جبروت الحب

الحلقة الأولى

سارة، بنت جميلة جدًا بتتميز بلون بشرتها الأبيض وشعرها الطويل البني وملامحها البسيطة وعينيها البني، كان آخر يوم ليها في امتحانات الثانوية العامة. وكانت خارجة من المدرسة فرحانة إنها أخيرًا خلصت الامتحانات وحلت كويس جدًا. وهي خارجة لقت قاسم، جار سارة، شاب بيتميز بطوله وجسمه الرياضي ووسامته، متخرج من كلية هندسة، واقف قدام المدرسة. استغربت في الأول وقالت أكيد صدفة. بصتله بابتسامة ومشيت.

بس اللي مكنتش متوقعة إنها لقته بينادي عليها.

قاسم: سارة، لو سمحتي ممكن خمس دقايق؟ عاوز أتكلم معاكي في موضوع مهم.

سارة: ممكن، بس ياريت منتأخرش.

قاسم: متقلقيش، مش هنتأخر. هنقعد في أي كافيه بس عشان مينفعش نتكلم في الشارع.

سارة: امممم، ماشي.

راحوا قعدوا في كافيه على النيل.

قاسم: تشربي إيه؟

سارة: متشكرة، ادخل في الموضوع على طول.

قاسم: خلاص هطلبلك على ذوقي.

طلب من الجرسون 2 عصير مانجا.

قاسم: يارب تكوني بتحبيها.

سارة: متقلقش، مبشربش غيرها تقريبًا.

قاسم: ندخل في الموضوع اللي عاوزك فيه. بصي يا سارة، أنا بحبك من زمان، من يوم ما اتولدتي تقريبًا. كنت بقف كل يوم في البلكونة عشان أشوفك وانتي نازلة أو طالعة البيت. كنت كل يوم بمشي وراكي الصبح وانتي رايحة المدرسة عشان أطمن عليكي. أنا بحبك أكتر من نفسي وهفضل أحبك على طول. وكنت مستني الوقت اللي أروح أطلبك فيه من والدك، بس اللي خلاني أجي أقولك دلوقتي إني رايح الجيش بكره، وكان نفسي أخطبك قبل ما أدخل الجيش. بس انتي كنتي في امتحانات، وإن شاء الله هاجي أتقدملك بعد أول إجازة أنزلها. ها، هتوافقي عليا؟

سارة كانت طول ما قاسم بيتكلم بتسمعه وهي متوترة ووشها أحمر.

سارة: اه.. لا.. قصدي اللي بابا يقول عليه.

قاسم: أفهم من كدا إنك موافقة مبدئيًا.

سارة: ……….

قاسم: بيقولوا السكوت علامة الرضا.

سارة: أنا عاوزة أروح، أنا اتأخرت أوووى.

قاسم: أنا آسف إني أخرتك، اتفضلي معايا أوصلك.

سارة: اتفضل فين! لا طبعًا، أنا هروح لوحدي.

قاسم: أمال لو مكنتش جاركم وطريقنا واحد كنتي هتعملي إيه! يلا يا سارة عشان متتأخريش أكتر من كدا.

سارة: لا، أنا هركب تاكسي وأروح لوحدي.

قاسم: خلاص يا ستي، اعتبريني سواق تاكسي واركبي معايا أوصلك.

بعد إصرار كبير من قاسم وافقت سارة إنه يوصلها، وركبت ورا. وقاسم طول الطريق بيبوص عليها في المراية، وكل مرة يلاقيها بتبص تحت ووشها لسه أحمر.

وصلت سارة البيت، وكانت سارة في قمة سعادتها. أخيرًا قاسم اللي طول عمرها بتحبه اعترف لها إنه بيحبها وهيجي يخطبها. ونامت وهي أسعد واحدة في الكون.

صحيت الصبح لقت رسالة من رقم غريب مكتوب فيها: “صباح الخير على أميرتي وملكة قلبي. كان نفسي تبقى آخر حد أشوفه قبل ما أسافر، بس اللي مصبرني إني هرجع قريب وأتقدملك. بحبك، قاسم.”

سارة: وأنا بعشقك.

ومر شهر وسارة مستنية اليوم اللي هيجي فيه قاسم.

في يوم الخميس لقت قاسم بيرن.

سارة: ألوووو.

قاسم: ألووو… سارة، أنا مش سامعك كويس، ممكن تطلعي البلكونة عشان الشبكة.

سارة: حاضر، طالعة أهو.

فتحت البلكونة ولقت قاسم واقف في البلكونة اللي قدامها ولابس لبس الجيش.

