خلاص يا راوية إهدي وإنسى كل اللي حصل.. متتعبيش نفسك.. اللي فات مات وإحنا ولاد النهاردة.
قالت راوية بحزن من وسط دموعها:
إزاي بس أنسى إنك إتعذبتي السنين اللي فاتت دي كلها من تحت راسي.. إزاي بس أنسى إني فرقت بينك وبينه عشان يكون ليا أنا.. عشان أنانية وفكرت في نفسي وبس.
قالت رحمة بحزن وعيونها تترقرق بالدموع:
الذنب مش ذنبك لوحدك.. هما مشتركين معاكي في اللي حصل.. هم الأبالسة الحقيقيين.. اللي فضلوا وراكي لغاية ما سلمتيني ليهم.. وهو كمان مذنب زيهم.. صدقهم.. صدق إني خنته وخنت وعودنا.. صدق إني كنت بغشه وبخونه مع أخوه.. صدق إني وحشة زي أمي ووقف يتفرج عليا وأنا بتجوز هشام يا راوية.
خرجت راوية من محيط ذراعيها قائلة:
لأ يا رحمة متظلميهوش.. التمثيلية كانت محبوكة أوي.. وأي واحد غيره لو شاف اللي إحنا شفناه كان هيصدق.. وهيتصدم في حبيبته زي ما هو إتصدم.. بس أنا لوحدي اللي عارفة أد إيه هو إتعذب من اللي حصل.. وأد إيه إتعذب في بعدك.
زفرت رحمة قائلة:
مبقاش يفيد الكلام ده دلوقتي يا راوية.. كل واحد فينا خد نصيبه.. حكايتنا إنتهت من زمان ومبقاش ينفع الندم على اللي راح.. ولا ينفع كمان نعيد اللي فات.
قالت راوية بسرعة:
لأ ينفع.. ينفع يا رحمة.. أنا عايزاكي بس تسامحيني يا حبيبتي.. لأني غلط في حقك بس.. وأنا الله هعوضك عن غلطي ده وهرجع كل حاجة لأصلها.
عقدت رحمة حاجبيها وهي تقول بحيرة:
قصدك إيه يا راوية؟
قالت راوية بأمل:
قصدي تتجوزي يحيى يا رحمة.
نهضت رحمة تقول بصدمة:
إنتي بتقولي إيه؟ إنتي أكيد إتجننتي.. أتجوزه إزاي وهو جوزك؟
قالت راوية بحزن:
أنا خلاص يا رحمة.. أواني قرب ويحيى بعد شوية هيرجع حر.. وساعتها تتجوزيه وكل حاجة تتصلح.
تمزق قلب رحمة من كلمات أختها اليائسة لتعود وتجلس إلى جوارها تمسك يدها قائلة:
متقوليش كدة.. دي مجرد أزمة في حياتك… إنتي كويسة.. وهتقاومي مرضك وهتبقي بخير عشان خاطر جوزك وإبنك هاشم.. وأنا هفضل جنبك لغاية ما تعدى الأزمة دي.
اغروقت عينا راوية بالدموع وهي تقول بنبرات متهدجة:
متضحكيش على نفسك.. إنتي عارفة كويس إني بموت وإن كلها أيام وأروح عند اللي خالقني.. أنا مش خايفة من الموت.. بس عايزة أروح لربنا وإنتي مسامحاني.. عايزة أروحله وأنا مطمنة عليكي وعلى يحيى وهاشم.. عايزة أكون متأكدة إنى….
