ـ «كنت تعبانة نفسياً من اللي حصلك وسافرت بره، بابا أصر على ده علشان أعصابي تعبت».
ـ «والكلام اللي قولتهولي في المستشفى، بابا برضه اللي أصر؟».
ـ «كنت طايشة يا سائر».
ـ «وكبرتي متأخر!».
ـ «يعني إيه؟ بتطردني من حياتك؟».
ـ «إنتي طلعتي منها بمزاجك ومش هسمحلك ترجعيليها تاني».
ـ «أرجوك اديني فرصة أثبتلك حبي ليك».
سليم قطع كلامهم واتكلم هو: «مش تباركي لسائر يا ريم؟».
ـ «على إيه يا أونكل؟».
ـ «اتجوز يا حبيبتي، ودي ليل مراته».
ـ «إيه؟ البتاعة دي مراتك يا سائر؟».
ـ «رييييم!» قالها بعصبية لدرجة أنها خافت ورجعت لورا: «إياكي تغلطي في مراتي، إنتي فاهمة؟ دي ست البيت ده، يبقى تتكلمي عنها باحترام!».
ـ «بتتعصب عليا يا سائر بعد كل اللي كان بينا؟». وخرجت من الفيلا وهي بتعيط وبتجري.
سليم: «اقعدي يا ليل، واقفة ليه يا حبيبتي؟».
ليل: «كنت بجيب مياه لسائر يا عمي».
ـ «يا بنتي قولتك مية مرة فيه خدامين لكل ده».
ـ «وإيه يعني يا عمي؟ ده جوزي وخدمته واجب عليا، حضرتك عارف يا عمي إن اللي تنام وهي مزعلة جوزها الملائكة تلعنها».
ـ «ربنا يباركلك في عقلك يا بنتي».
ـ «تسلم يا عمي».
سائر: «أنا شبعت الحمد لله».
ـ «تحب أطلعك أوضتك؟».
ـ «لا يا ليل، طلعينى الجنينة لو سمحتي».
ـ «حاضر، عن إذنكم».
في الجنينة، قال سائر: «حابب أتكلم».
ـ «وأنا حابة أسمعك».
الفقرة الثامنة: حكاية سائر وبداية التغيير
«ريم تبقى بنت صديق لبابا، عرفتها عن طريق شغلهم مع بعض، حبيتها جداً وشدتني ليها رغم إن لبسها زي ما إنتي شوفتي كده. بابا كان رافض تماماً رغم إن فيه شغل مشترك مع صديقه ده، والجواز بيني وبين ريم هيقوي العلاقات أكتر، بس قاللي إنه مش فارق معاه الشغل وأهم حاجة أنا وبس، وإني لما أتجوز لازم أختار صح، مش اهتمام بالشكل وبس، لا.. واحدة تصوني وتقف جنبي وتراعي ربنا فيا. بس أنا صممت على اللي في دماغي، وكل ما بابا يرفض كنت بعاند أكتر وأتمسك بريم.
علمتني أروح أماكن السهر معاها، ماكنتش برضى أشرب مع أصحابها ويفضلوا يتريقوا عليا وكنت بستحمل علشانها، وهي طبعاً كان عندها ده كله عادي بما إنها عايشة في لندن واتربت هناك. وفي يوم قالتلي نخرج، قولتلها مش هخرج تاني مع شلتها، كنت خلاص جبت أخير من أصحابها. فضلت تتحايل عليا وأنا رافض، واتعصبت عليها فعيطت، وطبعاً بما إني بخاف على زعلها وافقت. وكالعادة أصحابها قعدوا يتريقوا، فااتضايقت وحبيت أثبتلهم إني راجل وأستحمل، شربت كتير رغم إن دي أول مرة أعملها.
خلصنا قعدتنا وإحنا راجعين ماكنتش عارف أركز في الطريق وفعلاً العربية اتقلبت بينا، كنت حاضرها خايف يحصلها حاجة والحمد لله فعلاً ماحصلهاش حاجة، بس أنا اللي بقيت عاجز. وبعد كل ده جاتلي المستشفى بعدها بأسبوعين بتقولي سوري مش هقدر أكمل يا سائر، انت عاجز وأنا ما أقدرش أستحمل ده ومشيت. خلت نفسيتي اتدمرت وحالتي بقت تتأخر أكتر، وجاية دلوقتي عايزة ترجع».
سائر خلص كلامه ودموعه نازلة على وشه.
ـ «لسه بتحبها؟».
ـ «بتقرف منها يا ليل».
ـ «طيب زعلان ليه دلوقتي؟».
ـ «إنها ورا كل اللي حصلي».
ـ «هي مجرد سبب، واللي حصلك ده كان هيحصل بيها أو من غيرها، ده ربنا كاتبهولك عايز يختبرك».
ـ «وأنا فشلت في الاختبار ده».
ـ «لا لسه فيه فرصة تانية».
ـ «بجد؟».
ـ «آه والله». ابتسمت علشان تطمنه.
ـ «إنتي جميلة أوي يا ليل وقلبك أبيض».
ـ «كلك ذوق».
