**الفصل الثامن**
اللهم صل وسلم وبارك على سيدنا محمد.
جاسر شايل ريم بين إيديه، وهي دافنة راسها في رقبته وبتشهق بضعف. جاسر عيونه مركزة عليها بقوة وقلقان أوي عليها. حسن واقف متجمد مش فاهم حاجة.
جاسر بصوت قلق وعيونه على جسم ريم الضعيف اللي بينتفض بضعف بين إيديه:
“ريم! ريم! مالك! إنتي كويسة؟”
جاسر بصوت رجولي قلق:
“ردي عليا. طب فهميني حصل إيه.”
وريم حضنته بقوة ومخالبها الصغيرة بتتغرز بقوة في هدومه.
حسن بتمثيل:
“هي تعبت فجأة، وقلتلها يلا نروح لدكتور. رفضت وجريت مني هنا.”
جاسر وهو بيبص لحسن:
“معقولة؟”
جاسر بص لريم:
“هي ريم بتخاف من الدكاترة أوي كده؟”
حسن بإسراع:
“أيوه. خوف نفسي. علشان أمها كانت عملت حادثة وماتت لما حولوها على المستشفى بعدها بدقايق.”
جاسر بص لريم اللي شعرها مغطي وشها، ودافنة ملامحها الجميلة البريئة في حضنه.
منظرها بيقول إنها بتهرب من حاجة. في حاجة مخوفاها بتهرب منها لحضنه، بس مش عارف إيه هي.
جاسر وهو عيونه مركزة على ريم بوجع.
حسن بإسراع:
“أنا كده قلقت عليها. تعالى يا ابني دخلها معايا أوضتها. إنت زي ابني.”
ريم في الوقت ده سمعت كلام حسن. سمعت شوية منه، بس للأسف كانت داخلة في دور إغماء بسبب التوتر النفسي والخوف اللي اتعرضت له من شوية.
ريم صرخت بضعف، صرخة أنثوية، صرخة استغاثة، وإيدها الصغيرة تشبثت بقوة في جسد جاسر، في كتافه العريضة.
جاسر قلق وقتها أوي وقال باندفاع:
“يلا نوديها أوضتها ونجيبلها الدكتور حالًا.”
حسن بخبث:
“يلا.”
ومسك ريم من إيدها وهي بين إيد جاسر وشايلها بإيديه القويتين.
ريم لما حست بلمسة حسن ليها، جسمها انتفض بسرعة جوه حضن جاسر وأطلقت صرخة أخيرة قبل الدخول في نوبة الإغماء.
جاسر ضغط برقة عليها وضمها أكتر لحضنه علشان تهدأ ويطمنها إنه جنبها.
ولكن محاولات ريم في الكلام والصراخ كانت واخداها في دوامة من العجز. فجأة ريم فقدت الوعي بالكامل.
وحسن ابتسم بخبث.
حسن ماشي وداخل جوه الشقة بتاعته، وجاسر ماشي وراه بخطواته الثابتة والقوية وهو حامل ريم بين إيديه وعيونه مش راضية تنزل من عليها. خوف عليها، عيون جاسر مش راضية ترحمه ولا راضية ترحمها. نظرات المحب في قمة اللذة.
أخيرًا وصلوا لأوضة ريم.
حسن:
“حطها على السرير هنا يا ابني.”
جاسر نزل بقامته العالية وجسمه القوي، ونزل بمستواه علشان ينزل ريم بهدوء ورقة علشان ما يزعجهاش أو يؤلمها.
حطها على السرير ونامت واستكانت في أحضان السرير بعد ما كانت في حضنه هو.
جاسر بيبصلها بعيونه وهي نايمة لا حول لها ولا قوة، نايمة بعيونها الباكية وشفايفها اللي شبعت صراخ، ومخالبها الصغيرة، إيدها الصغيرة اللي فشلت كل محاولاتها في التشبث بجاسر.
حسن وهو بيبص لجاسر:
“شكرًا يا ابني. مش عارف من غيرك كان هيحصل إيه.”
جاسر بص لحسن وقال بصرامة:
“إحنا لازم نجيبلها دكتور.”
حسن بإسراع:
“مفيش داعي يا ابني. دي حاجة بسيطة. هي دايمًا بتحصلها وتفوق بعدها.”
جاسر بتوتر وقوة:
“الكلام ده مينفعش معايا. أنا لازم أطمن عليها.”
حسن بقلق:
“صدقني متخافش. أنا أبوها وعارف. دي بتجيلها دايمًا. طب أقولك ابقى تعالى شوفها كمان ساعة أو نص ساعة وهتلاقيها زي الفل.”
