نزلت على السلم ورجلي بتتسابق مع دقات قلبي. كان صوت صريخ حماتي الحاجة آمال لسه بيرن في مدخل العمارة كأنه كابوس مش راضي يخلص، صوت تلطيمها وخوفها على ابنها اللي ضيع نفسه بإيده. ركبت عربيتي وقفلت الباب بالقفل المركزي، وفضلت قاعدة ورا الدريكسيون لثواني بحاول أتنفس، الهوا كان حامي وخانق كأنه بيمر في حلقي بصعوبة، وإيدي بتترعش على المفتاح لدرجة إن العربية ما دارتش من أول مرة.
دورتها وانطلقت، باصة قدامي في المراية على مدخل البيت، شفت حسام طالع يجري على الشارع بقميصه الأبيض اللي اتعفر، بيشاور بإيديه الاتنين وعينيه طالعة لبرة من الرعب، كأنه تاه ومش لاقي سكة يرجع منها. دوست بنزين وسيبته ورا ضهري، سيبت تسع سنين كاملين من عمري بيتبعتروا مع دخان الشكمان وعفار الشارع.
طول الطريق من إسكندرية للقاهرة على الصحراوي، عقلي كان شغال زي مكنة خياطة عطلانة. افتكرت كل مرة حسام كان يجيلي فيها وشايل طاجن ست الحبايب في إيده، كل مرة كان يقولي فيها: معلش يا بطة، أمي غلبانة وطول عمرها شقيانة على إخواتي، كبري عقلك عشان خاطري. افتكرت لما كنت بشتريلها هدايا عيد الأم طقوم دهب، ولما كنت باخدها معايا أفسحها وأشتريلها عبايات من المحلات عشان أحسسها إنها زي أمي بالظبط، مكانتش كلمة بتخرج مني تزعلها، وكنت دايماً ببتلع الإهانة لما تقول قدام سلايفي: مرات حسام أصلها وحيدة ملهاش إخوات، عشان كده مدلوقة علينا. كنت بعدي وأقول دي ست كبيرة في مقام والدتي، والراجل شاري وبيحبني ومش هخرب على نفسي عشان خاطر كلمة طلعت في ساعة صفا.
وصلت بيت بابا في المعادي على الفجر. لقيت الباب موارب، والأنوار كلها والعة كأننا في عز الضهر، وأستاذ رفيق المحامي قاعد على الصالون وفاتح اللاب توب والملفات مفروشة قدامه على الترابيزة. بابا أول ما شافني، قام من مكانه بخطواته الرزينة، شعره الأبيض ووقاره اللي طول عمره بيحسسني إني مسنودة على جبل مبيتهزش. قرب مني وفتح دراعاته من غير ما ينطق ولا كلمة، وأول ما راسي لمست صدره، العياط اللي كنت حابساه طول الطريق انفجر. عيطت بحرقة تسع سنين، عيطت على البنت اللي صدقت إن الحب كافي، واللي كانت فاكرة إن البيت اللي بيتبني على التنازلات ممكن يعيش ويثبت قدام أول ريح.
ططب على ضهري وقال بصوت هادي يوزن بلد: — اهدي يا بنتي، دموعك دي غالية عندي أوي ومفيش راجل في الدنيا يستاهل ينزل منها نقطة واحدة. اللي يخون الأمانة ويطمع في مال مراته وأهلها ميبقاش راجل، وإحنا ربنا كرمنا بإننا كشفنا ده بدري قبل ما نكون تحت رحمتهم. اقعدي واسمعي أستاذ رفيق بيقول إيه.