ـ «بس كده؟».
ـ «آه، أنا ليا في الخناق، لكن في الرومانسية مش قد كده».
ـ «طيب مش هتحكيلي حكايتك إنتي كمان؟».
ـ «إنت ناقص غم؟ ده أنا حكايتي مأساوية تخليك تنتحر!».
ـ «يا ساتر يارب! للدرجادي؟».
ـ «وأكتر والله، بس أنا بطمنك».
ـ «آه واضح، اطمنت!».
ـ «أي خدمة.. طيب مش هتروحي مع غادة علشان تجيبلك لبس؟».
ـ «بنت عمك المقشفة دي؟».
فضيل يضحك بصوت عالٍ وهي كالعادة سرحانة مع ضحكته.
ـ «غادة مقشفة؟ دي قمر!».
ليل زمت شفايفها وقالت بتهكم: «تحب أروح أخطبهالك؟».
ـ «لا شكراً، ما هو أنا متجوز».
ـ «طيب كويس إنك فاكر».
ـ «بتغيري ولا إيه؟».
ـ «إنت فاكر علشان طويل وعندك عيونك بني كده وشعرك طويل تبقى حلو وأغير؟ لا طبعاً!».
ـ «عندك حق، مش حلو خالص. طيب هتروحي مع مين يجيبلك لبس؟».
ـ «لو هروح يبقى مع جوزي».
ـ «ليل، إنتي بتقولي إيه؟».
ـ «التي سمعته».
ـ «هخرج إزاي وأنا كده؟».
ـ «تاني نفس الكلام؟».
ـ «أيوه، نزلت هنا في الفيلا بيتي، لكن بره قدام الناس…».
ـ «ما تولع الناس، إحنا مالنا!».
ـ «صعب يا ليل».
ـ «مش مستحيل».
ـ «برضه لا».
ـ «خلاص، خلينى بلبسي وخلاص مش عايزة حاجة».
ـ «بلاش عند».
ـ «مش عند، عايزة جوزي معايا يختارلي اللبس، إيه المشكلة؟».
ـ «إن جوزك عاجز».
ـ «مش عيب فيه، وأنا متقبلاه».
ـ «ماشي، هنروح وهتشوفي الناس هتبصلي إزاي».
ـ «هيعجبوا بيك يا قمر إنت!».
ضحك تاني: «لا إنتي مش طبيعية، يلا نتمشى».
ـ «يلا».
الفقرة التاسعة: المؤامرة الخفية وتسوق الزوجين
في مكان آخر، عبير بتمشي ريم: «خليكي وراه يا ريم».
ـ «ما أنا روحت وعملت اللي قولتي عليه ومافيش فايدة».
ـ «برضه زني عليه، خليه يقع في حبك مرة تانية».
ـ «سائر هيحب ليل».
ـ «إيه اللي بتقوليه ده؟».
ـ «أنا عارفة نظرات الحب في عينيه كويس، وهو كان بيبصلها بيها لما قال مراتي وتمسك بيها».
ـ «مافيش الكلام ده، لازم إنتي اللي تملي قلبه علشان نوصل لخطتنا، وما تقلقيش من ليل ليها سكتها، ولو فعلاً حبها هخليه مش طايقها».
ـ «اشمعنى أنا؟».
ـ «علشان إنتي حبيبتته من قبل كده، ومش لوحدك برضه، هبعتله حد تاني».
ـ «مين يعني؟».
ـ «مش مهم ليكي، نفذي اللي أقولك عليه».
ـ «تمام، طيب وليل؟».
ـ «هتصرف معاها وهحاول أخليها في صفنا».
ـ «أوك».
ليل خرجت هي وسائر علشان تشتري لبس زي ما اتفقوا مع بعض، كانت مبسوطة جداً إنها قدرت تخرجه من اللي هو فيه، وأول مرة يطلع بره البيت بعد الحادثة. بدأوا يدخلوا محلات كتير.
ـ «إيه رأيك؟». ـ «لا».
ـ «طيب وده؟». ـ «ده كده رايحة مكان مش مضبوط!».
ـ «طيب خلاص ده؟». ـ «تؤ».
ـ «وده؟». ـ «تؤتؤ».
ـ «ده حلو؟». ـ «تؤتؤتؤ».
ـ «إنتي قعدتي ليه؟ مش هتكملي؟».
ـ «فهمني بس، هو أنا بعمل عرض أزياء؟ تعبتني!».
ـ «ليه؟ ده أنا اتسليت أوي وأنتي كل شوية تقيسي».
ـ «يا سلام! تمام!».
ـ «خلاص، حقك عليا، ما تزعليش.. خلاص بقا خلي قلبك شبه وشك قمر كده».
ابتسمت على كلامه.
ـ «ضحكت يبقى قلبها مال وخلاص الفرق مابينا اتشال!».
ـ «خلاص خلاص مش زعلانة».
ـ «بجد؟».
ـ «آه والله، بس هتصالح لما تختارلي لبس».
ـ «طيب المحل ده كله لبس مش مناسب أصلًا، تعالي هنروح واحد حلو أنا عارفه».
