ساري بفضول:
— قالوا إيه؟
عبد الحميد:
— لمحوا أو نشروا كلام في كل مكان إن العروسة مكانتش بنت، وإن ابنهم اكتشف ده يوم الدخلة. رغم إن أخلاق البنت بصراحة لا غبار عليها… المهم اللي أكد كلامهم إن بعد كام شهر ظهر لصافي ولد. لسه مولود.
ساري:
— خلفت؟ يعني قصدك كانت حامل؟
عبد الحميد:
— في ناس قالت كده.. رغم إنها كانت أودامي كل يوم في الجرنال زي ما انت شايف كده، ومبانش عليها يعني لا حمل ولا بطنها كبرت في يوم.
ساري:
— أمال إيه يعني؟ ابنها ولا مش ابنها؟
عبد الحميد:
— معرفش.. في ناس قالوا إن في ستات مش بيظهر عندهم الحمل، يعني بطنهم مبتكبرش وتبان.. الخلاصة محدش عارف إيه اللي حصل يوم الدخلة وخلاها تتطلق، ولا حد عارف الولد اللي ظهر ده ابن مين.
ساري بابتسامة خبيثة:
— وهي دي محتاجة إجابة؟ جوزها اكتشف إنها مش بنت وطلقها، وزى ما بتقول كانت حامل وخبت ده باللبس والكورسيهات بتاعة الستات لحد لما ولدت. لا، جاحدة أوي وواثقة من حالها.
عبد الحميد:
— آه، بس في نقطة نسيت أقولها لك.
ساري:
— إيه؟
عبد الحميد:
— جوزها طارق ابن الوزير، أو طليقها.
ساري:
— ماله؟
عبد الحميد:
— من يوم طلاقهم، يعني من تلات سنين تقريبًا، وهو بيطاردها في كل مكان. ويبقى نهاره أسود اللي يفكر بس يقرب منها أو يفكر فيها، وأي عريس بيطفشه. ده غير إنه هو اللي بينزل إعلانات في الجرنال كله تقريبًا عشان خاطر صافي.
ساري باستغراب:
— غريبة. ده حب؟ ده، ولا جايز يكون عاوز ينتقم منها على اللي عملته فيه، أو مش قادر ينسى حبه لها؟
عبد الحميد:
— جايز… المهم ياريت تبعد عنها، مش ناقصين مشاكل ووش. والبنت بصراحة رغم كل اللي مرت به ده ملتزمة جدًا في شغلها، ومن أكفأ الصحفيين، مش هنا بس في مصر كلها، ومقال ابوها الأسبوعي سبب من أسباب مبيع الجريدة.
ساري:
— طيب، أنا عاوز اجتماع ضروري للجريدة في خلال ساعة قبل ما أنزل للوكالة وشركة الإنتاج.
عبد الحميد:
— حالًا.
قالها وغادر منصرفًا للخارج.
الفصل الثاني
كانت صافي منشغلة بمراجعة المواضيع التي تناقشها حين اقتربت منها نهى صديقتها وزميلتها بالجريدة قائلة لها بصوت منخفض:
— صافي، عرفتي إن الجرنال وكل الشركات ودار النشر اتباعت لواحد عربي؟
صافي:
— آه، بابا قالي. انتي عارفة إن عمو محسن صديق لبابا من سنين.
نهى:
— يا بنت الإيه.. طب مش تقولي.
صافي:
— ماهو أنا معنديش معلومة غير إن الجرنال وباقي الشركات اتباعوا لواحد شريك عمو محسن وصاحبه من زمان.
نهى:
— آه شفته من شوية داخل المكتب ورا عبد الحميد، بس إيه راجل إيه حاجة كده، وهم من بتوع المسلسلات التركي، وسامة إيه وطول إيه وعضلات إيه، ولا البدلة حاجة كده تيجي بكام ألف براند أصلي.
صافي:
— طيب يا بتاع البراند، سيبني أشوف شغلي وروحي شوفي وراكي إيه.
نهى:
— طمنيني على كيمو عامل إيه النهاردة.
صافي بتأثر:
— والله تعبان لسه يا نهى. بس درجة حرارته نزلت عن الأول. ده كويس إن ماما متبعاه، انتي عارفة إنها دكتورة، لولا كده كان ممكن يضيع مننا لا قدر الله.
نهى بتأثر:
— ربنا يخليه لك يارب يا حبيبتي.
فجأة انتبها لصوت عبد الحميد في صالة التحرير أمامهم يدعو كل رؤساء الأقسام لاجتماع عاجل في غرفة رئيس مجلس الإدارة الجديد.
