لوجين

لوجين كانت بنت من منطقة شعبية بس دماغها توزن بلد وقلبها ابيض زيادة عن اللزوم كانت عايشة مع امها بعد ما ابوها مات وسايبلهم يدوبك معاش صغير يادوبك بيكفي الايجار والاكل وكانت بتشتغل في محل ميكب في مول كبير في القاهرة الجديدة عشان تساعد امها وتكمل دراستها في كلية تجارة مفتوح كانت بتحلم بحياة بسيطة ومستقرة مش اكتر ولا عايزة غنى ولا فلوس كتير وصاحبتها الانتيم من ايام المدرسة كانت ماريا وماريا دي كانت عكسها تماما بتحب الفلوس والمظاهر ونفسها تعيش في فيلا وعربية احدث موديل وبتشوف ان الفلوس هي اللي بتعمل قيمة للبني ادم وكانت دايما تقول للوجين انتي اللي معيشك الفقر ده طيبتك الزيادة لازم تبقي ناصحة وتشوفي مصلحتك

وفي يوم ماريا جت للمحل عند لوجين وشكلها مبسوط اوي وقالتلها اسمعي يا لوجين انا جايبالك مصلحة العمر هتطلعك من الفقر ده كله لوجين استغربت وقالتلها مصلحة ايه يا ماريا قالت لها في واحد اسمه رائد ده راجل غني جدا عنده شركة استيراد وتصدير وعنده فلوس متتعدش وبيجي يقعد في الكافيه اللي انا شغالة فيه كل يوم وبيبص عليا بس انا عارفة انه بيحب البنات الهادية الرقيقة اللي شبهك وانا عايزاكي تدخلي عليه وتوقعيه في حبك ونخليه يحبك وبعدين نطلب منه فلوس كتير ونقسمها سوا ونعيش حياتنا

لوجين اتصدمت وقالتلها انتي بتقولي ايه يا ماريا ده اسمه نصب وانا عمري ما اعمل كده انا مش بتاعة الحاجات دي وماريا فضلت تزن عليها وقالت لها يا بنتي فوقي بقى امك تعبانة ومحتاجة عملية وانتي مش معاكي فلوسها وهو كده كده غني ومش هيفرق معاه الفلوس دي ده قرشين بالنسباله وانتي هتاخدي اللي انتي محتاجاه وتساعدي امك وانا كمان نفسي اخرج من القرف اللي انا فيه ده والكافيه اللي باخد منه ملاليم

لوجين فضلت تفكر كتير طول الليل وامها كانت تعبانة فعلا والدكتور كان قايل انها محتاجة عملية في القلب ومش معاهم فلوس العملية وكانت بتعيط كل يوم عشان مش عارفة تعمل ايه وفي الاخر الشيطان لعب في دماغها وقالت خلاص هجرب مرة واحدة بس عشان خاطر امي وبعد كده هبعد

ماريا رسمتلها الخطة كلها قالتلها بصي يا لوجين رائد بيجي كل يوم الساعة سبعة الكافيه بيقعد في نفس الترابيزة لوحده بيشرب قهوة ويفتح اللاب توب انتي هتيجي كأنك بالصدفة وهتقعي قدامه وتوقعي القهوة بتاعته وبعدين هتعتذري وتتكلمي معاه بكسوف وهو هيحب الحركة دي اوي ورائد فعلا كان راجل في اواخر العشرينات شكله شيك جدا ووسيم وهادي ومحترم وكل البنات في المول كانت بتبص عليه وهو مكنش بيبص لحد

جودي كانت بنت شغالة مع لوجين في محل الميكب وكانت طيبة اوي وكانت بتحب لوجين زي اختها وكانت دايما تنصحها وقالت لها خلي بالك يا لوجين انا حاسة ان ماريا بتسحبك لطريق مش كويس وانتي مش قد اللعب ده لوجين قالتلها متخافيش يا جودي دي مرة واحدة بس عشان خاطر امي

وفعلا تاني يوم لوجين لبست فستان بسيط شيك وحطت ميكب خفيف وراحت الكافيه الساعة سبعة وشافت رائد قاعد لوحده لابس بدلة شيك ومركز في اللاب توب بتاعه وقلبها كان بيدق بسرعة اوي وكانت خايفة ومرعوبة بس افتكرت امها ودخلت ومثلت انها بتتكلم في التليفون ووقعت وهي ماشية جنبه وكبت القهوة على هدومه وعلى اللاب توب بتاعه وصرخت بكسوف يا لهوي انا اسفة جدا والله ما اقصدش

