رغد: انتي عبيطة؟ هو أي حد يجي من الشارع يقولي معجب بيكي أفتح ليه قلبي؟ يلا يا بنتي ورانا محاضرات، بلاش كلام فاضي.
بعد يومين، تقوم رغد بفتح حسابها الشخصي على الفيس بوك، تجد رسالة في طلبات المراسلة من شخص كان مضمونها: ازيك يا رغد، أنا آسر اللي وقفت معاكي برة الجامعة، ممكن تردي عليا ضروري، أنا وصلت للأكونت عن طريق صاحبتك مي.
رغد بحيرة: أعمل ايه مع البني آدم دة؟ أرد ولا ايه؟
بعد دقائق قررت الرد عليه، ووقعت رغد في فخه. استطاع الشيطان أن يصور لها هذا الأمر بأنه شيء عادي، ففي لحظة سقطت مبادئ رغد وقامت بإسقاط ثقة أهلها بها الذين سمحوا لها بفعل أي شيء يحلو لها. لم تفكر للحظة في عائلتها ولم تحترم غيابهم. وبالفعل ردت عليه، استمر هذا الوضع لمدة شهر، كل يوم محادثة.
ثريا: أنتي بتعملي ايه؟
رغد بتوتر: ولا حاجة يا ماما.
ثريا: بتكلمي مين؟ كنت سامعة همس.
رغد: مش حد يا ماما، كنت بكلم نفسي. هلبس ايه بكرة للكلية وبراجع المحاضرة اللي ذاكرتها كتذكرة.
ثريا: طيب يا حبيبتي، تصبحي على خير.
باااااك
رغد بندم: سامحني يارب، فعلًا فوقت متأخر. كان فعلًا الآية دي إنذار ليا إني أرجع وأتوب، ولكن فضلت مصممة أكمل الطريق ده للنهاية، وكانت نهايته ضباب كله كدب وخداع وخسارة.
التفت يونس لمصدر الصوت وجد والده قال: بابا، عرفت منين إني هنا؟
محمد: أنت فاكر يا ابني، مش حاسس بيك ولا بوجعك على مراتك؟ أنا عارف إنك مغصوب على جوازك من رغد، بس الحياة يا ابني مش هتفضل على حالها، لازم تتغير وتدي فرصة لقلبك وتعيش حياتك وتكون أسرة، أنت لسه صغير.
يونس: صغير يا بابا؟ أنا عندي 32 سنة. جوزتني عيلة وسكت ورضيت، لكن مستحيل تشاركني حياتي وقلبي.
محمد: رغد مش عيلة أوي، الفرق بينكم تسع سنين بس. مش بالسن يا ابني، بالعقل.
يونس: هي لا عقل ولا سن، دي واحدة طايشة، كلمة توديها وكلمة تجيبها، دي هبلة.
محمد: عشان خاطري وخاطر أبوها، استحملها. يرضيك صاحب عمري يلجأ ليا وأكسر بخاطرة وموقفش جنبه؟
يونس بغضب: وأنا ذنبي ايييه يا بابا؟
محمد: ذنبك إنك ابني. أنا عملت لكدة لمصلحتك وعشانك، قلبي موجوع عليك يا ابني وعلى حالك.
يونس: أنا كدة كويس ومرتاح.
محمد: بس أنا مش مرتاح. أوعدني إنك هتشوف حياتك.
يونس: أنا آسف، مقدرش، لأن وعد الحر دين، مقدرش أوعدك بحاجة صعب أوفيها يا بابا.
محمد بيأس: ربنا يصلح حالك يا ابني.
وطبط على كتفه وتركه وحل.
يونس وهو يمسح بيده على قبر زوجته قال: شايفة، مستكترين عليا أعيش مع ذكرياتك بس؟ متخافيش، أنا هفضل زي ما أنا، حبيبك وجوزك، ملكك، مش هسمح بشريكة تانية تاخدني منك. خليهم يحلموا، الحلم مش بفلوس. ورغد استحالة تكون جزء من حياتي، استحالة تعوض مكانك، استحالة أتقبلها كزوجة. هي مجرد صورة خارجية للمجتمع مش أكتر.
عند رغد وهي تبكي وتقول: أنا ايه اللي عملته في نفسي دة؟ إزاي كنت عامية بحب آسر؟
وتسرح بذاكرتها مرة أخرى.
فلااااش بااااك
في مكان عام تجلس رغد بتوتر وأمامها آسر.
آسر: مالك يا رغد؟ مش على بعضك ليه؟
رغد: أصل أول مرة أخرج مع حد غريب وأكذب على ماما.
آسر: وضع مؤقت، أوعدك كل حاجة هتبقي رسمي.
رغد بنفاذ صبر: أمتى يا آسر؟ بقالنا ست شهور على الوضع دة، وكل لما أفتح ليك موضوع هتخطبني امتى بتهرب مني.
آسر: بس أنا حاليًا مش مستعد.
رغد: يبقى نقطع علاقتنا. لم تستعد، أنا تعبت.
آسر: وفيها ايه؟ هي أول مرة، وبعدين أنا هخطبك قريب. مش أنا حبيبك يا رغد؟
نعم عزيزي القارئ، فرغد هي ضحية شاب فاسد كاذب، اكتسب قلبها باسم الحب والكلام الرومانسي الرائع الذي يذيب الروح والقلب، من أجل الحب والارتباط تنازلت عن الكثير وتعمقت في تلك العلاقة التي ليس لها مسمى سوى لعبة، وستدفع ثمن تنازلاتها قريبًا.
