— طيب طيب، روحي أنتي، أنا خلاص صحيت، بلاش فطار، جهزيلي بس القهوة بتاعتي علشان أصحصح.
— من عنيا.
بص في الساعة بستغراب: — يانهار أبيض، الساعة تسعه!
قام بسرعة، كان لابس القميص مفتوح وعضلات بطنه باينة، خلع القميص ونزل في الأرض لعب عشرين ضغط، ومفيش غير شكل وعد شاغله كل تفكيره من اللي حصل إمبارح.
خلص ودخل خد شاور ولبس شميز أبيض على بنطلون كلاسيك وساعة كلاسيك ونظارة شمس رافعها على رأسه.
— القهوة يا حمزة.
— تسلم إيدك يا سحورة.
— مزاجك رايق أوي النهاردة.
خد رشفة من القهوة: — يعني حاجة زي كدا.
— تصدق بقيت أحس فعلا إن البت وعد دي وجودها كان شؤم على البيت.
شرق وهو بيشرب أول ما جابت اسم وعد: — ليه بتقولي كدا؟
— مش عارفه، مكنتش مرتاحة كدا من ساعة ما جت. أول ما دخلت البيت، في ناس تدخل بإبتسامة تنور البيت، ودي داخلة مكشرة وساكتة.
— أه صحيح، فكرتيني، هي لما جت مين كان معاها؟
— سواق عربية جدك هو اللي جابها، وأول ما دخلت كأنها كانت بتعيط، عيونها حمرة كدا ووشها في الأرض. جدك كلمني وقال أطلعها أوضتك، وفعلا دا اللي حصل.
— يعني هي مكنتش تعرف إني نايم فوق!
— تقريبا لأ، بس أصلها حتي ما فتحتش النور، دي حطت الشنطة وضوء القمر كان منور الأوضة بنور خافت، قعدت على السرير على طول وعملت نفسها نايمة أول ما لقتني لسه واقفة معاها في الأوضة، شكلها كانت بتطردني البت دي.
ضحك حمزة وهو بيشرب أخر شويه في الفنجان.
— سلام يا سحورة.
في الشقة عند وعد
قامت وهي ماسكة رأسها بوجع: — يا ربي، دماغي هتنفجر. إيه ريحة البرفان دي؟ هتخنق. كح كح!
وقفت قدام المراية وهي بتربط شعرها، تبص بخضة على شفايفها بتحسس عليها فبتتألم: — ااه، إيه دا؟ هو حصلي ايه!
أفتكرت اللي حمزة عمله معاها، إبتسمت بسرحان وبعدها دموعها نزلت بقوة وهي بتبص لنفسها في المراية. بدأ صوت عياطها يعلي ودموعها تنزل بقهرة، بصت حواليها لقت شنطة هدومها، فتحتها بسرعة ومن جيب سري فيها طلعت تلفون ورنت على رقم.
— ألوو.
بعياط: — أنت فين؟ ليه سبتني لوحدي؟ مكنش دا وعدك ليا.
— فيه إيه بس يا وعد؟ حمزة عمل فيكي حاجة!
— أرجوك تعالي، هو قالي إنه هيطلقني أول ما أنت تظهر.
— فهميني طيب، فيه إيه؟
— أنا لازم أختفي، وجودي غلط، أنا شقلبتله حياته كلها.
— ممكن تهدي وتقوليلي حصل أيه؟ دا حفيدي وأنا عارفه كويس، عمره ما هيفكر يأذيكي، هو عصبي أه ومتهور، بس صدقيني لو عرفك كويس هيحب…
قاطعته بقهرة: — لأ، متقولهاش بالله عليك، كفاية اللي حصلي قبل كدا. أنت قررت تساعدني وأنا وافقت على كل تخطيطك علشان كنت متأكدة إنه هيبقي كاره وجودي وعاوز يتخلص مني بسرعة، بس لو حصل اللي أنت بتقوله دا، أنا هموت نفسي قبل ما يعرف حقيقتي.
— بعد الشر عليكي، أهدي طيب، وكل حاجة ليها حل.
