قاسم: بجد… قصدي الله يبارك فيك يا عمي.
أم قاسم: خلاص نقرا الفاتحة على خيره. الله، الخطوبة تكون الإجازة الجاية.
قروا الفاتحة ودخلت الفرحة البيت، وصوت الزغاريط ملا البيت، وسارة كانت طايرة من الفرح. طلب قاسم من محمد إن بكره ياخد سارة وينزلوا يجيبوا الشبكة وحاجة الخطوبة عشان إجازته هتخلص، ووافق محمد.
تاني يوم جه، وسارة لبست واستنت قاسم عشان ينزلوا سوا. لقت تليفونها بيرن.
قاسم: ألو… انزلي يا سارة، أنا تحت.
سارة: حاضر، أنا نازلة أهو.
نزلت سارة لقت قاسم مستنيها في العربية، وأول ما شافها نزل وفتحلها الباب.
قاسم: هو فيه حلاوة بالشكل ده؟
سارة بغرور: لا طبعًا.
قاسم: ليكي حق يا ستي تقولي كده.
سارة: ميرسي، قالولي كده كتير.
قاسم: ومين اللي قالولك كده إن شاء الله؟
سارة: يااااااه، كتير أووووى… ماما وبابا وأصحابي.
قاسم: ااااه، قولتيلي ماما وبابا وأصحابك.. بس مني أحلى أكيد.
سارة: مش فاهمة الغرور اللي انت فيه دا الصراحة.
قاسم: أنا بردوا اللي مغرور، بس مش مشكلة، مغرور عشان بحبك.
سارة: احم…
قاسم: طب قوليلي وانا كمان ولا أي حاجة، بلى ريقي، أبوس إيديك.
سارة: يلا بقا عشان منتأخرش.
قاسم: خلاص يا قلبي، براحتك، قوليها لي وقت ما تبقى عاوزه تقوليها.
وصلوا المكان اللي رايحينه. دخلوا وقعدوا يلفوا في محلات الدهب لحد ما دخلوا محل كبير أوووى.
سارة: حلو أوووى، الخاتم ده تحفة بجد.
قاسم: لو سمحت، ممكن نشوف الخاتم ده.
صاحب المحل: الخاتم ده مش موجود منه غير قطعة واحدة بس، مبيخدوش غير الناس المميزة.
قاسم: طب ياريت نشوفه.
سارة: الله، بوص شكله حلو في إيدي ازاي.
قاسم: مبروك عليكي يا حبيبتي.
صاحب المحل: أحطهولك في علبة؟
قاسم: أكيد طبعًا، وطلعلي الفاتورة.
صاحب المحل: الخاتم حقه 100 ألف يا فندم.
سارة: انت بتهزر؟ لا طبعًا، دا غالي أوووى.
قاسم: مفيش حاجة تغلى عليكي يا قلبي.
سارة: بس أنا مش عاوزه الخاتم ده.
قاسم: ليه بس؟! دا كان عجبك.
سارة: لا، مش عجبني، الخاتم دا أحلى بكتير.
اختارت سارة خاتم تاني بسعر أقل، وراحوا لمحل الفساتين واشترت سارة فستان ومرضتش تخلي قاسم يشوفه، وراحوا يشتروا بدلة لقاسم.
قاسم: شوفتي، أنا خليتك تشوفي البدلة بتاعتي وانتي مش راضية تخليني أشوف الفستان.
سارة: عشان يبقا مفاجأة.
قاسم: أنا عاوز أطمن بس.
سارة: لا متقلقش، أنا ذوقي حلو.
قاسم: ما أنا عارف، عشان كدا وقفتي عليا طبعًا.
فضلوا طول اليوم يلفوا على المحلات يشتروا حاجات لسارة لحد ما تعبوا وروحوا.
تحت البيت:
قاسم: أنا مسافر بكره.
سارة: بالسرعة دي؟ انت لحقت تقعد؟
قاسم: أعمل إيه، إجازتي خلصت ولازم أرجع، وكلها شهر وأجي تاني.
سارة: طب هتسافر امتى؟ أنا لازم أشوفك قبل ما تسافر.
قاسم: هسافر الفجر، مينفعش تيجي في الوقت ده. يلا أودعك دلوقتي.
سارة: يعني كمان هتسافر من غير ما أشوفك؟
قاسم: غصب عني، لازم أوصل هناك بدري. يلا، أشوف وشك بخير.
سارة بحزن: تروح وترجع بالسلامة.
ودعوا بعض وكل واحد طلع بيته.
تاني يوم الصبح، سارة لقت فرح، صحبتها من الطفولة، بتتميز إنها قصيرة شويه وعينيها زيتي وخفة دمها، بتتصل عليها.