قعدت وأنا بنشف دموعي وببص للورق اللي على الترابيزة. أستاذ رفيق عدل نضارته وبصلي بنظرة مليانة أسف وجدية، وبدأ يتكلم بصوته الهادي الحاسم: — مدام فاطمة، الموضوع أكبر بكتير من مجرد رهن دهب أمه أو سداد ديون الجمعيات. حسام استغل التوكيل العام اللي عملتيه له لما والدك عمل العملية السنة اللي فاتت، والتوكيل ده للأسف كان فيه بند صريح بيدي له حق التعامل مع البنوك باسمك وفتح حسابات وأخذ قروض وتسهيلات ائتمانية. حسام كان مقدم على قرض استثماري ضخم بضمان حصتك في عمارة المنصورة، والقرض ده قيمته تلاتة مليون جنيه، كان المفروض يتصرف خلال أسبوعين من دلوقتي.
شهقت وحطيت إيدي على بقي: — تلاتة مليون؟! وده كان هيوديهم فين؟ أمه مديونة بمبلغ زي ده؟
رد رفيق وهو بيشاور على ورقة تانية مطبوعة: — لأ يا بنتي، أمه ديونها متجيش ميتين ألف جنيه، ودي ديون الجمعيات الليعملتها عشان تجيب أجهزة كهربائية وشوية عفش لبنتها الصغيرة. حسام كان ناوي ياخد الملايين دي ويحطها في مشروع مقاولات باسمه هو وسلفتك ليلى وجوزها مصطفى أخوه الكبير، يعني كانوا بيعملوا شركة مقفولة على عيلتهم هما التلاتة بفلوسك وضمان شقا أبوكي، وأنتي تبقي لابسة في الحيط ومديونة للبنك، ولو حصل أي تعثر، البنك يحجز على نصيبك في العمارة ويبيعها في المزاد العلني، وهما يخرجوا منها بفلوس سائلة ومشاريع شغالين بيها!
الدنيا لفت بيا، حسيت إن الأرض بتميد تحت رجليا. يعني جوزي، الإنسان اللي كنت بنام جنبه وأنا مطمئنة، اللي كان بيقولي إنتي الهوا اللي بتنفسه، كان بيحفرلي حفرة أدفن فيها أنا وعيلتي عشان يعمل لنفسه اسم على قفانا؟ ده كان بيبيعني بالمعنى الحرفي للكلمة! كان بيخطط مع أمه وأخوه وسلفتي عشان يقلبوني في ورثي المستقبلي، عشان أرجع أمد إيدي ليهم وأبقى تحت رحمتهم.
بابا خبط بإيده على الترابيزة وقال بنبرة قاطعة: — من اللحظة دي، مفيش تراجع يا رفيق. عاوز كل الإجراءات القانونية تاخد مجراها فوراً وبأقصى سرعة.
رد المحامي: — متقلقش يا حاج، أول حاجة عملتها إني بعتت إخطار رسمي على يد محضر للشهر العقاري بإلغاء التوكيل، وحطيت البنك في الصورة بإيقاف صرف أي قروض أو تسهيلات باسم مدام فاطمة، وبلغنا الشؤون القانونية في البنك إن فيه شبهة تزوير واستغلال توكيل بدون إذن الموكل. وتاني خطوة، الصبح بدري هيكون فيه محضر في مباحث الأموال العامة ومحضر سرقة أوراق رسمية وخيانة أمانة ضد حسام، وضد ليلى ومصطفى بتهمة الاشتراك ومحاولة الاستيلاء على أموال الغير.
اليوم ده عدى عليا كأنه سنة كاملة، النوم مكنش راضي يقرب من عيني. كنت قاعدة في أوضتي القديمة في بيت بابا، الأوضة اللي سيبتها بفستان الفرح وأنا فاكرة إني رايحة للجنة. كانت ذكرياتي معاه بتمر قدام عيني زي شريط سينما، كل هدية جابهالي، كل ضحكة، كل خناقة كان بينزل فيها على رجلي عشان يراضيني.. بقى كله كدب؟ للدرجة دي الفلوس بتعمي النفوس وتغير القلوب؟ ولا هو كان كده من الأول وأنا اللي كنت عامية ومش شايفة غير اللي أنا عايزة أشوفه؟
