لفوا شويه على محلات اللبس واشتروا هدوم كتير ورجعوا، وسارة طول الخروجه ساكته مبتتكلمش إلا للضرورة.
عدى أسبوع، وجه أول يوم لسارة في الكلية، وراح باباها وصلها لحد الكلية عشان يطمن عليها.
محمد: يلا يا سارة، ربنا يوفقك، خلي بالك من نفسك.
سارة: حاضر يا بابا.
محمد: حد من أصحابك معاكي؟
سارة: اه، فرح كلمتني ومستنياني جوا عشان ندخل المحاضرة مع بعض.
محمد: ماشي يا حبيبتي، خلصي محاضراتك وتعالى على البيت متتأخريش.
سارة: حاضر يا بابا.
دخلت سارة الكلية وقابلت فرح.
فرح: صباح الخير يا قلبي.
سارة: صباح النور.
فرح: وحشاني كتير كدا يا سارة؟ كل ما أكلمك عشان نخرج في الإجازة تقوليلي لأ.
سارة: وانتي كمان وحشتيني، بس معلش سامحيني، أنا كنت تعبانه طول الإجازة.
فرح: طب يلا بينا ندخل المدرج عشان المحاضرة هتبدأ، والدكتور بتاعها صعب أوووى.
دخلوا المدرج ودخل الدكتور وبدأ يشرح، وسارة مركزة في كل حاجه بيقولها، لحد ما دخل شاب، يوسف، في آخر سنه في هندسة، شعره بني وعينيه لونها أزرق وطويل وجسمه رياضي بيتميز بعضلاته البارزه، المدرج وبيستأذن.
يوسف: بعد إذنك يا دكتور، اتأخرت غصب عني.
د. هشام: أعتقد أنكم عارفين كويس إن محدش بيدخل بعدي مهما كان، اتفضل اطلع بره.
انسحب يوسف من غير كلام وطلع بره المحاضرة.
سارة طول المحاضرة مركزة وحبت شرح الدكتور واحترمته جدًا لما لقت قد إيه بيحترم المواعيد. وخلصت المحاضرة، وطلعت سارة وفرح راحوا على الكافتريا لحد معاد المحاضرة الجايه.
فرح: شرح د/هشام حلو أوى، وتقريبًا هو الوحيد اللي بيشرح في الكلية ديه.
سارة: انتي عرفتي منين المعلومات ديه؟
فرح: صاحب أخويا بيدرس هنا في الكلية وهو اللي فهمني النظام هنا.
سارة: اه.
فرح: على فكره، أحنا شوفناه النهارده.
سارة: شوفنا مين؟ احنا لسه خارجين من المحاضرة مشوفناش حد.
فرح: لا، احنا شوفناه في المحاضرة، هو الشاب اللي دخل متأخر.
سارة: شكله مستهتر أوى.
فرح: ههههههه.. يوسف مستهتر؟ دا مواعيده كانت دايما مظبوطه. فادي أخويا كان دايما بيذله في الشارع مستنيه ويتأخر عليه، والواد يعيني كل مره يوصل في معاده وفادي دايما مأخره. وكان دايما بيهزر وضحكته مبتفرقش وشه، بس من وقت ما والدته اتوفت وهو اتغير وبقى دايما عصبي ومبيتكلمش مع حد، لدرجه إنه آجل السنة اللي فاتت ومدخلش الامتحانات بسبب فترة الاكتئاب اللي كل فيها.
سارة: تقريبًا اللي بيسبونا بيخدوا كل حاجه حلوه فينا.
فرح: طب أقولك على الكبيره بقا، يوسف يكون ابن د/هشام.
سارة: بجد! ابنه وكرشه قدام المدرج كله؟
فرح: د/هشام معندوش ياما ارحميني.
قضوا بقيت اليوم في المحاضرات، وأخيرًا خرجوا من آخر محاضرة وهما تعبانين جدًا.
فرح: أنا تعبانه أوى، إيه الإرهاق ده؟ الواحد مش لاحق يتنفس.
سارة: انتي عاوزه تتعلمي من غير مجهود؟
فرح: ههههههه، لا يموتوني عشان بيعلموني.
سارة: طب يلا بينا عشان منتأخرش.
فرح: تعالى معايا أوصلك بالعربيه.
سارة: لا بلاش أتعبك معايا.
فرح: تعب إيه يا بنتي؟ دا احنا أخوات.
ركبت سارة مع فرح ووصلتها.
مر أسبوعين، وسارة منتظمه في محاضراتها وبتقعد طول الوقت سرحانه بتفكر في قاسم. وكل يوم تنام بتعيط لحد ما في يوم قاعده في الكافتريا بتبص لقت واحد شبه قاسم واقف بعيد، قامت تجري عشان تلحقه وهي بتجري خبطت في حد ومحاولتش تعتذر أو تشوف مين، كملت جري وبقت زي المجنونه بتحاول تدور على قاسم وسط الطلبه، ولما ملقتوش رجعت الكافتريا.
فرح: إيه يا بنتي؟ طلعتي تجري مره واحده كده ليه؟ وروحتي فين؟
سارة: مفيش حاجه، أنا تعبانه وعاوزه أروح.
فرح: مش هتكملي المحاضرات؟
سارة: لا، ويلا باي بقا.
فرح: باي.