رائد اتخض في الاول وبعدين بص لها وشاف بنت جميلة رقيقة عنيها مليانة دموع وبتترعش من الخوف فابتسم وقالها ولا يهمك محصلش حاجة حصل خير ولوجين فضلت تعتذر وتقول انا هصلحلك البدلة وهوديها الدراي كلين على حسابي وهو قالها لا خالص مفيش داعي وقام جاب لها منديل وقالها اقعدي اهدي انتي كويسة ولوجين قعدت وهي مكسوفة وقالها انتي اسمك ايه قالت له اسمي لوجين قالها اسم جميل اوي وانا اسمي رائد وبدأ يتكلم معاها بهدوء وصوته كان حنين اوي

من اليوم ده رائد بقى كل يوم يستناها في الكافيه ولوجين بقت تروح تقابله وماريا كانت بتديها تعليمات كل يوم تقولها قولي له كذا واعملي كذا وخليه يحبك اكتر ولوجين كانت بتمثل في الاول بس مع الوقت بدأت تحس بحاجات غريبة بتحب قعدته وكلامه وطريقته المحترمة معاها وكان بيحكي لها عن حياته وانه وحيد وامه وابوه ماتوا في حادثة وهو صغير وعايش لوحده وربى نفسه بنفسه واشتغل كتير لحد ما بقى غني بس عمره ما لقى حد يحبه بجد وكل البنات اللي عرفها كانت بتحبه عشان فلوسه بس

وفي يوم من الايام رائد اخدها يتمشوا في الزمالك على النيل وكان الجو حلو والهوا جميل وفضلوا يتكلموا ساعات طويلة عن احلامهم وعن اللي نفسهم يعملوه ولوجين حست انها لقت نفسها معاه وانها بقت تحب تشوفه كل يوم ولو يوم ما شافتوش بتحس ان اليوم ناقص حاجة كبيرة وكانت بتغير عليه لما اي بنت تبص عليه وده كان دليل انها وقعت في حبه بجد مش تمثيل وقلبها بقى متعلق بيه جامد اوي

لوجين كانت بتسمعه وقلبها بيوجعها من احساس الذنب وكانت حاسة انها بتخدع اطيب واحن راجل شافته في حياتها ورائد وقع في حبها بجد بقى يشوفها كل حاجة حلوة في حياته وكان بيجيبلها هدايا غالية وهي مكنتش بترضى تاخدها بس ماريا كانت بتقولها خديها يا هبلة ده حقك

وفي يوم رائد عزم لوجين على عشاء في مطعم غالي اوي على النيل وكان شكله متوتر اوي وقالها يا لوجين انا عايز اقولك حاجة من زمان نفسي اقولها انا عمري ما حبيت حد زي ما حبيتك انتي غيرتي حياتي وانا عايزك تبقي مراتي وتكملي معايا بقيت عمري وطلع علبة فيها خاتم الماظ شكله غالي جدا ولوجين اتصدمت وعيطت من الفرحة ومن احساس الذنب في نفس الوقت وقالت له انا محتاجة وقت افكر ورجعت البيت منهارة بتعيط

راحت لماريا وقالت لها انا مش قادرة اكمل يا ماريا انا حبيت رائد بجد وهو انسان كويس اوي ومش قادر اخدعه اكتر من كده انا عايزة اعترف له بكل حاجة ماريا اتعصبت عليها وقالتلها انتي اتجننتي يا لوجين هتضيعي كل حاجة بعد ما وصلنا للي احنا عايزينه انتي عايزة ترجعي للفقر تاني لوجين قالتلها الفلوس مش كل حاجة يا ماريا انا بحبه ومش هينفع ابني حياتي على كدبة ولو بيحبني بجد هيسامحني

جودي لما عرفت قالت لها انتي صح يا لوجين اللي بيحب حد بجد لازم يبقى صريح معاه من الاول وروحي اعترفيله وان شاء الله هيسامحك لان نيتك كانت كويسة في الاول عشان امك وكانت جودي بتحضنها وتقولها ربنا معاكي يا حبيبتي متخافيش انتي قلبك ابيض وهو هيحس بده