قاسم: إيه رأيك في المفاجأة دي؟ حبيت تكوني أول حد أشوفه لما أرجع.

سارة: حمد الله على سلامتك.

قاسم: حمد الله على سلامتك! مفيش وحشتيني حتى؟

سارة: لا مفيش، ولو كان عجبك كمان.

قاسم: عجبني وعجبني جدًا كمان. المهم يا سوسو، عاوزك تحضري نفسك بكره عشان هاجي وأجيب والدك عشان أتقدملك.

سارة: بكره على طووول كده؟ مش تستريحلك يومين؟

قاسم: أنا اشتكيتلك إني تعبان؟ دا أنا مصدقت إني نزلت إجازة عشان أجي أتقدملك. لولا الوقت متأخر كنت جيت دلوقتي.

سارة: طب أسيبك ترتاح، انت أكيد جاي تعبان وعاوز تنام.

قاسم: أنا كنت جاي تعبان فعلًا، بس لما شوفتك ارتحت.

سارة: طب ادخل نام ونتكلم بكره.

قاسم: تصبحي على خير يا حبيبة قلبي.

سارة: احم… وانت من أهله.

جه تاني يوم، وسارة بدأت تجهز لزيارة قاسم ووالدته هي وأهلها. مر الوقت بسرعة وجه المعاد اللي هيجي فيه قاسم.

محمد (والد سارة): اتفضل يا قاسم، نورتنا يا حبيبي، حمد الله على سلامتك.

قاسم: الله يسلمك، البيت منور بأصحابه.

أم قاسم: انتو مش عارفين غرض زيارتنا ليكو. أنا كلمت أم سارة قولتلها إن قاسم عاوز حضرتك في موضوع، وهو بقا اللي يقولك.

محمد: اتفضل يا بني، خير.

قاسم: من غير مقدمات يا عمي، أنا جاي أتقدم لسارة بنت حضرتك.

محمد: سارة! بس دي لسه مخلصة الثانوية وقدامها لسه كلية.

أم قاسم: لو على الدراسة تكملها وهما مع بعض، بس نعمل خطوبة ونشوف الخير فين.

محمد: انتم فجأتوني الصراحة، مش عارف أقولكم إيه. سيبوني يومين أفكر.

أم قاسم: هنستنى ردك وإن شاء الله خير.

قعدوا يتكلموا شوية لحد ما استأذنوا وخرج قاسم من عند أهل سارة وهو خايف إنهم يرفضوه.

أم سارة: وانت هتعمل إيه يا محمد؟ هتوافق ولا إيه؟

محمد: مش عارف، هو بصراحة شاب كويس ومحترم، بس البنت لسه قدامها كتير على ما تخلص دراستها.

جبروت الحب – الحلقة الثانية

أم سارة: خلاص، شوف رأي سارة إيه واعمل اللي انت عاوزه.

محمد: أنا هعمل كدا.

راح محمد لسارة لقاها قاعدة في أوضتها سرحانة.

محمد: الجميل سرحان في إيه؟

سارة: هاه… ولا حاجة يا بابا.

محمد: طب أنا عاوز آخد رأيك في موضوع قاسم.

سارة: اللي حضرتك شايفه صح اعمله.

محمد: يا سارة، أنا نفسي أشوفك أسعد واحدة في الدنيا، ونفسي أفرح بيكي، بس مش عاوز أخليكي تيجي على دراستك. بصي يا بنتي، أنا عارف إن قاسم شاب محترم ومجتهد وأخلاقه كويسة وبيحبك كمان، بس عاوز أعرف موافقة ولا لأ.

سارة: ………..

محمد: يبقى موافقة. ألف مبروك يا حبيبتي، أنا بكره هبلغهم إننا موافقين.

جه تاني يوم واتصل محمد بقاسم وقاله إنه يجي يزورهم بالليل. قاسم ووالدته وصلوا في المعاد بالظبط ودخلوا قعدوا مع محمد.

محمد: قاسم يا بني، أنا عارف إن الجواز ده مسئولية كبيرة ومش سهلة.

قاسم: عارف طبعًا يا عمي، وإن شاء الله هكون قد المسئولية.

محمد: وعارف طبعًا إن سارة بنتي الوحيدة، وأنا طول عمري شيلها في عنيا.

قاسم: وأنا أوعدك إنها هتبقا جوا عنيا ومش هزعلها أبدًا.

محمد: أنا عارف إنك راجل وابن حلال، عشان كده أنا وافقت على خطوبتك من سارة، ومتأكد إنك هتخلي بالك منها. ألف مبروك يا بني.