فرح: صباح الخير يا سوسو.
سارة: صباح النور يا فرح.
فرح: بقولك إيه، عاوزاكي في موضوع مهم، هستناكى كمان ساعة في كافيه….
لبست سارة وراحت لفرح الكافيه، ولقتها مستنياها بره.
فرح: ادخلي اقعدي جوا يا سارة، هجيب حاجة من هنا وجايه.
سارة: حاضر، بس متتأخريش.
دخلت سارة ولقت المكان مظلم، شكت إن النور مقطوع، ولسه هتطلع سمعت صوت قاسم. بتبص لقته لابس لبس الجيش وقاعد على ركبه وماسك علبه في إيده فيها الخاتم اللي كان في المحل.
سارة: قااااسم.
قاسم: بحبك يا ملكة قلبي.
سارة: انت هنا؟ مسافرتش؟
قاسم: مقدرش أمشي من غير ما أشوفك.
سارة: بحبك يا قاسم.
قاسم: قوليها تاني.
سارة: بحبك.
قاسم: لا، اسمي أول مرة أعرف إنه حلو كده.
سارة: هههههههههههههه.
قاسم: ضحكتك حلوه أوى، اوعديني إنها تفضل على وشك مهما حصل.
سارة: أوعدك.
قاسم: واوعديني إنك تفضلي لبسه الخاتم ده طول ما انتي بتحبيني.
سارة: أوعدك إني هفضل لبساه طول عمري.
ياترى السعادة ديه هتكمل؟ وسارة هتكون من نصيب قاسم ولا لأ؟
الحلقة الثالثة
سافر قاسم المعسكر بتاعه، وكان بيتصل بسارة قليل جدًا عشان الشبكة هناك مش بتجمع دايما. وقبل معاد الخطوبة بيومين اتصل قاسم بسارة.
سارة: ألو… ازيك يا قاسم.
قاسم: ازيك يا حبيبتي، انتي عاملة إيه؟ وحشتيني أوووى.
سارة: وانت كمان، باقي يوم وترجع بالسلامة ونفرح كلنا.
قاسم: إن شاء الله، انتي مش متخيلة أنا مستني بكره ازاي عشان أرجع وأشوفك.
سارة: ربنا يرجعك بالسلامة.
قاسم: هتوحشني لحد بكره.
سارة: هستناك عشان أشوفك أول ما ترجع.
مر اليوم وراحت سارة البيت عند أم قاسم عشان تستنى قاسم لما يرجع.
سارة: قاسم اتأخر أوى يا ماما، دا كلمني امبارح وقالي إنه هيرجع الساعة 1، والساعة بقت 4 دلوقتي.
أم قاسم: الغايب حجته معاه يا بنتي، هتلاقي الطريق زحمة.
فجأة سمعوا صوت التليفون بيرن.
سارة: أنا هرد، دا أكيد قاسم.
المتصل: ألو، السلام عليكم.
سارة: عليكم السلام، مين حضرتك؟
المتصل: دا بيت قاسم عبد الله؟
سارة: أيوا يا فندم، ده بيته.
المتصل: أنا عاوز أقولكم البقاء في حياتكم، قاسم استشهد النهارده في تفجير إرهابي.
التليفون وقع من إيد سارة ووقعت على الأرض أغمى عليها.
أم قاسم: سارة يا بنتي، فوقي، قوليلي إيه اللي حصل.
لقت التليفون لسه مفتوح.
أم قاسم: ألو، يا بني خير في إيه؟ انت قولتلها إيه؟
المتصل: البقاء لله يا أمى، ابنك كان بطل.
أم قاسم: البقاء لله في مين؟ قاسم ابني؟ انت بتضحك عليا يا بني؟ دا لسه مكلمني امبارح وقالي إنه راجع، بس هو اتأخر شويه.
المتصل: ……
أم قاسم: رد عليا يا بني، قولي انت هيتأخر كام ساعة ولا كام يوم ولا شهر حتى، المهم إنه جاي.
المتصل: أنا عارف إن الصدمة كبيرة، بس احنا جايبين الجثمان وهنوصل كمان ساعة عشان صلاة الجنازة. البقاء في حياتك يا أمى.
قفلت أم قاسم الخط وهي مش مصدقة إن قاسم ابنها خلاص مات. راحت تجري على بيت سارة وخبطت عليهم، فتحت لها أم سارة اللي اتفاجأت بأم قاسم وهي منهارة من العياط وبتقولها: قاسم مااااات.
أم سارة: قاسم! قاسم مين؟ ازاى؟
أم قاسم: ابني مات، سندي في الدنيا راح خلاص.