جاسر وهو بيبص لريم بعيون موجوعة:
“لسه هستنى كل ده؟”
حسن بتعب:
“حرام عليك يا ابني، متتعبنيش معاك ومتقلقنيش عليها أكتر.”
جاسر بصوت رجولي:
“طيب قولي، كنت عاوز تاخدها المستشفى ليه؟”
حسن:
“هي كويسة، بس كنا هنروح نعيد كشف عليها على حاجة كده تخصها. بنتي وحبيت أطمن عليها أكتر.”
جاسر بقلق:
“سلامتها ألف سلامة. هي كان عندها إيه؟”
حسن بتوتر:
“مفيش حاجة بسيطة.”
جاسر:
“طب ممكن لما تفوق تبقى تطمني عليها؟”
حسن بتمثيل:
“حاضر يا ابني.”
جاسر بص لريم قبل ما يمشي. نظرة كلها حب وخوف وحنان.
وأول ما خطوات جاسر خطت برا أوضتها، انقبضت عروق رقبة ريم وانقبضت عروق إيدها وتشنج جسمها من الخوف والضيق، رغم إنها فاقدة الوعي، ولكن جسمها لسه فاكر طعم الألم ويقدر يحس بيه عن بعد.
وبالفعل أول ما حسن وصل جاسر عند باب الشقة وقفل الشقة وراه، حسن راح بسرعة عند أوضة ريم ومعاه جردل ميه ساقعة ورشها بعنف على جسمها كله.
فانتفض جسم ريم من هذا المؤثر الخارجي، وارتجف قلبها، وتنبهت عيونها فانفتحوا بشدة، وخرجت أنفاسها بقوة من فمها تعلن الانهيار وتعلن صرخاتها المكبوتة.
ريم قامت بفزع وصدمة وشفايفها نطقت باسمه:
“جاسر!”
حسن برعب:
“جاسر؟ إنتي فاكرة إنك هتهربي مني يا بنت الكلب، وإنك هتعصي كلامي؟ ولا جيران الدنيا كلها يقدروا ينقذوكي مني.”
ريم بتبص برعب حواليها ولعيون حسن، فعلًا زي ما هي كانت متوقعة.
ريم وهي بتبص على جسمها وبتحاوطه بإيديها، وفي عقلها الباطن:
“أنا لسه حاسة بلمساته. أنا حاسة إني كنت جواه. أيوه كنت مستخبية جواه… أيووه ريحته، صوت دقات قلبه، صوت أنفاسه. أنا كنت جواه. أنا كنت هربانة جواه من حسن.”
ريم بصوت باكي وانهيار وهي بتبص لحسن:
“مين اللي خرجني؟”
حسن بعنف:
“إنتي كمان ليكي عين تتكلمي؟ ده أنا هربيكي. ورايحة تستخبي في جاسر بيه. بتلوي دراعي يا بنت الكلاب.”
ريم بانهيار:
“أيوه، أيوه… هو… هو كان هنا… هو راح فين؟”
ريم:
“جاسر… راح فين؟”
حسن بعنف:
“مشي وهيجي كمان ساعة زي ما قلتله. هيجي علشان يطمن عليكي، بس بعد ما أعمل الصح معاكي وأبرمجك على كيفي.”
وخرج الخرزانة من ورا ضهره.
ريم اترعبت ووجعها زاد. فكرة إن جاسر سابها ومشي لوحدها كسرتها. نزلت من على السرير وحاولت تهرب من الأوضة بس فشلت.
حسن مسكها بقوة ونزل عليها ضربات تعيد إحياء جروحها الجسدية القديمة التي كانت أوشكت على الشفاء.
ريم صرخت وصرخت وتأوهت ونطقت باسم جاسر عدد ما نزل على جسدها من ضربات.
ولكن أين هو؟
جاسر قاعد في شقته قلقان وخايف أوي على ريم، وقلبه واجعه عليها. في حاجة غلط.
هو لسه حاسس بمخالبها الصغيرة وهي بتتشبث بجسمه. لسه فاكر انتفاضة جسمها الضعيف وهي بين إيديه.
لسه حاسس بصوت أنفاسها وشهقات بكائها.
كل ده وجاسر بيتحرك بخطوات قوية على الأرض.
فجأة خطوات جاسر القوية وقفت، إذ بجاسر يقع بقوة على الأرضية، في نفس اللحظة اللي انهار فيها جسد ريم العاجز على الأرض في دوامة إغماء ثانية.
حسن بصق على جسد ريم المرمي بإهمال وقال بغضب:
“علشان تبقي تكسري كلامي أوي.”
حسن بغضب:
“وبردو هتتجوزي العريس اللي جبتهولك.”
وسابها مرمية على الأرض وخرج يستريح في الصالة.
في شقة جاسر، جاسر وهو على الأرض بيبص بعيون مبرقة.
