منوعات

رماد الماضي بقلم سلمى سمير

فاروق: خلاص انت حرة، بكره تندمي، بس بردو هتعتذري من زين لاسلوبك معاه وشكلك المخجل اللي كنتي داخلة بيه. واسمعي، من النهاردة مفيش سهر بره البيت، ولما تخلصي كليتك هجوزك وأخلص منك، وابقي اسهري انتي وجوزك براحتكم. اتفضلي ويمد ليها فونه: اتصلي اعتذري لزين.

يمنى: أنا مغلطتش فيه، أنا كنت صريحة معاه. ولو على مظهري وأسلوبي وسهري، الواجب أعتذر ليكم انتم مش هو.

عنايات: خلاص يا فاروق، هي هتسافر معايا وتعتذر له بنفسها على صراحتها المحرجة معاه وقلة ذوقه.

يمنى: سفر ايه؟ أنا استحاله أسافر الصعيد. هو أنا ناقصه أمراض؟ نو، ماما مش هسافر، آسفة ليكم. وتقوم من على السفرة.

عنايات: اسمعي، لو عايزه أبوكي يوافق على جوزك من كريم تجي معايا فرح خلود بنت خالك، وبعدها هنسيبك براحتك. غير كده هتجيبي لنفسك، لا كلية ولا خروج ولا أي حاجة.

يمنى بعصبية ونرفزة: أوك، بس يومين. أنا بتعب من جو الصعيد وجوهم الحار والخنقة والتزمت في اللبس. موافقة.

عنايات: موافقة، بس تعتذري لزين بطريقة لطيفة على قلة ذوقك معاه، مهما كان ده اسمه ابن خالك ومتربي معاك.

يمنى: أوك مامي، بس عايزة وعد منك ومن دادي لما نرجع كريم يتقدملي وانتو توافقو على الخطوبة، ممكن؟

فاروق: أنا موافق، ومدام زين عرف إنك رفضاه وبتحبي غيره، خلاص مظنش هيطلبك تاني، ومش هيقبل على كرامته يفرض نفسه على واحدة رفضاه حتى لو بيحبها.

يمنى تجري على أبوها وتحضنه بفرحة: انت أحلى أب بالدنيا. ممكن أتصل بكريم أعرفه وأخليه يستعد للخطوبة لما نرجع؟

فاروق: لا طبعًا، بعد ما ترجعو وأتأكد إن زين خلاص صرف نظر عن الارتباط بيكي وسامحك على قلة ذوقك معاه، أنا هتصل بكريم بنفسي وهطلب منه يحدد ميعاد للخطوبة. ها، موافقة يا ست البنات ولا في اعتراض؟

يمنى: ها، ايه؟ طبعًا موافقة. ها يا ماما، هنسافر امتى؟ وقوليلي ألبس ايه علشان خالو وفيق ميتعصبش عليا هو واستاذ زين زي آخر مرة سافرت فيه للصعيد؟

عنايات: ألبسي كل اللي نفسك فيه بعيد عن جيباتك القصيرة والضيق والمكشوف، وأوعدك لو التزمتي محدش منهم هيزعلك أو يضايقك بالتعليق على لبسك لأنه محتشم.

يمنى تحضنهم: سمعًا وطاعة يا ست الكل.

عنايات: يا يمني، انتي بنتي الوحيدة اللي ربنا عوضني بيها بعد ما كنت فقدت الأمل أنا وأبوكي في الخلف. متخيلة نزعلك أو نبيعك زي ما بتتخيلي؟ سعادتك وفرحتك هي همنا الأكبر. وإذا كنا موافقين على جوزك من زين لأنه الراجل اللي يقدر يصونك وبيحبك وراجل بجد مش زي كريم، بس هنقول ايه؟ القلب وما يهوى. ربنا يسعد قلبك ويفرحك وأفرح بيكي.

يمنى: ربنا ما يحرمني منكم يارب. وتبوسهم وتطلع أوضتها تجهز شنطتها وقلبها طاير من الفرحة إنها خلصت من زين.

في فيلا زين

يرجع للفيلا متأخر وهو حزين ومكتئب، ويقابله أخوه.

حمزة: ايه يا أبية؟ نسيت نفسك عند عمتو وحبيبة القلب ونسيت اخوك المسكين؟ طب كنت خدني معاك، ولا هما مش أهلي زي ما هما أهلك؟ ولا أنا ابن البطة السودة؟

زين بعصبية: اخرس يا حمزة، وايه لزمة كلامك ده؟ أنا بقالي أكتر من شهرين مرحتش هناك، ثم أنا مكملتش ساعة ومشيت. وارتاح، حبيبة القلب قلتها في وشي، مش بتحبني ولا عايزاني وهتتجوز صديقها كريم بتاع حفلة عيد ميلادها، فاكره؟

حمزة: خلاص ولا تضايق نفسك، انت شاب وسيم وأخلاقك عاليه ومليونير، ألف مين تتمنى ترتبط بيك، هي الخسرانة.

زين: بس أنا بحبها هي ومش قادر ولا هقدر أحب غيرها. أنا هموت لو بقت لغيري، فاهم؟ الموت عندي أهون من إنها تبقي لراجل غيري. أنا لازم أتصرف وأحاول أقنعها تفكر وتحس بيا.

حمزة: انت كده بتتعب نفسك زيادة. بص يا أبية، ادخل نام وارتاح، والصبح نتكلم تكون روقت ونشوف حل للست يمني.

زين: بطل تريقة واحترمها، دي هتبقي مرات اخوك الكبير.

حمزة يبصله بصدمة: ايه يا أبية؟ انت بتشتغلني؟ مش قلت رفضاك وكرهاك وبتحب واحد غيرك؟ هتبقي مراتك ازاي؟

زين: جوزي من يمني حلم عمري كله، مستحيل أتنازل عن بسهولة. أنا لازم أتصرف وبسرعة قبل ما تضيع مني للأبد.

حمزة: لا يا أبية، انت حالتك بقت صعبة أوووي، ربنا يشفيك.

زين: اتلم يا فاشل وروح ذاكر بدل ما تسقط السنادي كمان. اللي في سنك هيخلصو كلية وانت لسه في سنة أولى.

حمزة: أعمل لك ايه؟ انت اللي أصريت أدخل تجارة علشان أساعدك في إدارة المجموعة بتاعتك، وأنا مش بحب التجارة. كان مالها السياحة والفنادق، كنت بقيت مرشد سياحي وأتعرف كل يوم على مزه أو بنت روشة أجنبية، كانت الحياة هتبقي بيس يا مان مش حسابات ومسك دفاتر. حد قالك إني الخوارزمي في زمانه؟ استحمل بقى سوء اختيارك ليا.

زين: كلامك بيعصبني. أنا عايزك تبقي راجل محترم وأمسكك مركز مرموق في المجموعة، وانت كل اللي يهمك الخروج والبنات. اسمع، انت لو منجحتش السنادي هتترفد من الكلية وأنا هطردك من الفيلا، شوف مين هيتحملك بعدها من شلتك.

حمزة: روق يا أبية، هي يمني تنكد عليك وهتطلعها عليا. خلاص هاذاكر وهانجح، متزعلش بقى، هو أنا ليا غيرك يا أبية؟

زين: طيب كويس، ربنا يهديك. اتعشيت ولا لسه؟

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى