بدموع: — طب هعمل إيه؟
بصي، أنتي شكلك طيبة، أنا عندي شقة بتاعة أخويا مقفولة محدش بيروحها، ممكن تقعدي فيها كام يوم لحد ما تشوفي هتعملي إيه.
— بجد؟ أنتي هتعملي معايا كدا؟
— لا مش وقته الكلام دا، لازم أرجع الشغل بسرعة. العنوان أهو ودا المفتاح والفلوس دي هتوقفي بيها أي تاكسي وتروحي على هناك تقعدي، وأنا هعدي عليكي بالليل أطمن عليكي.
— مش عارفه أقولك إيه والله.
— مع السلامة بقي، أنا كدا هترفد بااي.
— سلام.
— ها، عملتي إيه؟
بإبتسامة: — كله تمام يا بيه، عملت كل اللي قولتهولي.
— أوعي تكون شكت في حاجة.
— أبدا، دي كانت فرحانة أوي، شكلها هبلة أوي وسهل ينضحك عليها.
ملامح وشه أتغيرت للغضب: — في إيه يا روح أمك؟ فوقي لنفسك، هي مين دي اللي هبلة؟ أنتي أتجننتي ولا إيه؟
— أحم أنا أسفة والله ماقصدش.
— يالا على شغلك ولا كأنك قابلتينى النهاردة، فاهمة؟
بخوف: — ح حاضر.
لنفسه بخبث: — أشوفك بالليل يا وعدي.
بارت 4
— وصلنا يا هانم.
بصت لشكل العمارة بستغراب: — أنت متأكد إن دا العنوان!
— أيوا يا هانم، دي العمارة والشقة في الدور السابع.
— معقولة أخوها عنده شقة في العمارة الفخمة دي؟
— فيه حاجة يا هانم تحبي أساعدك؟
— لأ لأ مفيش، أنا هنزل لوحدي، شكرا.
طلعت في الأسانسير وهي مستغربة أزاي الأمن مش كلمها ولا حتي سألها طالعة لمين. فتحت باب الشقة وهي خايفة من شئ مجهول، كأنها حاسة إن في حاجة هتحصل.
— الله، الشقة حلوة أوي، دي مفيش فيها ذرة تراب. طب ليه قالت إنه محدش بييجي هنا!
رجعت لورا بخوف والشك بدأ يزيد جواها، مسكت ألة حادة وبدأت تلف في الشقة كلها وهي مرعوبة ليكون دا فخ فيها وإن في حد في الشقة.
— الحمد لله، محدش هنا. مالك يا وعد؟ أهدي، مفيش حاجة. أكيد يعني عمارة شيك زي دي فيه حد بينضفها باستمرار. بطلي توتر بقي وأفرحي، أخيرا خلصتي من المختل دا. قال جوزي قال.
قفلت الباب بالمفتاح وخدت نفس بإرتياح.
دخلت أوضة النوم، فتحت الدولاب لقت هدوم رجالي شيك جدا.
— إيه دا؟ هو سايب هدوم هنا كمان؟ دا إيه الجمال دا.
أترمت على السرير بتعب وهي باصة للسقف بحزن: — مكنتش عارفة أحسبها كل الحسابات دي ولا كان عندي إختيار تاني.
بدأت دموعها تنزل بقهر: — أنا أكتر شخص الحياه أجبرته على كل طريق مشي فيه.
راحت في النوم في دقائق من كتر التعب.
في الشركة
— لسه فيه مواعيد تانية؟
— لأ، كدا كله خلص. هو بس مستر فريد اتصل من أسكندرية وحضرتك في الميتنج وقال إنه هيكلمك تاني.
— سيبك من فريد. خلصتي اللي قولتلك عليه؟
— أيوا يا فندم، كله جاهز.
— تمام أوي. وجدي لسه مفيش حد يعرف مسافر فين؟
— للاسف لأ. هو فيه مشاكل بينكم؟
رفع عينه من الورق وبصلها بستغراب: — سمر، على فكرة الفضول دا حاجة مش لطيفة خالص.
— أحم أنا أسفة.
— يالا أتفضلي.
— الحمد لله على سلامتك يا يابني.
— الله يسلمك.
— إيه دا؟ أنت جيت لوحدك؟
— أيوا.
— أحم، أمال وعد فين؟
نزل الدرجتين اللي طلعهم وبصلها بحدة: — دادة سحر، أنتي عارفة إني بعزك زي أمي الله يرحمها، صحيح ساعات بندهلك بأسمك من غير ألقاب علشان أنتي أقرب حد ليا وواخد عليكي، بس الليلة دي البت دي تنسيها خالص كأنها مظهرتش أصلا.