ـ «هو بيبع رجالي وحريمي؟».
ـ «لا بنات بس».
ـ «أموال عارفه منين؟».
غمزلها: «ما أنا كنت شقي قبل كده!».
ليل اتضايقت من فكرة إنه يكون عارف بنات كتير قبلها.
ـ «ليييييل!».
ـ «بتزعق ليه؟».
ـ «بنادي عليكى من بدري يا بنتي، سرحتي في إيه؟».
ـ «لا ولا حاجة، معاك».
ـ «طيب قيسي الفستان ده، هيبقا جميل عليكى».
ـ «حاضر».
راح تقيس اللبس وهي حاطة إيدها على قلبها وابتسامة مرسومة على وشها، بعد شوية خرجت لسائر:
ـ «إيه رأيك؟ حلو؟ .. هو وحش ولا إيه؟ كنت عارفة إني مش حلوة».
ـ «تجنني! إيه الجمال ده!».
ـ «بجد؟» قالتها وهي بتلف بفستانها.
ـ «بجد جداً، قمر أوي!».
ليل اتكسفت وبصت في الأرض: «طيب أنا هغيره».
ـ «ماشي، وهختارلك الباقي».
بعد لف وقت طويل على المحلات، الاتنين تعبوا، والسواق أخد منهم اللبس للعربية.
ـ «أنا جيعانة».
ـ «وأنا أكتر منك، اللف ده جوعني».
ـ «طيب هناكل فين؟».
ـ «فيه هنا مطعم في المول في الدور اللي فوق».
أخدت سائر بالكرسي ودخلوا المطعم، وسائر طلب الأكل. الأكل وصل وسائر بدأ يأكل بالشوكة والسكينة، وهي محرجة تأكل علشان مش بتعرف تأكل زيه، فضلت باصة في الأرض وساكتة.
ـ «ليل، مالك؟».
ـ «مافيش».
ـ «مش بتأكلي ليه طيب؟ مش كنتي جيعانة؟».
ـ «مش هعرف آكل زيك بالشوكة والسكينة».
ـ «لو حابة أعلمك؟».
ـ «دلوقتي جيعانة، مش هعرف أركز معاك».
ـ «طيب كلي بالطريقة اللي تعجبك».
ـ «بجد؟».
ـ «آه طبعاً».
بعد فترة بسيطة سابت الأكل.
ـ «إيه تاني؟».
ـ «الناس بتبصلي».
ـ «ماحدش ليه عندك حاجة، كلي براحتك ما يهمكيش من حد، وأنا كمان هآكل زيك بدل الشوكة والسكينة».
ليل فرحت جداً بكلامه وأنه ما اتضايقش منها وكمان شاركها في الأكل، كملوا أكل ورجعوا على الفيلا.
الفقرة العاشرة: نقل الغرفة واستفزازات غادة وعابير
كانوا داخلين مبسوطين جداً، وسليم شايف ابنه وحالته النفسية بتتحسن وعرف إن اختياره لليل كان صح.
ـ «عملتي يا ليلي اللي قولتك عليه؟»
ـ «أيوه يا ست ليل، كله تمام».
ـ «إيه هو ده؟».
ـ «نقلت حاجتك كلها في الأوضة اللي تحت».
ـ «ليه كده يا ليل؟ أنا بحب أوضتي جداً».
ـ «علشان تقدر تخرج براحتك وتأكل معاهم هنا، وأوضتك مافيش حد هيدخلها بإذن الله أول ما تمشي على رجلك هتطلع تاني مكانك».
ـ «أمشي؟!» قالها بتهكم.
سليم: «اعمل العملية يا بني وريح قلبي».
ـ «بابا، اتكلمنا في الموضوع ده قبل كده وقفلناه».
ـ «انت اللي قفلته لكن أنا لا، أنا محتاجك معايا تبقى عكازي».
ـ «شوفلك عكاز تاني علشان ابنك عاجز!» قال جملته وطلع على الجنينة، وسليم دخل مكتبه بحزن.
تبقى ليل وعبير وغادة.
غادة: «إيه الشنط دي يا ليل؟».
ـ «ده لبس سائر جابهولي».
ـ «اممم وريني كده». وأخدت الأكياس وقالتلها: «هشوف لو حاجة عجبتني وآخدها لأنني مشغولة أوي مش فاضية أعمل شوبينج». وماستنتش رد وطلعت على أوضتها بالأكياس!
ليل واقفة مصدومة، وعبير نادت عليها: «واقفة عندك ليه؟».
ـ «هااا ولا حاجة، هروح أشوف سائر».
ـ «هو صغير؟ هتعمليلوا إيه يعني؟ بقولك إيه، أصحابي جايين شوية كده،روحي ساعدي ليلي في المطبخ».
ـ «حاضر بس عمو سليم قاللي…».
ـ «عمو إيه؟ إنتي نسيتي نفسك ولا إيه؟ يلا على المطبخ!».
دخلت ليل تساعد ليلي. وعبير لنفسها: «إنتي لسه شوفتي حاجة!».
