الفقرة الخامسة: بداية التقارب وكسر الجليد
طلعت لسائر وأنا بقدم رجل وبأخر التانية، مش خايفة منه، بس خايفة ما أكونش قد المهمة الصعبة اللي اختارني ليها عمي سليم. خبطت على الباب، سمعت صوته بيسمح بالدخول. دخلت الأوضة لقيتها مترتبة كأن ما كانش فيه زلزال حصل فيها من شوية، فهمت إنهم متعودين على تقلبات حالته المزاجية بسبب مرضه اللي عرفت من عمي سليم إن ليه عملية وجلسات علاج طبيعي وعايزني أقنعه بيهم.
ـ «إنتي يا بتاعة إنتي!».
ـ (لا واضح إني هقنعه بسرعة فعلاً).
ـ «مش بكلمك؟ إنتي يا اللي ما اعرفلكيش اسم!».
ـ «اسمي ليل».
ـ «يعني سامعاني أهو، مش بتردي ليه؟».
ـ «علشان ليا اسم تناديني بيه».
ـ «ما شاء الله بقا ليكي صوت!».
ـ «آه الحمد لله، محتاج حاجة؟».
ـ «هاتيلي علاجي».
ـ «حاضر» (الواضح أنها أيام شديدة على دماغي).
ـ «بتقولي إيه؟».
ـ «ولا حاجة».
ـ «أحسن برضه، ما بحبش البرطمة».
أخد علاجه وهو ساكت، الحمد لله طلع حنين زي ما والده بيقول.
ـ «طبعاً هتنامي على الأرض».
ـ (مني لله على تسرعي ده والله).
ـ «روحت فين؟».
ـ «ما روحتش، موجودة».
ـ «سمعتي أنا قول إيه؟».
ـ «آه سمعت».
ـ «وإيه رأيك؟».
ـ «هنام على الأرض زي ما أنت عايز، متعودة فعادي».
سائر حس إن قلبه وجعه عليها من كلامها وشكلها، تعبت كتير في حياتها، بس فكر نفسه بأنها زي غيرها وكلهم زي بعض:
ـ «احم.. ليل».
ـ «نعم؟».
ـ «الكنبة اللي هناك دي افرديها هتبقى سرير ونامي عليه».
ابتسمت من جوايا على طيبته، الواضح إن مرضه هو السبب في عصبيته وسوء معاملته للى حواليه. روحت عند الكنبة بحاول أفردها مافيش فايدة، وقفت عليها وفضلت اتنطط يمكن تتفرد، سمعت صوت ضحكته اللي ملأت المكان كله، شكله وسيم أوي زي الأفلام وهو أحلى منهم كمان. انتبه إني مركزة فيه وهو بيضحك:
ـ «حلو؟».
ـ «هو إيه ده؟».
ـ «شكلي حلو وأنا بضحك علشان كده مركزة أوي معايا؟».
خدودي كانت بتطلع نار وبصيت في الأرض.
ـ «بقيتي طماطم».
ـ «لا فراولة».
ـ «لا طماطم».
ـ «قولتلك فراولة!».
ـ «طماطم وبس».
دبدبت برجلي في الأرض بغيظ، ضحك عليا تاني: «ما تضحكش عليا!».
ـ «حاضر» قالها وهو بيكتم ضحكته: «افردي الكنبة صح بقا من تحت كده».
ـ «هي هي، فردتها!».
ـ «برافو عليكى، اقفلي النور بقا ويلا ننام، صدعتيني».
ـ «أنا اللي صدعتك؟» قالتها بتهكم وهي بتقفل النور.
ـ «هتنامي بهدومك؟».
ـ «آه».
ـ «ما ينفعش، ابقي خلي غادة تشتريلك لبس علشان تبقي براحتك».
ـ «ما أنا أغلب الوقت هبقى بالأسدال».
ـ «ليه؟».
ـ «مش عمك وابنه عايشين معاكم هنا؟».
