
قال: واسمك ايه؟
قالت: خديجة يا فندم. ممكن بقى أمشي؟
لينفعل: هو ايه اللي ممكن أمشي؟ عايز أتأمل في جمال سيادتك. فيه ايه؟
تجلدت وكبتت دموعها التي ملأت عيونها.
قال: عايزة تقعدي؟ فهزت راسها. فقال: تعتذري اعتذار كويس، فاهمة.
تنهدت وهتفت: طب آسفة.
فقال: على ايه؟ انطقي.
تنهدت بغلب: إني عليت صوتي.
أشار بيده أن تتابع، فأحست بقهر: وإني تجاوزت حدودي وقلت كلام ما ينفعش. آسفة.
تنهد هو: اتفضلي. ومن هنا ورايح اللي يكلمك تردي عليه بالأدب، مش ترازيه بموشح. يلا اتفضلي.
تركته لتنزل دموعها وتجري، فخبطت في أحد الأشخاص، فبهت وقال: ايه؟ فيه ايه؟
انفجرت في البكاء، فتراجع: فيه ايه؟ تعالي. وشدها إلى مكتبه فأجلسها: اهدي كده، فيه ايه؟
كانت تحس بالإهانة وكبتها لنفسها من أجل حوجتها للمال، جعلها تتألم وتنهار. لتبدأ في لم حالها وتنظر إليه وتمسح دموعها، فنظر إليها بحنان: ايه؟ هديتي؟
هزت راسها بهدوء.
فهمس لنفسه: يا جمالو، مين القمر اللي نزلي من السما ده؟ تنهد وقال: ممكن أعرف فيه ايه؟ بتجري ليه؟ حد زعلك وأنا أقطعله خبره؟
لتبتسم له، فهتف: اللهم صلي على النبي، السما نورت. طب ايه؟ مين بقى وليه؟ يلا هاتي كل اللي عندك.
تنهدت خجلًا من نظراته: لا، مفيش، شكرًا لحضرتك.
فقال: والله أبدًا، أنا أسيبك كده ازاي؟ مين المتوحش اللي نزل دموع القمر؟
تنهدت: مفيش والله. لتمسح دموعها وتقوم، فوقف أمامها: لا، عيب بقى، والله ما يحصل، أنا مش قليل في الشركة، قولي يلا مين.
لتتنهد: مفيش، صاحب الشركة راجل متوحش، ما جيتش جنبه ونازل عض في الناس. دا مش طبيعي.
ضحك هو: انت وقعتي في حمزة؟ يا نهار أبيض، معلش، أصله مقفل شوية.
قالت غاضبة: دا مش طبيعي، دا مجنون.
ضحك: عارفه لو سمعك هيفلقك نصين. ثم أكمل: أنا بقى مازن.
همست: تشرفنا أستاذ مازن.
قال: لا لا، أستاذ ايه؟ أنا مازن بس. انت بقى اسمك ايه؟
لتهمس: خديجة.
قال بحنان: أحلى اسم. دا والا ايه؟ عمومًا يا ستي، أنا هنا في أي وقت تجيلي أقفلك على طول.
ضحكت: هتقف لصاحب الشركة؟ دا مجنون.
ضحك: معلش، ما أنا أبقي أخو المجنون.
لتشهق وتنكمش.
فأسرع: حيلك حيلك، مالك؟ انكمشتي كده ليه؟ هو صحيح صعب، بس أنا والله طيب وعسلي، مش زيه.
لتتنهد وتهتف بخجل: طيب، ممكن بقى أمشي؟ اتأخرت على شغلي.
قال مبتسمًا: تمام، بس اعتبريني ضهرك هنا، ماشي.
ابتسمت له وخرجت، فابتسم هو قائلًا: ايه البت دي عسلية يا بنت الإيه.
دخل عليه شريف: ايه يا كبير؟ انت اشتغلت؟ مش تقلي إنك دخلت سكه يا حبيب.
بهت مازن: سكه ايه يا أهبل؟ مالك؟
هتف: انت هتستعبط ياض؟ مالبنت لسه خارجه من عندك.
قال مازن متعجبًا: بت مين؟ انت ملبوس؟
ليهتف: لا يا روح أمك، خديجة اللي قلتلك عليها.
ابتسم هو لا إراديًا: هي دي اللي قلت عليها؟
ليهتف شريف: آه يا حبيب، هي بتعمل ايه عندك؟
فقال: مفيش، أخويا عضها كعادته، وأنا كنت بس بستها، كانت بتعيط.
هتف شريف: يا ساتر، أخوك ده بومة. دي تتعض؟ دا بسكوته. الواد أخوك دا باينه ملعوب فيه يا واد، مالوش في النسوان.
ليضحك مازن: اتنيل، اسكت، ما تجيبش السيرة دي. كان له وحبيب، جت مراته علمت عليه، كرهته في صنف النسوان، وبقاله خمس سنين بطوله كده حجر، قلبه ده ما يعرفش اللين. حاجة غريبة.
قال شريف: حد يقدر يقعد من غير النسوان يا بني؟ دول الحتة الطرية. طب ايه؟ هتعمل ايه؟ ايه رأيك في البت؟
هتف مازن: لا حاجة، على الفرازة، وجديدة، صنف جديد متغطي كده، وعليها رقة بنت. ايه؟ لما كانت بتعيط كنت عايز أهجم عليها أقرقشها.