— قسيمة الجواز وصلت حمزة، وجه واجهني بأسئلة معرفتش أجاوب عليها.
— أزاي يعني؟ أنا مفهمك كويس، هتقوليله ايه؟
— لما ببقي قدامه مبعرفش. أكدب كلامي بيبقي ملخبط، لما ببصله وبحس إني باخد نفسي بصعوبة وعاوزة أهرب منه بأي طريقة. مقتنعش بأي حاجة قولتها.
— يبنتي، أديله فرصة، وعمرك ما هتندمي، هو دا اللي هيعوضك عن كل اللي مريتي بيه.
بدموع: — مش هقدر أظلمه معايا. إيه ذنبه يحب واحدة كانت اتأذت من حد قبل ما تعرفه وكانت حامل؟
— وعد!!!
التفتت بصدمة أول ما سمعت صوت حمزة، وقع الفون من إيدها على الأرض.
بارت 6
بدموع: — مش هقدر أظلمه معايا. إيه ذنبه يحب واحدة كانت اتأذت من حد قبل ما تعرفه؟
— وعد!!!
التفتت بصدمة أول ما سمعت صوت حمزة، وقع الفون من إيدها على الأرض واتكسر.
— وعد، أنتي فين؟ لسه نايمة ولا ايه؟
زقت التلفون برجليها تحت السرير، وفضلت واقفة مكانها مش قادرة تتحرك.
— إيه دا؟ أنتي صحيتي؟ بنادي عليكي مبترديش ليه؟
بعياط أول ما شافته: — أنا عاوزة أرجع إسكندرية.
بصدمة من حالتها: — فيه إيه بس؟ مالك!!؟
— أنت ملكش ذنب في كل دا، أنا غلطت لما وافقته في قراره، أنا مستهلش أكون مراتك.
انهارت في العياط.
حضنها بقوة وهي ماسكة فيه بكل قوتها: — أنا خايفة أوي يا حمزة.
— طيب فهميني، حد زعلك؟ أنا اشتكتلك ولا قولتلك أمشي؟ وبعدين ما أنا من ساعة ما شوفتك لسانك طويل، ليه دلوقتي بقيتي حساسة كدا؟
بعدت عنه وهي بتضحك من كلامه.
— أيوا كدا، روقي وغسلي وشك دا وتعالي، أنا لسه مفطرتش، هنفطر سوا.
وهي بترشف من العياط: — إيه دا؟ أنت هتفطر معايا؟ بتاع إيه إن شاء الله!
رفع وشها بإيده بستغراب: — يبنت الغدارة! الشهادة لله أنتي غلبتي الحرباية في تغيير لونها. مالك يا بنت المجنونة؟ ما أنتي كنتي حلوة من شويه وطيبة!!
— أطلع براا.
— هي دموعك بتنزل تغزي لسانك فبيطول ولا ايه!!
— برا يا متح*رش يا سافل، أنت فاكر اللي عملته امبارح دا هيعدي بسهولة كدا!
— إيه دا؟ الشتيمة دي ليا أنا!
— وكمان غبي، أنت شايف حد غيرك هنا يا معقد يا مختل؟
— تصدقي خسارة فيكي الأكل يا واطية. ماله الفطار مع سحر أحسن من الفطار مع بومة زيك.
بغضب: — أنا بومة!
— أيوا بومة، دا الجبس نفسه مش طايقك، أنا ماشي.
خرج وقفل الباب بدفعة. قعدت على السرير وهي حاطة إيدها على قلبها، خدت نفس بإرتياح: — الحمد لله مسمعش المكالمة.
رفعت إيديها بستغراب وهي بتشم هدومها، لقت برفان حمزة لزق في التيشيرت لما حضنته، فضحكت بسرحان: — ياريتني قابلتك من زمان يا حمزة، يمكن كان القدر يكون حنين عليا شويه بوجودك. جاي يضحكلي بعد ما دمرني! طب يفيد بأيه وأنا لا قادرة أفرح بوجودك معايا، ولا عارفه هلاقي حجج لحد أمتي أتخانق معاك بيها علشان تكرهني.