معقول؟
هل سمع همسات الأرض التي تشكو له من العذاب الذي تشهده حبيبته؟
جاسر قام من على الأرض وهو في حالة صدمة، كأن نيزك ارتطم به.
جاسر بصوت هامس:
“أنا لازم أروح أطمن على ريم. زمانها فاقت.”
جاسر راح خبط على باب حسن.
حسن مرضيش يفتح.
لو كانت بسمة كانت هتفتح من غير ما تخبط.
حسن مفتحش الباب.
جاسر فضل يضرب الجرس وبعدين يخبط على الباب.
حسن مينفعش يفتح لأن ريم مغمى عليها. لازم تفوق الأول ويحفظها كلمتين تقولهم لجاسر علشان يطلع بريء.
حسن:
“لما تفوق هحفظها كلمتين تقولهم. أهو نخلص من الموال ده.”
جاسر قلق:
“طب مش بيفتحوا ليه؟ معقولة راح بيها المستشفى؟ آه ممكن. ليه لا؟”
جاسر قلقان وقال هيحاول مرة أخيرة.
آخر محاولات جاسر وصلتلها، أو بمعنى أدق صوت أنفاس جاسر المضطربة وصلتلها. وصلت لأذنها، وصلت لقلبها، وصلت لجسدها الضعيف.
أفاقت ريم بعيون عاجزة باكية وبدأت تتنفس بصوت أعلى.
آخر ضربة لجاسر على الباب، تبعها خدش ريم بأظافرها في الأرض.
عدى الوقت وراح حسن لأوضة ريم لقاها قاعدة على الأرض جنب السرير وحاضنة جسمها بإيدها.
حسن بغضب:
“كويس إنك صحيتي. الجدع ده اللي اسمه جاسر كان عاوز يطمن عليكي.”
رفعت ريم عيونها بسرعة لحسن.
حسن بغضب:
“هتقوليله إنك بتكرهي المستشفيات علشان أمك ماتت فيها، علشان كده خفتي لما قلتلك تعالي نروحها.”
“وإياكي تجيبي سيرة إن في ناس جايين يتقدمولك. أنا هخليهم يجوا وقت تاني على ما تحلوي شوية بدل ما دبلتي كده بقيتي دبلانة. مش عاوزين نطفشه.”
حسن بعنف:
“فاهمة؟”
ريم بهدوء هزت راسها بالموافقة.
حسن:
“اتنيلي اطلعي نامي على السرير على ما أناديله ييجي. كان عاوز يطمن عليكي.”
جاسر قاعد في شقته محتار.
معقولة راحوا المستشفى؟
طب معنى كده حالتها خطرة؟
وقاعد قلقان ومحتار وهيتجنن.
فجأة باب شقته ضرب الجرس.
قام بسرعة جنونية، على أمل تكون دي ريم، ومين غيرها بتجيله؟
جاسر فتح الباب.
جاسر بصدمة:
“حسن؟”
حسن بتمثيل:
“الحمد لله بقت كويسة. هي فاقت، قلت أناديلك تتطمن زي ما قلت.”
جاسر فرح أوي من إن ريم فاقت واطمن إنها كويسة.
وراح بسرعة ناحية شقة حسن وحسن وراه.
جاسر خطواته سريعة ونفسه يطير أو يبقى أسرع. ريم أول مرة توحشه كده ويحس إنه هيتجنن في بعدها أوي كده.
ودقات قلبه مش بترحمه.
جاسر دخل أوضة ريم بسعادة وفرحة.
فجأة اتبدلت الفرحة والسعادة بدهشة ثم قلق ثم حزن ثم خوف ثم حسرة.
لقى ريم نايمة بضعف ووجه شاحب وجسم ميت وشعر جاف كأنه وردة لم ترتوِ بالماء بعد وعيون باهتة.
جاسر قرب من سرير ريم وبيبصلها بقوة، عيونه بتفحص كل تفصيلة فيها وبيزيد الألم على قلبه.
جاسر بصوت حنون:
“حمد لله على سلامتك يا ريم.”
ريم بتحاول تبقى هادية وبتحاول على قد ما تقدر ما تنفجرش في العياط.
ريم بصوت مرتجف:
“الله يسلمك.”
جاسر قاعد على سرير ريم وبدأ يملس بحنان على شعرها وبيبص بألم على عيونها الباهتة.
ريم جسمها انتفض وبعدت عنه بسرعة.
جاسر بهدوء:
“مالك يا ريم؟”
ريم بصت لعيون جاسر، حست بالأمان والحنان، ولما افتكرت إنها كانت معاه بس هو سلمها لحسن بإيده، بعدت وشها عن وش جاسر بألم ودموع.