— دي باين عليها غلبانة يا بني وملهاش حد هنا.
— هربت… هربت مني. أعمل إيه؟ أنزل إعلان في الجرايد أقول مراتي هربت يا جماعه ياريت اللي يشوفها يقولها ترجع البيت!
— هربت!!
— أيوا، وياريت نقفل الموضوع دا بقي علشان أنا الصراحة مبسوط بالهدوء دا ومش عاوز قلق تاني. أنا طالع أرتاح.
— ااا في حاجة كمان.
— أمم، خير يا سحر؟ التحقيق دا مش هيخلص ولا إيه؟
— الظرف دا جالك من شوية.
— ظرف إيه دا!
— معرفش، حد سبهولك ومشي.
— طيب هاتيه.
طلع أوضته، خلع أول زرارين في القميص، مسك الظرف بستغراب لما شاف عليه طابع بريد إسكندرية: — معقولة يكون من فريد!
فتحه لقاه قسيمة الجواز بتاعته هو ووعد.
بغضب رمى الورقة بعيد: — حقيقي مكنتش أتخيل إنك ممكن تعمل فيا كدا يا جدي. دي هديتك على كل تعبي معاك في الشركة؟ تدبسني التدبيسة دي!
بستغراب كأن لفت إنتباهه حاجة، مسك الورقة تاني وبص بتركيز: — إيه دا؟ غريبة يعني مفيش مؤخر ولا مهر ولا حتي شهود على العقد من طرفها! إيه حكايتك يا وعد؟ وإيه جابك في طريقي وخلي جدي يحطني في موقف زي دا من غير حتي ما ياخد رأيي ولا حتي يلمح بالموضوع؟ أنا لازم أفهم، أنتي الوحيدة دلوقتي اللي عندها أجابة لكل سؤال محيرني.
في الشقة عند وعد
قامت وهي بتتوجع من ضهرها: — اااه، أنا نمت أزاي بحالتي دي؟ يااه، الساعة عشرة. لين أتأخرت أوي، شكلها في نباطشية.
قامت وهي بتتاوب، مسكت قميص أبيض طويل من لبس الرجالي اللي في الدولاب لأنها ممعهاش هدوم، ودخلت الحمام وهي بتسند على عكاز.
بعد شويه سمعت صوت باب الشقة بيتفتح، ففكرت إنها لين. خرجت من الحمام شعرها كله ميه ومش لابسة حاجة غير القميص اللي فوق الركبة بحاجة بسيطة.
بإبتسامة: — لين، أنتي جيتي.
بصت في الصالة مش لقتها، أستغربت، دخلت الأوضة صرخت بصدمة لما لقت حمزة قاعد على كرسي التسريحة وحاطط رجل على رجل.
بخوف رجعت لورا.
— ها، مش هتسأليني دخلت أزاي المرة دي؟
وهي بتترعش: — أ… أنت عرفت مكاني ازاي؟
قام وهو بيقرب منها وهي بترجع لورا: — بس حلو قميصي عليكي أوي.
بصت على نفسها وبعدها بصتله بصدمة، وجت تجري على الحمام علشان تلبس، اتزحلقت في ميه شعرها على الأرض، جري حمزة ومسكها، بص لعيونها الزرقة اللي شبه البحر.
— أنتي طلعتيلي منين؟
كانت مركزة في عنيه ومردتش.
ضغط على وسطها أكتر، شهقت بكسوف: — أنت بتعمل إيه؟ اوعي كدا، سبني.
— هو أنا لسه عملت حاجة؟
— أبعد عني، والله لو قربت لـ…
— بس بقي، أنتي إيه مبتفصليش؟ على العموم دا الدور السابع، يعني لو حابة تعمليها تاني صدقيني المرة دي مش هتيجي على كسر رجل، دا هتبقي كسر رقبة على طول، ويبقي أحسن.
بتوتر: — أنت دخلت أزاي؟
— من الباب دا.
حطت إيديها في وسطها: — دا على أساس أن باب أوضتي بيطل على الشارع!
ضحك وهو بيرجع شعره لورا وبيقعد على السرير. برقت بخوف: — لأ لأ، مستحيل اللي في بالي يكون صح.
— حسيتك كارهه الفيلا بسبب وجود سحر وعم عبده معانا، وأحنا مهما كنا لسه عرسان جداد، فجبتك شقتنا دي يا حياتي علشان نبقي لوحدنا وناخد راحتنا أكتر.
بصدمة: — أحيييه، شقتك!
