تكفل أهل الخير بمساعدتها، بينما كانت هي في مشاجرة جديدة مع بدران حاولت أن تنظف أي مكان ليجلس عليه علام التقزز والإشمئزاز يعتريان وجهها. كاد أن يتحدث لكن منعه رئيس اللجنة العرفية للحارة وهو يقول:
* خلاص يا بدران كفاية لحد كدا زعيق من الصبح ومحدش عارَف يكلمك.
* يا عم شوقي دي شقتي، فاهم يعني إيه شقتي! عمي باعها إزاي وهو بايعها أصلا ليا؟!
وتابع بغيظ من بين أسنانه وقال:
* بس لو أطوله وأعرف اختفى في انهي داهية!
رد العم شوقي وقال:
* طالما معها عقد بيثبت ملكيتها للشقة واتنين شهود عليه يبقى هي كمان صاحبة الشقة.
تدخل المحامي وقال:
* يا جماعة الخير، إنتوا في نظر القانون إنتوا الاتنين معاكم حق، والنيابة هتقفل المحضر بصيغة يبقى الوضع كما هو عليه وعلى المتضرر اللجوء للقضاء، يعني محدش منكم هيستفاد بحاجة.
جلس العم شوقي وقال بجدية:
* الشقة من حقكم إنتوا الاتنين ومش من حق حد لوحده دا أولاً، ثانياً كل واحد منكم يتعهد قدامي بإنه مش هيتعرض للتاني بشيء وتمضوا على كدا واللي هيتعرض للتاني هيدفع شرط جزائي قدره مئة ألف جنيه، ثالثاً ودا الأهم كل واحد فيكم هَيَقسِم الشقة وميدخلش في الجزء بتاع التاني.
نظر العم شوقي لبدران وقال بنبرة ذات معنى:
* فاهم قصدي طبعاً يا بدران!
رد بدران بعصبية وقال:
* إيه اللي أنت بتقوله دا! أنا مش عاوز حد معايا في الشقة ومش موافق.
رد العم شوقي وقال بعقلانية:
* يبقى دا تنازل منك بشكل رسمي عن الشقة، ولو مش حابب حد يدخل معاك في الشقة ادفع المئة وخمسين ألف اللي الأستاذة دفعتهم مكان عمك.
* بقى أنا، راضي ضميرك يا عم شوقي دي خلقة معاها مئة وخمسين ألف!
* يبقى تقبل بالوضع زي ما أنا قابلة وراضية.
رد بنبرة مغتاظة وقال:
* هو كان حد وجه لك كلام، بتتكلمي ليه من أصله!
* أنا أتكلم زي ما أنا عاوزة، محدش يقدر يمنعني.
* ليه، بنت مين أنتِ إن شاء الله!!
* بنت رضوان العفيفي.
وقف العم شوقي وقال بعصبية:
* دا أنا لو بحكم بين عيال في حضانة مش هيعملوا اللي بتعملوه دا!!
ثم تابع بحدة قائلاً:
* اللي هايفتح بؤقه بكلمة تاني لحد ما خلص كلامي هيدفع عشرة آلاف جنيه أدباً لي.
ظل يتحدث حتى انتهى من حديثه ووضع النقاط على الحروف. علم كلاهما حقوقه، وتركهما يقفان أمام بعضهما البعض يتبادلان نظرات التحدي والغيظ الشديد. أشارت بيدها وهي تدور داخل الشقة بتفقد:
* الأوضة دي والجزء دا ودا ودا تبعي أنا، البلكونة هتبقى بالنص، الحمام والمطبخ كذلك، الصالة الجزء دا بس اللي يخصك.
رد ساخرا وهو يعقد ساعديه أمام صدره وقال:
* طب بالنسبة للنفس اللي بدخله وأخرجه، واحد ليا وواحد ليكي ولا هيبقى ليا وبس؟ فهميني، هتتفسي معايا ولا أسحبه لوحدي!
طالعته في صمت تام، تركته يتمتم بوعيد وهو يكور قبضة يده وكز على أسنانه بغيظ متمتماً بسباب لاذع، اتجه حيث الأريكة المقابلة للتلفاز. وقبل أن يهوي بجسده عليها هرع نحو غرفة تولين التي صرخت بصوت عالٍ. طرق الباب ثم ولج، وجدها مفترشة الأرض بجسدها وفوقها أبيها يتألم. جثا على ركبته وقال بغضب:
* مش قادرة تشيلي قولي بس، متبهدليش الراجل كدا معاكي.
حمله برفق كالطفل الصغير بين ذراعيه، قام بوضعه على الفراش بهدوء وحذر، دثره جيداً ثم نظر له وقال بتساؤل:
* أنت كويس!
ربت والد تولين على ظهر يده وشبح ابتسامة يزين ثغره. تنهد وهو يقف عن حافة الفراش، نظر لها بدران وجدها تهندم ملابسها وهي تكتم ألمها وقال:
* ابقي خلي بالك بعد كدا.
—
* عاوزك تفق لي كدا وتركز معايا الفترة الجاية، عمك وخلاص خلصنا منه وبنته كذلك الأمر، نصحصح بقى كدا عشان الشغل اللي جاي هيبقى على تقيل، تقيل أوي.
أردف معتز الأخ الأكبر لوالدها كان يحدث ابنه الوحيد الذي كان يسير على خطى أبيه.
جلس على مقعد المدير التنفيذي للشركة، كانت عيناه تشعان بريق السعادة والانتصار، نظر لوالدها وقال بذهول:
* أنا مش مصدق إننا قدرنا ناخدها كلها في ست شهور بس.
رد والده بابتسامة واسعة:
* ولسه، خلال الست شهور الجايين هنبقى حيتان السوق هنغزو العالم كله بكل حاجة هنعملها.
نظر له بجدية مصطنعة وقال:
* هتعزم تولين على فرحك يا صفوت!
رد صفوت وقال بنبرة ساخرة:
* أنت كدا عاوز تجيب لها جلطة زي أبوها يابابا.
ثم تابع بجدية وقال:
* مش هعزمها طبعا، دي فاهمة إن كل حاجة اختارتها كانت ليها!! بالعكس، لازم تبان قصادها إنك مغلوب على أمرك وإنك مجبر على الجوازة، لازم كل شيء يمشي زي ما مخططين له. تولين لو عرفت إننا خدناها سلّمة عشان نوصل للي عاوزينه هتحاول تبوظ كل شيء.
ركز يا صفوت مش عاوزين نبوظ الدنيا بعد ما وصلنلها بصعوبة.
استدار صفوت بجسده للنافذة وقال بخفوت:
* ياما نفسي وهي مذلولة!
ثم تابع بنبرة مغتاظة وقال:
* كانت بتتباهى بأبوها وذكائه اللي ملوش حدود، أملاك أبوها وحياتها اللي عايشاها ولا بنت الملك. وكل كوم وتريقتها عليا وإني بالنسبة لأبوها صفر على الشمال دا كوم تاني.
هتف بصوت عالٍ نسبياً وقال بانتصار:
* تعالي يا تولين شوفي أنا بقيت فين ورضوان العفيفي بقى فين!
وختم بوعيد قائلاً:
* لا ولسه، لسه لما أشوف قهرتك الكبيرة وأنت شايفاني بتجوز من غيرك، لسه، لسه حسابك معايا مجاش، أنت حسابك غير.. غير أي حد وأوعدك هيعجبك أوي.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
