يلا اخلصي، أهل جوزك مستنيينك بره، هاتي حاجتك وحصلينا». خرج أبوها سيد بعدها وماستناش رد.
ـ «كفاية عياط يا بنتي».
ـ «أبويا ليه بيعمل فيا كده يا أمي؟».
ـ «هترتاحي من هنا يا ليل».
ـ «أرتاح إزاي وأنا بعيدة عنك؟ أخاف يعمل فيكي حاجة».
ـ «ما تقلقيش، أهل جوزك دفعوا كتير أوي وده هيسكته عني».
ابتسمت بسخرية: «وإيه اللي يخلي ناس أكابر زي دول يبصوا لواحدة زيي؟».
ـ «إنتي جميلة يا ليل من جوه ومن بره يا حبيبتي، مش أقل من حد».
ـ «آه جميلة، بس جنبهم شحاتة، تفتكري هيعملوا فيا إيه؟».
أمها وهي بتعيط، صعبان عليها بنتها واللي بيحصلها. أبوها خبط الباب برجله، اتخضوا الاتنين وبعدوا عن بعض، واتكلم بتهكم: «هتفضلوا في المناحة دي كتير؟ ما تخلصوا!».
ـ «أنا جاية معاك يا سيد».
ـ «اخلصي».
ـ «حاضر». أخدت شنطتها وخرجت بره: «أنا جاهزة».
ـ «تمام يلا». كان صوت واحدة من الهوانم اللي جاية تاخدها.
ليل ركبت معاهم العربية وهي ما تعرفش مين دول ولا مين جوزها. رجعت براسها لورا وهي بتفتكر كام مرة أرسلها علشان تخدم في البيوت وياخد منها مرتبها يصرفه، وكانت بتستحمل علشان خاطر أمها اللي تعبت علشانها وكانت دايماً تدافع عنها.
فاقت على صوتهم وهم بيقولوا إنهم وصلوا. نزلت من العربية مش مصدقة المنظر اللي قدامها؛ قصر، بيتهم كله كان أصغر من أوضة الكلب اللي عند الجنينة. مشت وراهم وهي مبهورة بكل حاجة شايفاها؛ الجنينة اللي مش بتنتهي ومزينة بشكل خلاب. دخلت جوه القصر وهي مبهورة أكثر من التصاميم والجمال اللي حواليها، والواضح إن كل حاجة غالية.
الفقرة الثانية: لقاء العائلة والتعرف على سائر
ـ «هي دي؟».
ـ «آه هي يا ماما».
ـ «اسمك إيه يا شاطرة؟ إيه ما بتسمعيش؟».
ـ «ما أخدتش بالي، اسمي ليل».
ـ «اممم مش بطال اسمك ولا شكلك. طبعا إنتي عارفة إنتي جاية هنا ليه؟».
ـ «لا».
ـ «ما تعرفش يا ماما، باباها كتب الكتاب».
بلعت غصة في حلقها من الوجع اللي دايماً حاسة بيه بسبب أبوها.
ـ «اممم قولتيلي، يعني أهلك مش عايزينك؟ طيب كويس علشان مش عايزين دوشة. إنتي هنا زوجة لسائر سليم الأسيوطي، من أكبر رجال الأعمال في الشرق الأوسط، وطبعاً اللي زيك ما يسمعش عنهم ولا يقدر يوصلهم، وهتبقى مسؤولة عن خدمته».
ليل في نفسها: «ليه؟ ما يخدم نفسه!».
قطع تفكيرها صوت تكسير فوق. وعبير زوجة عم سائر (وهي اللي بتكلم ليل من بدري واللي راحت جابت ليل) وكانت غادة بنت عبير بتقولها: «اطلعي بسرعة شوفي، ده سائر!».
ليل مش فاهمة حاجة بس طلعت تجري على الأوضة اللي شاورت عليها عبير وفتحتها واتفاجئت من اللي شافته.
الفقرة الثالثة: المواجهة الأولى في الغرفة
ليل فتحت الأوضة بسرعة، اتفاجئت من المنظر: واحد على كرسي متحرك والأوضة ما فيهاش حاجة سليمة تقريباً، كسرها كلها.
ـ «إنتي مين وإزاي تدخلي هنا؟».
ـ «أنا.. أنا..».
ـ «إيه ما تنطقي!».
ـ «أنا ليل».
ـ «عرفتك أنا كده! مين ليل وتقتحمي أوضتي كده ليه؟».