ـ «آه في الدور اللي فوق».
ـ «طيب».
ـ «طيب إيه؟».
ـ «أنا محجبة، أكيد مش هقعد قدامهم براحتي يعني».
غمزلها: «تقعدي قدامي أنا!».
ـ «احم.. تصبح على خير».
ـ «وإنتي من أهله».
الفقرة السادسة: اليوم الجديد وإقناعه بالنزول
يوم جديد:
ـ «صباح الخير».
ـ «صباح النور، إنتي صاحية من بدري؟».
ـ «آه».
ـ «ليه كده؟».
ـ «بصلي الفجر وبقرأ ورد القرآن ومش بنام تاني».
ـ «ربنا يزيدك».
ـ «يارب، هااا تحب تفطور فين؟».
ـ «يعني إيه؟».
ـ «يعني تحب تفطور في الجنينة ولا معاهم تحت على السفرة؟».
ـ «أنا مش بخرج من أوضتي خالص».
ـ «ليه؟».
ـ «إيه اللي ليه يعني؟ مش شايفه؟».
ـ «لا شايفه واحد ربنا عطاله حاجات كتير أوي وممركز على الحاجة الوحيدة اللي ربنا أخدها منه ووقف حياته عليها».
ـ «الكلام سهل».
ـ «عندك حق، واللي بيسمعوا كتير بس اللي بينفذوا قليل.. هنزل أجيبلك فطارك». ومشيت ما استنتش رد منه.
سائر كان بيفكر مع نفسه، من وقت الحادثة وفعلاً حياته وقفت، الشغل مابقاش يسأل عليه رغم إن يقدر يعمل كل حاجة من مكانه بس سايب الهم كله على والده، مابقاش يخرج ولا يطلع من أوضته، حتى مش بيضحك من وقتها، أول مرة كانت إمبارح مع ليل، ابتسم تلقائي لما افتكر الموقف.
ـ «اتفضل فطارك».
ـ «احم.. ليل».
ـ «نعم؟».
ـ «هو أنا يعني هنزل إزاي تحت؟».
ليل ابتسمت من قلبها إنه ممكن يستجيب ليها: «أنا هساعدك وحد من الخدم، هنشيل الكرسي».
سائر بأسى: «بس ده هيبقا صعب عليكم وكمان كل يوم، وما ينفعش أنزل كذا مرة تحت».
ـ «اممممم أنا هظبطها ما تقلقش، ثواني أنادي حد ينزل الأكل تحت ويساعدني».
سائر ابتسم بعد ما نزلت على لطفها وأنها بتحاول تساعده من قلبها، مش بيشوف حد كده غير والده ودلوقتي ليل. ليل طلعت ومعاها حد من الخدم وساعدوا سائر لحد ما نزل تحت، الكل اتفاجئ بيه وقاموا وقفوا.
ـ «وقفتوا ليه؟ كملوا فطاركم، وحشني أتجمع معاكم تحت».
سليم بص لليل بامتنان وهي ردتله النظرة.
الفقرة السابعة: ظهور ريم وانكشاف الماضي
قعدوا يفطروا كلهم واتفاجئوا بواحدة دخلت عليهم؛ بنت لابسة قصير ومكياج كتير. ليل لاحظت تغير ملامح سائر، فاقت ليل من تركيزها على البنت وهي بتقرب ناحية سائر وبادرت بالتودد له، وبسرعة سائر أبعدها عنه.
ـ «إيه اللي جابك هنا؟».
ـ «إيه يا سائر، مش عايز تشوف ريم حبيبتك؟».
ـ «ريم حبيبتي دي ماتت واتدفنت خلاص».
ـ «واهون عليك يا ساسو؟».
ليل بداخلها: (إيه الدلع ده؟!).
ـ «اسمي سائر وبس».
ـ «أنا عارفة إنه من حقك تزعل، بس أنا كنت مصدومة».
ـ «ما شاء الله، وفوقتي بعد سنة؟».
