أم سارة: أهدي بس، فهميني في إيه.
حكت أم قاسم كل اللي حصل لأم سارة، وطلعوا جريوا على البيت ولقوا سارة واقعة في الصالة مغمى عليها. فوقوها ونقلوها الأوضة، وبعد ما فاقت فضلت تصوت وتعيط لحد ما طلبوا لها الدكتور وأداها حقنة مهدئة نامت بعدها.
وصل جثمان قاسم، وصلوا صلاة الجنازة وراحوا دفنوه في المقابر.
ومر يومين، وسارة وأم قاسم كل واحدة منهم قاعدة تعيط مش مصدقة إن قاسم خلاص راح. وسارة حالتها النفسية اتأخرت وبقت مبتتكلمش مع حد عدا أول أسبوع. وظهرت نتيجة سارة.
محمد: ألف مبروك يا بنتي، نجحتي وبدرجات عالية وهتدخلي هندسة إن شاء الله.
سارة: ………
محمد: يا بنتي، ردي عليا. انتي هتفضلي كدا على طول؟ ولا بتاكلي ولا بتتكلمي حتى؟ نتيجتك اللي كنتي مستنياها مش فرحانة بيها؟ دا انتي هتدخلي الكلية اللي طول عمرك بتحلمي بيها. عشان خاطري اتكلمي، قولي أي حاجة.
سارة: أنا كنت عاوزه النتيجة تظهر عشان أفرح قاسم بيها، بس هو خلاص راح وخد كل حاجه حلوه معاه.
محمد: يا سارة، دا قضاء ربنا ومش هنعترض عليه، ومينفعش نوقف حياتنا. لازم نكمل، وانتي مبتحاوليش حتى تفكري في مستقبلك. قاسم لو كان لسه عايش مكنش هيعجبه اللي انتي بتعمليه.
سارة: قاسم لو كان عايش مكنش هيحصلي كدا.
محمد: بس…
سارة: بعد إذنك يا بابا، أنا تعبانة وهدخل أنام.
دخلت سارة أوضتها وفضلت تعيط لحد ما نامت، وحلمت بقاسم جاي وحواليه نور، بيبصلها بحزن وهي بتنادي عليه، وسبها ومشي. وفجأة وقف وقالها:
قاسم: انتي وعدتيني إن ضحكتك تفضل على وشك.
سارة: طول ما انت بعيد عني أنا مبعرفش أضحك.
قاسم: أنا جنبك وحواليكي، ومبحبش أشوفك حزينة. ولو فضلتي لبسه أسود مش هتشوفيني تاني.
سارة: انت سيبني ورايح يا قاسم؟ متسبنيش بالله عليك، أنا مش عارفه أعيش من غيرك.
قاسم: أنا مش سيبك، أنا معاكي دايما، بس مش هتشوفيني تاني غير لما توفي بوعدك.
سارة: استنى يا قاسم، متمشيش.
صحيت مفزوعة من النوم، ولقت مامتها داخله عليها.
أم سارة: مالك يا حبيبتي؟ عاملة كده ليه؟
سارة: كنت بحلم.
أم سارة: خير اللهم اجعله خير. المهم يا حبيبتي، البسي وتعالى عشان في حد عاوزك.
خرجت سارة ولقت أم قاسم مستنياها.
أم قاسم: ازيك يا حبيبتي؟ عاملة إيه؟
سارة: الحمد لله يا ماما، حضرتك عاملة إيه؟
أم قاسم: أنا كويسه الحمد لله. أنا جيالك عشان عاوزاكي في موضوع مهم.
سارة: قولي يا ماما، قلقتيني.
أم قاسم: قاسم ابني جالي في الحلم وأنا نايمة، وواقف بعيد وبيبصلي وهو زعلان وبيقولي: سارة.
سارة: وجالي أنا كمان في الحلم.
وحكت سارة الحلم لأم قاسم.
أم قاسم: قاسم زعلان على حاجه، ومش عاوزك تلبسي أسود وتحزني. وطول ما انتي لابسه أسود هو هيفضل زعلان ومش مرتاح. انتي لازم تقلعيه يا سارة.
سارة: بس أنا مش هقدر يا ماما.
أم قاسم: الحزن في القلب يا بنتي مش باللبس، وبعدين انتي مش قادره تقلعي الأسود وقادره تزعلي قاسم؟
سارة: لا، أنا مقدرش إنه يبقا زعلان مني. خلاص أنا هقلعه لو كان ده هيخليني أشوفه كل يوم في حلمي.
مر شهر، وسارة بتحاول تكون طبيعيه عشان متزعلش قاسم ويجيلها كل يوم في الحلم، بس مش عارفه ترجع زي الأول. أم قاسم سافرت عند ابنها مصطفى السعودية وهتقعد معاه على طول.
الحلقة الرابعة
الدراسة خلاص على الأبواب، وأخيرًا سارة هتدخل كلية هندسة اللي بتحلم بيها.
أم سارة: اجهزي النهارده يا سارة عشان ننزل نشتريلك هدوم الكلية وتشوفي اللي انتي محتجاه إيه.
سارة: لا يا ماما، أنا مش محتاجه هدوم ومش عاوزه أخرج.
أم سارة: لا يا سارة، محتاجه هدوم ومحتاجه تخرجي من اللي انتي فيه ده. فوقي لنفسك بقا، انتي بتضيغي نفسك ليه؟!
سارة: يا ماما، انتي مكبره الموضوع ليه؟ أنا كويسه قدامكم أهو، بتكلم وباكل وبشرب وعايشه زي الناس.
أم سارة: لا، مش زي الناس. انتي وقفتي حياتك على موت قاسم، حتى مستقبلك مبتفكريش فيه. انتي لازم تبوصي لقدام بقا.
سارة: عاوزاني أعمل إيه يعني؟ أتنطط عشان تستريحوا؟
أم سارة: قومي البسي عشان هننزل كمان شويه.
سارة: حاضر يا ماما، مادام ده هيريحك.
نزلوا وراحوا على محلات اللبس.
أم سارة: بوصي يا سارة، حلو أوى الفستان ده، هيبقا تحفه عليكي.
سارة: امممم، كويس.
أم سارة: هو إيه اللي كويس دا؟ تحفه! يلا ادخلي قيسيه.
سارة: حاضر.
