بصوت خافت والرؤية بتقل قدامها شويه بشويه: — ح… حمز…
فقدت الوعي.
شالها بسرعة حطها في شنطة العربية من ورا وهو بيبص يمين وشمال.
قفل العربية، فجأة لقي الحارس قدامه اترعب.
— أنت مين وبتعمل أيه هنا؟
— أنا ااا… ك… كنت أه… كنت جاي لواحد صاحبي بس شكلي غلطت في العنوان. عن إذنك بقي.
فتح محفظته وأداله فلوس.
بفرحة: — أتفضل يا بيه، أتفضل، نورت.
وهو بيعِد الفلوس: — أبقي تعالي كل يوم.
طلع الشخص دا بسرعة من الفيلا وهو مرعوب، كل شويه يبص وراه، وبعدها مسك تلفونه اتصل برقم.
— ألوو.
— أيوا يا وائل، بقولك ايه، حصلني بسرعة على الفيلا المهجورة.
— ليه؟ حصل حاجة؟
بخوف: — مصيبة، ولازم تتحل بسرعة، لهنروح كلنا في ستين داهية.
بصدمة: — أنت بتخوفني ليه يا عم؟ في أييه!!
بزعيق: — بقولك بسرعة، ومتقولش لحد إنك جايلي.
— خلاص حاضر، مسافة الطريق.
طلع حمزة بسرعة فتح الباب وهو مخضوض: — واااعد، أنتي فين؟
خبط على باب الحمام ملقاش رد منها، فتحه ملقهاش.
جده بدموع: — هي فين يا حمزة؟ وعد مالها؟
مردش عليه، نزل بسرعة وهو بينادي عليها بخوف وبأعلي صوت في الفيلا: — واااعد.
اترعب كل الشغالين من صوتوه وجريوا على الصالون يشوفوا أيه اللي بيحصل.
نزل سالم وراه وهو حاطط إيده على قلبه بتعب.
— أنتم واقفين تتفرجوا على أيه!! شوفوا وعد فين بسرعة.
— يا بيه، أنا لقيت الشنطة دي برا في الجنينة.
مسكها حمزة بقلب مقبوض من الخوف وجري على برا بسرعة: — واااعد يا وااااعد.
لمح حوض الورد متكسر وأثار رجلين على الطين اللي كان في الحوض، نده على الحارس بسرعة.
— مين اللي كسر الحوض دا؟
— معرفش والله يا بيه.
— يعني ايه متعرفش؟ مين غيرك بيحرس البوابة!
— يمكن البيه اللي كان هنا من شويه… اااه، علشان كدا أداني ١٠٠ جنيه، وأنا اللي كنت فاكرها ليا.
— أنت بتقول ايه؟ مين اللي دخل الفيلا؟
بخوف: — دا… دا واحد دخل وبعدها قال إنه اتلخبط في العنوان ومشي على طول.
قرب مسكه من هدومه بغضب: — نعم يا روح أمك؟ هي زريبة أي حد يدخل ويخرج كداا؟
سالم وهو ماسك شنطة وعد: — شنطتها عليها طين، يبقي هي كمان كانت هنا في الجنينة.
بص حمزة حواليه لقي كاميرات مراقبة على الحيطة.
بزعيق: — الكاميرات دي شغالة؟!
— ايوا يا بيه.
— أنت لسه واقف؟ بسرعة قدامي.
— ايه دا؟ عربية مين دي؟
— دا يا بيه صاحبها اللي أداني ١٠٠ جنية وقال إنه اتلخبط في العنوان.
قدم شويه التسجيل، شاف كل اللي حصل بس الكاميرات مكنتش جاية على وشه أوي.
بعصبية وزعيق: — أنتم شغالين هنا بصفتكم أييه؟ ازاي كلب زي دا يدخل يخطفها ويطلع بيها وأنتم موجودين!
— أهدي يا بني، الحاجات دي مبتتحلش كدا.
— وعد لو مظهرتش، مش هيكفيني موتكم كلكم.
— والله يا بيه، أنا مغبتش عن البوابة خالص، دا كان شكله أبن ناس، افتكرته جاي لحضرتك أو للبيه الكبير، مشكتش فيه.
— أنت شفت شكله!
بخوف وهو شايف عنيه بطلع شر: — كان لابس نظاره شمس يا بيه، والله مكنتش أعرف إنه خاطف الهانم.
قبض حمزة على إيده بغضب: — وحياة أمه لأجيبه حتي لو كان دافن نفسه في قبر.
— أحنا لازم نبلغ البوليس يا حمزة.
التفت لجده: — محدش هيرجع وعد ولا هيعاقب الواد دا غيري. مهما كان هو مين، أوعدك إن خلاص عدد أنفاسه بقت بتتعد على الصوابع من دلوقتي.
— حمزة.. أستني يا بني، طب قولي رايح فين.
في فيلا قديمة وعد مربوطة على كرسي لسه فاقدة الوعي
— في ايه يا سيف؟ جايبني هنا ليه دلوقتي؟ ومين دي!
— قرب منها وشوفها مين.
— هي فزورة يا عم؟ ما تخلص وتقول. قرب منها وهو بيشيل شعرها من على وشها: مين دي ورابطها كدا ليه!
— ركز في وشها كويس وأنت هتعرفها.
بعدم إهتمام: — ما تتكلم يا… لأ مستحيل!!
— ها، عرفتها؟
رمي السيجارة ومسكه من هدومه: — أنت أتجننت؟ أزاي تجبها هنا تاني؟ مش كنا خلاص خلصنا من الليلة الشؤم دي ونسينا الموضوع؟