لوجين قررت تاني يوم تروح لرائد وتقول له كل الحقيقة وتطلب منه يسامحها وكانت محضرة كلام كتير في دماغها وكانت رايحة وهي بتدعي ربنا انه يسامحها وفي نفس الوقت ماريا كانت قاعدة في الكافيه متغاظة جدا من لوجين وحاسة انها هتضيع منها الفلوس وكانت قاعدة بتشرب شاي وشافت رائد داخل الكافيه لوحده فسألت عن لوجين فماريا انتهزت الفرصة وقالت له بقى انت متعرفش ان لوجين كانت بتضحك عليك وان كل ده كان خطة وانا وهي متفقين نوقعك عشان ناخد فلوسك وانها كانت بتمثل عليك الحب وهي اصلا مش بتحبك وكل ده تمثيل

رائد اتصدم صدمة عمره ووشه بقى اصفر وحس ان الدنيا بتلف بيه ومكنش مصدق اللي بيسمعه وقال لماريا انتي بتقولي ايه انتي كدابة ماريا طلعت تليفونها وورت له شات بينها وبين لوجين من الاول خالص وهي بتقول لها روحي وقعيه في حبك عشان ناخد فلوسه ولوجين بتقول حاضر هعمل كده رائد حس ان قلبه اتكسر مليون حتة وقام من غير ما يتكلم وخرج من الكافيه وهو مصدوم

بعدها بنص ساعة لوجين وصلت الكافيه وكانت بتدور على رائد وشافت ماريا قاعدة بتضحك وقالت لها فين رائد يا ماريا انا عايزة اعترف له النهاردة ماريا قالت لها بكل برود انا خلاص ريحتك وقلت له كل حاجة وورت له الشات بتاعنا عشان متتعبيش نفسك لوجين اتصدمت وصرخت فيها انتي عملتي ايه يا ماريا حرام عليكي انتي دمرتي حياتي ليه تعملي كده فيا انا صاحبتك وفضلت تعيط وتجري تدور على رائد

راحت شركته قالولها مش موجود راحت بيته الامن مرضاش يدخلها وفضلت تتصل بيه مبيردش عليها وبعتت له مسدجات كتير انا اسفة انا كنت هقولك الحقيقة النهاردة والله العظيم انا بحبك بجد بس هو مكنش بيرد وكانت كل دقيقة بتمر عليها كأنها سنة وكانت حاسة ان روحها بتتسحب منها

رائد كان قافل على نفسه في الفيلا بتاعته ومش عايز يشوف حد وكان موجوع اوي وكان عنده صاحبه اسمه رامي ده كان صاحبه من الطفولة وبيحبه اوي وبيعتبره اخوه وجه قعد معاه وقاله مالك يا رائد فيك ايه ورائد حكى له كل حاجة وهو بيعيط لاول مرة في حياته من ساعة ما اهله ماتوا ورامي قاله بص يا رائد انا عارف انك موجوع بس البنت دي باين عليها بتحبك بجد وعنيها لما كانت بتبصلك كانت مليانة حب مش تمثيل ولو كانت عايزة فلوسك كانت وافقت تتجوزك وخدت كل حاجة لكن هي طلبت وقت تفكر وده معناه انها كانت مترددة عشان بتحبك ومش عايزة تخدعك اسمع منها الاول

وفي نفس الوقت كان فيه واحد اسمه ايمن ده كان مدير اعمال رائد وكان راجل كبير وحكيم وقال لرائد نفس الكلام يا رائد متظلمش البنت ممكن تكون غلطت في الاول عشان ظروفها صعبة بس حبتك بجد في الاخر والحب بيغير البني ادم والمسامح كريم وانت طول عمرك قلبك كبير

لوجين كانت تعبانة ومش بتنام ولا بتاكل وامها كانت قلقانة عليها اوي وجودي كانت جنبها كل يوم بتطبطب عليها وتقولها متخافيش ربنا كبير وهيقف جنبك عشان نيتك كويسة وكانت بتاخدها في حضنها وتقولها بكرة هتروق وتحلى وربنا هيعوضك خير

بعد اسبوع كامل من العذاب رائد قرر يروح يقابل لوجين وراح لها المحل اللي بتشتغل فيه وشافها خاسة وتعبانة وعنيها وارمة من كتر العياط واول ما شافته عيطت وقالت له انا اسفة يا رائد والله العظيم انا كنت جاية اعترفلك اليوم اللي ماريا قالتلك فيه انا بحبك بجد ومش عايزة فلوسك انا كنت محتاجة فلوس عملية امي في الاول بس بعد كده حبيتك انت ونسيت الفلوس خالص وسامحني لو تقدر