ـ «ليل مراتك يا سائر بيه».
ـ «إنتي بتقولي إيه؟ أكيد اتجننتي!».
ـ «دي الحقيقة».
ـ «باباااااااااااا!».
صوته خضها فرجعت خطوة لورا، وفجأة دخل راجل كبير في السن باين من ملامحه الطيبة، استنتجت إن ده والده.
ـ «مالك يا سائر؟».
ـ «يعني إيه أتجوز من غير ما أعرف؟ للدرجة دي معرفتي مابقتش مهمة؟».
للحظة صعب عليا لدرجة اتمنيت أكون أنا عاجزة وهو لا.
ـ «يا بني ما تقولش كده، هي بس هتشوف طلباتك وتراعيك».
ـ «ودفعتولها كام بقا؟ أكيد كتير!».
للحظة الكلمة وجعتني.
ـ «سائر، عيب كده، دي مهما كانت مراتك».
ـ «مراتي؟ جايبلي واحدة من الشارع وتقول عليها مراتي؟».
ـ «آه مراتك، وتعاملها كويس، مش بنجيب بنات الناس نمرمطهم عندنا».
ـ «ناس!» قالها سائر بتهكم.
أنا من جوايا ما فرحتش، بس أخيراً لقيت حد في صفي والواضح إنه حنين أوي. فوقت على صوت والده وهو بيكلمني بشيء من الحنية:
ـ «تعالي يا بنتي ورايا، عايزك في كلمتين».
ـ «حاضر، ثواني بس أرتب الأوضة دي».
ـ «إنتي مش خدامة يا بنتي، إنتي مدام المهندس سائر سليم الأسيوطي أكبر رجل أعمال في الشرق الأوسط، هتساعديه في لبسه وحاجته جوه أوضتكم، غير كده أي حاجة فيه ناس شغالة بتقوم بدورها».
لوهلة اتخضيت من الاسم، الواضح إنهم عيلة كبيرة فعلاً، بس اللي عايزة أفهمه إزاي وصلولي؟
ـ «يلا يا بنتي».
ـ «حاضر». خرجت معاه ونزلنا تحت لأوضة المكتب.
الفقرة الرابعة: الحوار مع العم سليم واكتشاف الحقيقة
ـ «قولي السؤال اللي محيرك يا ليل».
ـ «مافيش حاجة يا بيه».
ـ «أولاً أنا حماكي، يعني ممكن تقوليلي عمي أو بابا كمان».
ـ «بالله بجد؟».
ابتسم: «آه بجد، يلا قولي السؤال بقا».
ـ «عرفت إزاي إني عايزة أسألك في حاجة؟».
ـ «الشعر ده ما شبش من قليل يا ليل».
ـ «ربنا يديك طولة العمر يا عمي».
ـ «يلا اسألي».
ـ «حضراتكم يعني ما شاء الله عيلة وسلطة وفلوس، إزاي وصلتوا لوحدة زيي؟».
ـ «أولاً إنتي مش قليلة علشان تقولي كده. ثانياً شوفتك يا ستي لما سائر كان رايح المستشفى وإنتي بتتعاملي مع حد من المرضى، ومن ساعتها دخلتي قلبي».
ـ «حضرتك عارف إني أخدت كلية تمريض؟».
ـ «آه طبعاً، عرفت إنك كملتي تعليم من ورا سيد والدك وإنك من أوائل دفعتك كمان وإن شاء الله تبقي معيدة، وكنتي مخبية على سيد علشان مش هيوافق تكملي تعليم وده أولاً، وثانياً كان هياخد منك فلوس شغلك كلها وإنتي كنتي بتحوشيهم لعلاج مامتك المريضة».
ليل فتحت عينيها بصدمة من أنه إزاي عارف كل ده. غمزلها وقالها: «ما إنتي قولتي عندنا سلطة ونفوذ!».
ـ «عندك حق، ممكن اعرف إيه دوري بالظبط؟».
ـ «مش هقولك أكتر من إن سائر ابني أمانة في رقبتك».
ـ «وأنا قد المهمة دي بإذن الله».
ـ «ربنا معاكي يا حبيبتي، معتمد على الله ثم عليكى».
ـ «ربنا ييسر يا عمي، عن إذنك هطلع لابنك، ده لو تأخرت شوية اعرف إنه قتلني!».
ـ «هههههه لا ما تقلقيش، سائر حنين جداً».
ـ «هنشوف». وطلعت ليل عند سائر تاني.