بعد وقت دخلت صافي مع نهى. جلس الجميع في أماكنهم حول منضدة الاجتماعات الكبيرة في انتظار ظهور المالك الجديد. ظهر ساري وبجواره عبد الحميد قادمين من غرفة جانبية. صعقت صافي لدى رؤيته، خاصة حين قدمه عبد الحميد للجميع، في حين تسمرت عيناه عليها بنظرات مستفزة.
التزمت الصمت خلال الساعة التي عقد فيها الاجتماع في حين تحدث الجميع من حولها. أحست بنظراته الثاقبة الساخرة ترتكز عليها طوال مدة الاجتماع.
حين جاء دورها للتعريف بنفسها وبإدارتها للصفحة، اختصرت كلماتها في إيجاز.
انتهى الاجتماع ونهض الجميع مغادرًا. أرادت أن تنهض من كرسيها إلا أنها أحست به قد تعمد أن يتحرك ليقف أمام كرسيها كي يمنعها من الوقوف والمغادرة. ظل يسلم على الجميع وهو يرمقها بنظرات خفية، وهي تحاول تحريك كرسيها كي تنهض مغادرة. انتظر حتى خروج آخر الصحفيين، وتحرك قليلًا فحركت كرسيها للوراء ونهضت في ضيق كي تغادر، إلا أنه أوقفها قائلًا:
— ساري: مش شايفة إنك مدينة لقليل الأدب اللي وصفتيه من شوية باعتذار؟ واعتذار حار أوي.
قالها وهو يميل ناحيتها كأنه سيقبلها.
ابتعدت مسرعة قائلة في غضب:
— صافي: أوعى تفتكر إنك عشان طلعت صاحب الجرنال إن ده هيخليني أخاف وأجري أبوس الأيادي لأحسن تقطع باب رزقي. تبقى غلطان.. اللي زيك على رأي عمي رمضان بتاع البوفيه بيتغيروا علينا واحنا بنفضل مكاننا عشان احنا اللي بندير وبنشتغل وبنجيب للي زيكم الفلوس وانتم قاعدين مكانكم في التكييف.
ساري:
— أنا عاجبني جرأتك يا آنسة… ولا أقول مدام؟
قالها بنبرة ذات مغزى فهمتها على الفور فأجابته بنبرة صارمة:
— صافي: مدام.
قالتها وخرجت مسرعة.
ابتسم بمكر وهو يتابعها قبل أن تغلق الباب وراءها بقوة.
دخلت صافي بيتها بعدما نادت على كريم، والذي أتاها مسرعًا وهو يرتمي في حضنها قائلًا بضعف:
— كريم: مامي.
صافي بحب:
— حبيب مامي وقلب مامي.. عامل إيه النهاردة؟ خدت علاجك؟
أومأ برأسه وهو ما يزال في حضنها، فقبلت شعره قائلة:
— صافي: أكلت طبقك كله؟
جاءها صوت والدتها منى قائلة بابتسامتها الحانية:
— منى: ده جنني وطلع عيني على ما شرب شوية شوربة من لسان العصفور.
ابتسمت صافي وهي تتجه ناحية أمها قائلة:
— صافي: والحرارة استقرت يا ماما الحمد لله.
منى:
— آه يا حبيبتي، بقى زي الفل الحمد لله. إيه عندك شك فيا؟ أي نعم أنا قعدت وسيبت مهنة الطب عشان أرعى كيمو وابوكي العجوز، بس لسه شاطرة زي ما أنا.
أتاهم صوت رجولي من الخلف قائلًا:
— رفيق: عجوز… رفيق الزهيري أكبر صحفي مصر والوطن العربي بقى راجل عجوز؟
ضحكت صافي ووالدتها وهم يتجهون ناحيته. قبلت صافي رأسه قائلة:
— صافي: حبيبي يا بابا، انت مش بس أحسن صحفي في مصر، انت أحسن أب وأعظم سند في الدنيا. أنا عمري ما هنسى وقفتك جنبي ودعمك ليا في موضوعي… إلا صحيح، النهاردة شرفنا الراجل اللي اشترى الجرنال من عمو محسن.
رفيق بفضول:
— آه، وعامل ازاي بقى؟ فاهم يعني ولا ثري عربي جاي يستثمر فلوسه وخلاص؟
صافي بضيق:
— بصراحة يا بابا، راجل شكله مش كويس أبدًا.. يعني واضح من منظره إنه معجب بنفسه وشايف حاله، وطبعًا زي العادة عبد الحميد شكله اتطوع وحكى له قصتي، والبيه طبعًا لمح لي بده.
منى بعصبية:
— هو انتي مش هتخلصي من كلام الناس ده بقى؟ أربع سنين مش كفاية إن الناس دي تنسى موضوعك وتطلعك من دماغهم؟
