجة. معتقدش في حد غيرك ممكن تحكيله اللي جواها. عن إذنك.
مشي إسلام ودخل حمزة البيت، طلع فتح الباب لقاها مغمي عليها. قرب منها بخوف وهو بيحاول يفوقها بس مفيش استجابة.
— وعد.. وعد، فتحي عيونك، أنا جمبك متخفيش. أسف والله مكنش قصدي أسيبك لوحدك وعد!!!
افتكر كلام إسلام، فتح الشنطة اللي كانت معاها طلع منها دوا، عدلها وساعدها إنها تاخده. بعدها فتحت عينيها بتعب وقفلتها تاني، راحت في النوم.
قعد حمزة جنبها وهو واخدها في حضنه وبيملس على شعرها.
— معرفش هقدر أسامحك ولا لأ، بس قلبي مش قادر ينكر فرحته برجوعك. بالرغم من كل اللي عرفته، لسه مش قادر أكرهك ولا حتي حبك في قلبي يقل. ليه عملتي كدا؟ ليه كذبتي عليا ومخبية حقيقتك عني؟ هلومك أزاي؟ ما أنتي من حقك متثقيش فيا بسهولة. بس صدقيني أنا مستعد أحارب الدنيا كلها علشانك، بس وانتي معايا وجمبي.