ضحك شريف: شفت بقى؟ ادعي لأخوك.
ليهتف: طب سيبني بقى أشوف هوقعها ازاي.
ضحك شريف: ابقي قابلني. وتركه ورحل.
لتلمع عين مازن: لا، أقابلك ايه؟ دا أنا هقابلك وأقعد معاك كمان. البت ما تتسابش، إن شاء الله لو ايه، لازم أطولها. بنت الإيه ما تتسابش.
كان حمزة جالسًا يعمل، ليدخل عليه مدير الحسابات يناقشه في بعض الأمور، وما إن انتهى حتى قال: هو انت شغلت حد جديد عندنا يا سكري؟
رد الرجل: آه، بنت شاطرة أوي، اسمها خديجة.
قال حمزة مستفهمًا: منين تعرفها؟
قال: لا، اتقدمت واتقبلت. بت متفوقة، بس على أد حالها كده، وهادية، مالها في اللبش، ومؤدبة أوي.
تنهد حمزة: طب أوك، طالما كويسة، ابقي ابعتهالي بدل كرم، تعرفني الحسابات لو بتفهم. بس لو غبية ما تبعتهاش.
ضحك سكري: لا، دا بت بريمو، هتعجبك أوي.
ليهتف: طب خلاص، خلص التقرير وابعتهولي معاها.
انصرف السكري، ووقف حمزة يتأمل السماء، فأغمض عينيه ليتنهد: ايه يا حمزة؟ دماغك مالها؟ البت دي ما بتطلعش من دماغك ليه؟ ايه القرف ده؟ بت متخلفة أصلًا، ترد الكلمة بعشرة. بس بس، روح اتنيل واشتغل.
دخلت سهام على حمزة: ازيك يا حموزي؟ ايه رأيك نقوم نتغدي؟ انت قلتلي امبارح هنروح نتغدي مع بعض.
تنهد حمزة، فهي لا تتركه: معلش يا سهام، ورايا شغل.
اقتربت منه: فيه ايه يا حمزة؟ الحياة مش كلها شغل. نفسك شوية يا ابني، وبجد هزعل منك.
تنهد: طب يا سهام، شوية كده وهجيلك، ماشي.
لتفرح هي وتهتف: خلاص، هروح أستناك. وخرجت سعيدة، تتمنى أن تحقق منالها أن تصبح حرم حمزة البنهاوي.
ذهب مازن إلى السكري: بقلك يا سكري.
فرد الرجل: نعم يا مستر مازن.
قال: كنت عايز حد من الحسابات يبقي معايا اليومين الجايين، هننزل كذا شركة ونتفق على كذا طلبية، وعايز حد معايا.
ليهتف السكري: أبع تلك كريم.
قال مازن: لا والنبي، الواد ده خنقه. ابع تلك حد هادي كده وما بينطقش.
ليهتف السكري: مفيش إلا خديجة، هبعتهالك، بت هادية وزي النسمة، ايه رأيك؟
سعد مازن وهتف: تمام، مستنيك.
ذهب السكري إلى خديجة، فهتف: خديجة، قومي ادي التقرير ده لحمزة بيه وفهميه اللي فيه، ماشي؟ وبعدها تروحي لمازن بيه، الفترة الجاية هتبقي معاه، ماشي.
قالت: حاضر يا مستر سكري. وقامت لتذهب إلى رب عملها.
نقرت على الباب فدخلت، فوجدته يعمل في أحد الملفات. لتظل واقفة لا تعلم ماذا تفعل.
مر الوقت لتتحمحم، ولكنه لم يرفع رأسه. لتتنهد وتقف مغتاظة، فقالت: مستر حمزة، أنا…
فقاطعها: أنا قلتلك اتكلمي، أذنتلك أنا.
فبهتت من كلامه، لتتنهد وتقف تكبت نفسها. كانت تشتعل من الداخل. فوجدته يقوم ويهتف: جبتي التقرير؟
تنهدت: أيوه يا فندم.
ذهب إلى الكنبة وجلس عليها، وفتح اللاب الخاص به وجلس، فظلت واقفة.
فهتف: أنا هستنى جنابك كتير؟ تجي توريني شغلك؟
هزت راسها وهمست: أعوذ بالله. ذهبت إليه وجلست بعيدًا وأعطته التقرير.
فنظر إليها مستغربًا، فكانت تتطرف الكنبة. فاستدار بسخرية: حد قال لسيادتك إني جربان والا عندي مرض جلدي؟
قالت باستنكار: ايه؟ حضرتك بتقول ايه؟
قال حانقًا: هتشتغلي ازاي وسيادتك في آخر الدنيا؟ ايه؟ أنا اللي هاجي أقعد جنب جناب الدوقة؟
قالت بغضب: معلش يا مستر حمزة، هو حضرتك بتكلمني كده ليه؟ أنا عملتلك ايه؟
هتف غاضبًا: وانت عايزاني أكلمك ازاي؟ ايه؟ أقف أتنحنح لسيادتك وأسبل؟
لتبهت وتقف: ايه؟ تسبل؟ حضرتك بتقول ايه انت؟
فهتف غاضبًا: اسمها حضرتك. ما تعرفيش المقامات؟
فقالت: ربما خلقنا واحد يا مستر حمزة. مقامات ايه؟




