
زين والدموع في عينه: لأني بحبها وعمري ما اتمنيت غيرها، ولو كان ثمن جوازي منها إني آخدها بقايا عذراء أنا موافق، بس تكون ملكي. لكن اللي عمل فيها كده أنا مش هرحمه. على ما تجهز أنا هروح لحمزة أفهم منه ايه اللي حصل يمكن يكون شاف حد ونقدر نعرف مين اللي عمل كده.
وفيق: بس هي بتتهم اخوك. ليه ميكونش هو اللي عملها؟ ماهو فاقد زي اللي خلفته وبلتني بيه.
زين: لا يا عمي، حمزة ميعملهاش. مش علشان هو يعرف ربنا بس، لا علشان عارف يمني بالنسبالي ايه، وعارف أنا ممكن أعمل فيه ايه لو أذاها. أرجوك يا عمي اوعى تأذيها لحد ما أرجع.
ويعدل هدومه وينزل وقلبه بيتقطع عليها وعلى كسرتها.
ويروح للدار يلاقي حمزة سهران مع ولاد عمه، يدخل عليهم.
زين: حمزة، تعالي عايزك في كلمتين.
حمزة: مالك يا أبية؟ عينك مليانه دموع وحمرا، ليه حد زعلك؟
زين: مفيش، يمني تعبانه شوية. قولي، انت لما وصلتها كان في حد مستنيها أو عربية واقفه قدام الدار؟
حمزة: لا، هي كانت بتبصلي بنظرات غريبة وكنت حاسس إنها عايزه تقول حاجة بس بتكابر، وبالذات إنها كانت ماشيه تترنح. فضلت وراها لحد ما وصلت، وأول ما فتحت ودخلت لفيت ورجعت واطمنت لما لاقيت الدار نورت، عرفت إنها بخير ورجعت ليكم الفرح وحكيتلك اللي حصل. انت بتسأل كل ده ليه؟ هو حصلها حاجة؟
زين: لا، يعني مشفتش عربية أو أي حد قريب من البيت؟
حمزة: لا، مكنش في حد غير غفير واقف على دوار العمدة.
زين: ماشي، روح كمل سهرتك، وأنا نازل مصر هاخدها نكشف عليها لأنها تعبانه جدًا. خلي بالك من نفسك وحصلنا الصبح.
حمزة: انت كده هتسوق طول الليل؟ ما تخليك للصبح.
زين: لا متقلقش، هوصل على الظهر، أحسن ما تدخل مستشفى هنا هتعذب عمتك معاها لو اتحجزت. خليها جمب أهلها بمصر.
ويخرج زين ويروح لدار عمه يلاقيه قاعد حاطط إيده على راسه والحزن كاسي ملامحه.
زين: عمتي ويمني فين؟ خلصوا ولا لسه؟
وفيق: فوق، مش طايق أشوفها. ولولا غلاوتك عندي كنت خلصت عليها. يلا خدها من الدار وامشي، مش عايز يطلع عليها الصبح وهي هنا بالبلد.
زين يقعد جمب عمه ويمسك إيده ويقوله: عايز عهد الله منك إن اللي حصل وشفته هيبقي سر بينا ليوم الدين. ده لو حصل نصيب هتبقي مراتي، ومش هقبل حد يمس كرامتها بكلمة.



