بعد ما مشيوا.. كانت أمل واقفة مصدومة بعد اللي سمعته، وشها كان أحمر ومش عارفة تبص لفارس.
فارس كان عارف أنها سمعت جملة البنت.. ابتسم وقال لها: “اقعدي.. نشرب قهوة قبل ما نرجع الشركة”.
كان فاهم إن أمل بقت خايفة منه بعد الجملة اللي سمعتها من البنت وممكن تشك في أخلاقه.
اتكلم فارس بدون مقدمات: “أنا مبحضرش اجتماعات خاصة على فكرة”.
أمل وشها كان أحمر قوي ومكانتش عارفة ترد.
فارس ابتسم وقال: “أنا بفكر أرفض المشروع بتاعهم ده.. إيه رأيك؟”
ردت أمل بسرعة: “آه طبعا لازم ترفضه”.
فارس بص لها قوي وقال: “لازم أرفضه ليه؟”
اتكلمت أمل بعصبية وهي مش واخدة بالها، كانت حاسسة بغيرة مولعة في قلبها: “لأن هما مش هدفهم مشروع.. البنت دي عايزاك إنت”.
فارس ضحك وقال لها: “برافو عليكي.. مكنتش متوقع إنك بالذكاء ده كله وهتقدري تفهمي هما هدفهم إيه”.
ردت أمل ببساطة: “الموضوع مش محتاج ذكاء على فكرة.. البنت عينيها كانت هتطلع عليك.. ومعندهاش احترام حتى لباباها اللي قاعد جنبها”.
فارس ضحك من قلبه وبص لها قوي.. وقال: “هو إنتي ضايقتي منها؟”
أمل حست أنها كشفت غيرتها عليه قوي وقالت بارتباك: “لا عادي.. بس المفروض احنا جايين نتكلم في شغل”.
شرب من القهوة بتاعته وقال بهدوء: “عندك حق”.
أمل قالت بتوتر: “هو احنا مش هنرجع الشركة بقى؟”
رد بهدوء: “هخلص القهوة ونتحرك على طول”.
أمل كانت متوترة من نظراته، كانت حاسسة إن عينيه مش بتفارقها.
فجأة تليفونها رن.. كان رقم واحدة جارتهم.
ردت عليها بقلق، والست قالت لها: “الحقيني يا أمل يا بنتي.. كنت داخلة أطمن على أمك ولقيتها تعبانة قوي.. تعالي بسرعة الحقينا”.
أمل قامت بسرعة وهي خايفة على مامتها.
فارس سألها في إيه وهي ردت عليه بسرعة وهي بتبكي: “ماما تعبانة قوي”.
فارس قام معاها بسرعة وخدها في عربيته وراحوا على الحارة بتاعتها.
عباس بلطجي المنطقة كان واقف هو وكام واحد من الصبيان اللي مشغلهم، شاف عربية غالية دخلت المنطقة، رمى السيجارة اللي في إيديه وقال: “استنى يا واد أنت وهو لما نشوف مين النضيف اللي جاي الحارة في عربية غالية دي”.
وفجأة شاف أمل وهي نازلة من العربية بتجري على بيتها وهي بتبكي، وفي شاب غني وشكله باشا.. نزل هو كمان من العربية ودخل وراها البيت.
عباس قال بصوت غليظ: “هو في إيه يا رجالة.. هي الحارة دي مالهاش كبير ولا إيه؟! مين اللي جاي مع البنت دي؟”.
واحد من صبيانه قال بتريقة: “بنت إيه بس يا معلم.. شكل البنت بتاعتك اتعلقت بالباشا صاحب العربية وخدها منك”.
عباس اتعصب وقال: “مين ده اللي ياخدها مني يا واد.. هتشوفوا أنا هعمل فيه إيه دلوقتي”.
واتجه عباس ناحية بيت أمل.
رواية الكاتبة ملك إبراهيم
جوَّه البيت.. باب الشقة كان مفتوح ووالدة أمل كانت غايبة عن الوعي.. والست جارتها كانت قاعدة جنبها.
أمل مسكت إيد والدتها وهي بتحاول تفوقها وكانت بتبكي وتنادي عليها، وكانت حاسسة بروحها بتتسحب منها.
فارس لما لقى الحالة كده.. اتصل بسرعة بالإسعاف.
دخل عباس وهو بيتكلم بصوت غليظ: “هي الحارة دي مفيهاش رجالة ولا إيه؟ جرى إيه يا ست أمل.. جاية جري كده وجايبة راجل وراكي ولا همك حد؟!”.
فارس بص له بغضب ووقف قصاده وسد عليه طريق دخول الشقة وقال له: “وأنت مين بقى؟”.
رد عباس بفخر: “أنا عباس.. كبير المنطقة دي كلها وكل اللي فيها عايشين تحت حمايتي”.
فارس افتكر كلام أخته دنيا عن عباس البلطجي اللي كان عايز يتجوز أمل وبيضايقها في الرايحة والجاية.. بص له بغموض وقال له: “أنت بقى عباس”.
رد عباس بثقة: “وأنت بقى تطلع مين يا باشا؟”…
بقلمي ملك إبراهيم… يتبع في الجزء الرابع
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
