ياسمين كانت بنت بسيطة اوي ساكنة في شقة صغيرة في شبرا مع امها بعد ما ابوها اتوفى وسابلهم يدوب المعاش اللي بيكفي بالعافية اخر الشهر ياسمين كانت متخرجة من كلية اداب وبتشتغل في مكتبة صغيرة مرتبها على قده بس كانت راضية وقنوعة وبتحلم زي اي بنت انها تلاقي حد يحبها بجد مش عشان شكلها ولا عشان اي حاجة تانية صاحبتها الانتيم من ايام المدرسة كانت هدير هدير كانت عكسها تماما بتحب الفلوس اوي وشايفة ان الفلوس هي اللي بتعمل كل حاجة في الدنيا وان الحب ده كلام افلام وخلاص هدير كانت بتشتغل في شركة تسويق وبتعرف ناس كتير اغنيا وبتحلم طول الوقت تعيش في فيلا وعربية اخر موديل
في يوم هدير كلمت ياسمين وقالت لها تعالي اقابلك في كافيه في الزمالك ضروري عندي ليكي حاجة هتغير حياتك ياسمين استغربت وراحت لقت هدير قاعدة وشكلها متحمسة اوي قالت لها بصي يا ياسمين انا عارفة انك بنت جدعة ومحتاجة فلوس عشان امك وتعبها وعشان شقتكم اللي ايجارها بيزيد كل سنة انا عندي خطة هتخلينا احنا الاتنين نطلع لفوق خطة الخداع ياسمين ضحكت وقالت لها خطة خداع ايه يا هدير انتي هتودينا في داهية ولا ايه هدير قالت لها اسمعي بس فيه راجل اسمه انس انس ده غني اوي اوي عنده شركات ومعارض عربيات وفلل في كل حتة ولسه راجع من دبي بقاله كام شهر ومش مرتبط وانا عارفة من ناس في الشركة انه بيدور على بنت بنت ناس ومحترمة يتجوزها مش واحدة من البنات بتوع السهر بتوع اليومين دول انتي المواصفات اللي هو عايزها بالظبط لو عرفتي توقعيه في حبك احنا هناخد منه اللي احنا عايزينه
ياسمين اتصدمت وقالت لها انتي مجنونة يا هدير عايزاني اخدع بني ادم وانصب عليه انا عمري ما عملت كده ولا هعمل كده هدير فضلت تقنع فيها وقالت لها يا بنتي ده مش نصب ده ذكاء هو كده كده غني ومعاه فلوس مش عارف يوديها فين وانتي غلبانة وتستاهلي وبعدين احنا مش هناخد فلوسه كلها احنا هناخد قرشين نأمن بيهم مستقبلنا وبعدين تسيبيه ولا تكملي معاه براحتك دي فرصتك ياسمين قعدت تفكر طول الليل وكانت امها تعبانة ومحتاجة عملية والدكتور قال لازم تتعمل بسرعة وهي مش معاها ولا مليم والايجار متأخر تلات شهور وصاحب البيت كل يوم يخبط عليهم الشيطان لعب في دماغها وقالت لنفسها طب اجرب ايه يعني اللي هيحصل
هدير رتبت كل حاجة قالت لها انس بيروح جيم معين في التجمع كل يوم الصبح وبعد الجيم بيقعد يشرب قهوة في نفس الكافيه اللي جنب الجيم انتي هتروحي هناك وهتعملي نفسك بتقري كتاب وهو بيحب البنات اللي بتقرا وهدير جابت لها لبس شيك من عندها وظبطلها شعرها وميكب خفيف ياسمين اول مرة تلبس كده كانت حاسة انها مش هي وفعلا راحت الكافيه تاني يوم الصبح بدري وقعدت ماسكة كتاب وقلبها بيدق جامد شوية ودخل انس طويل وعريض ولابس ترينج وريحته حلوة اوي وشكله فعلا ابن ناس اوي اول ما شافها وقف شوية وبصلها
انس جه طلب قهوة وقعد في الترابيزة اللي جنبها وبص على الكتاب اللي معاها وقال لها انتي بتقري لمين ياسمين اتلخبطت وقالت له نجيب محفوظ قال لها بتحبي زقاق المدق ولا لسه في الاول ياسمين كانت قرت الرواية قبل كده مع انها متوترة قالت له بحبها بس بحب بداية ونهاية اكتر انس ابتسم وقال لها ذوقك حلو اوي اول مرة اشوف حد هنا بيقرا اصلا ياسمين ضحكت وانا كمان اول مرة اجي هنا انا عادة بروح مكتبة في شبرا بس قولت اغير جو انس قال لها شبرا ياااه انا جدتي كانت ساكنة في شبرا وبحبها اوي الكلام جاب بعضه وقعدوا يتكلموا ساعة كاملة ياسمين نسيت اصلا انها بتمثل كانت مبسوطة بجد لان انس طلع متواضع اوي وبيتكلم ببساطة ومش شايف نفسه زي ما هدير صورته
من اليوم ده انس بقى كل يوم يستناها في نفس المكان وياسمين بقت تروح وكل مرة بيقربوا من بعض اكتر انس حكالها عن حياته انه اتربى من غير اب وان امه هي اللي ربته وتعبت عليه وانه اشتغل من وهو صغير لحد ما بقى معاه فلوس بس عمره ما لقى حد يحبه لشخصه مش لفلوسه ياسمين سمعت الكلام ده وقلبها وجعها اوي لانها حست انها بتعمل زي البنات اللي هو بيكرههم بس كانت كل ما تحاول تبعد تلاقي نفسها بتقرب اكتر هدير كل شوية تكلمها ها عملتي ايه وقع ولا لسه اطلبي منه يجيبلك حاجة غالية اختبريه ياسمين كانت بتتهرب من هدير ومش بتحكيلها كل حاجة
بعد شهر انس عزم ياسمين على العشا في مكان غالي اوي على النيل ياسمين كانت مكسوفة من اللبس والشياكة بس انس كان بيعاملها كأنها ملكة وفي اخر اليوم قال لها يا ياسمين انا عايز اقولك حاجة انا عمري ما حسيت بالراحة مع حد زي ما حسيت معاكي انتي غير كل البنات اللي عرفتهم انتي طيبة ومثقفة وعينك مش على الفلوس ودي حاجة نادرة اوي دلوقتي ياسمين عيطت فجأة انس اتخض وقال لها مالك فيه ايه قالت له مفيش انا بس مبسوطة اوي انس مسك ايدها وقال لها انا بحبك يا ياسمين