نهى وقفت وقالت بدلال: “إنت لازم تعرف البنت دي أنا أبقى مين يا فارس.. مينفعش أطلب منها قهوة وهي تتجاهلني بالشكل ده..”
فارس مردش عليها وقام وقف وخرج من المكتب، ونهى خرجت وراه بسرعة وهي بتجري وراه بالكعب العالي.
أمل اتصدمت لما شافت فارس خارج من مكتبه ونهى خارجه وراه. قلبها دق بخوف لما شافت فارس بيقرب منها ووقف قدام مكتبها.
ونهى وقفت وراه وهي بتبص لأمل بشماتة وكأنها عارفة اللي فارس هيعمله دلوقتي.
أمل وقفت قدام فارس وكان قلبها بيدق بخوف.. بس حاولت ترسم القوة على وشها وهي واخدة قرار من جواها أنها مش هتسمح لأي حد يذلها.
فارس كان بيبص في عيون أمل.. شايف لمعة الخوف اللي في عينيها.. وحاسس برجفتها اللي بتعاول تداريها، اتكلم بهدوء وهو بيبص في عينيها: “عندنا اجتماع برة الشركة.. جهزي نفسك عشان هتيجي معايا الاجتماع ده”.
أمل اتصدمت ومش مصدقة وبصت له: “أنا؟”
رد وهو بيمشي ناحية الأسانسير: “تعالي ورايا”.
أمل بصت للسكرتيرة بدهشة واتحركت وراه بسرعة وهي مش فاهمة حاجة.
نهى قربت من السكرتيرة وسألتها وهي هتتجنن: “اجتماع إيه اللي عنده برة الشركة؟”
ردت السكرتيرة وهي بتبص على جدولها: “مفيش اجتماع برة الشركة.. أنا عندي جدول بكل الاجتماعات”.
نهى بصت قدامها بصدمة وقالت: “يعني هو خدها وراحوا فين؟”
ردت السكرتيرة بخبث: “أنا قلت لحضرتك.. في حاجة بين باشمهندس فارس.. وبين البنت دي”.
نهى بصت للسكرتيرة وعينيها كانت بتطلع نار وقالت لها: “أنا عايزة أعرف كل حاجة عن البنت دي.. وعنوانها”.
السكرتيرة هزت راسها بثقة: “اعتبريه حصل”.
ونهى خرجت من الشركة وهي عندها إصرار إنها مش هتسمح لحد ياخد منها فارس، كانت حاسسة من جواها إن مستحيل واحدة زي دي تاخده منها.
حكاية فارس وأمل بقلمي ملك إبراهيم
في عربية فارس، كانت أمل قاعدة متوترة ومش عارفة المفروض هتعمل إيه في الاجتماع اللي فارس قال عليه ومش عارفة هيروحوا فين، كانت ضامة شنطتها وبتفرك في إيديها.
فارس لاحظ أنها كانت متوترة، اتكلم بهدوء وصوته كان حنين: “اهدي.. ده اجتماع عادي”.
أمل قالت له وصوتها كان بيترعش: “أنا عمري ما حضرت اجتماع!”.
فارس بص لها قوي، كانت نظرة طويلة كلها إعجاب وحنية، لدرجة أنها اتكسفت من نظراته وخدودها احمرت وبصت في الأرض. فارس ابتسم غصب عنه وبص قدامه وساق.
وصلوا مطعم فخم جداً على النيل، كله إزاز وناس لابسة شيك، نزلوا وقربوا من ترابيزة كبيرة، كانت قاعدة عليها بنت شقرا جميلة جداً ولابسة فستان ملفت، وكان قاعد جنبها راجل عجوز شكله أجنبي.
فارس قرب منهم وسلم عليهم بثقة وعرفهم على أمل وقال لهم: “دي الآنسة أمل، المساعدة بتاعتي”.
أمل قعدت جنب فارس وهي متوترة وقلقانة، مش عارفة تقول إيه.. حاسسة أنها غريبة على الأجواء دي.
فارس طلب لنفسه قهوة.. وطلب لأمل عصير عشان تهدى.
وبدأ الاجتماع وفارس كان بيتكلم مع الرجل العجوز في تفاصيل كتير تخص المشروع اللي بيتفقوا عليه.
أمل كانت بتراقبهم وهما بيتكلموا، فهمت إن الرجل العجوز يبقى أبو البنت الشقرا اللي قاعدة جنبه.. وعنده شركة برة مصر وعايز فارس يشاركه في مشروع جديد بين الشركتين.
البنت الشقرا كانت عينيها على فارس طول ما هو بيتكلم، بتبص له بإعجاب واضح ومش شايلة عينيها من عليه، وأمل خدت بالها من أول ما قعدوا، وقلبها اتقبض وكانت حاسسة من جواها بغيرة بتاكل فيها وهي مش فاهمة بتغير ليه، كانت بتلوم نفسها وبتقول في سرها: هو إيه حكايته ده؟.. شكله بيفرح بلمة الستات حواليه.. واحدة في الشركة المفروض خطيبته.. ودي هيعمل معاها مشروع وعيونها هتطلع عليه.. شكل الستات حواليك كتير يا فارس الحريري.. وأنا اللي عبيطة وكنت هصدق إنك ممكن تحبني!
فارس لاحظ شرودها، عينيها كانت تايهة وبتبص على البنت الشقرا اللي مش شايلة عينها من عليه، ابتسم ومد إيده وحركها قدام عينيها بخفة عشان يفوقها: “روحتي فين؟”
أمل فاقت من شرودها وقالت: “أنا موجودة معاكم”.
فارس ابتسم وسألها بهدوء: “طب تحبي تاكلي إيه؟”
أمل اتكسفت جداً ووشها احمر، لإن فارس كان بيتعامل كأنها بنته، مهتم هتشرب إيه وهتاكل إيه، بيطلب لها العصير وبيسألها تاكل إيه، وفي نفس الوقت كان مركز في الاجتماع وبيتكلم بالأرقام والمشاريع بمنتهى الثقة.
ردت أمل بخجل: “أنا مش جعانة شكراً”.
البنت الشقرا بصت لأمل بحقد وسألت فارس بغيظ: “واضح إن العلاقة بينكم أكتر من مساعدة شخصية؟”
فارس بص لها بثقة وقال: “خلينا نتكلم في الشغل أحسن”.
البنت اتكسفت من رده.
وأمل اتوترت أكثر وكانت قاعدة جنبه معملتش أي حاجة وكانت حاسسة إن وجودها ملوش أي لازمة في القاعدة كلها، فارس هو اللي بيتكلم وهي كانت قاعدة زي الكرسي، لا فاهمة حاجة ولا بتعمل حاجة، وبتسأل نفسها: هو جابني هنا ليه أصلاً؟
الاجتماع خلص.. البنت قامت تسلم على فارس وقربت منه قوي وهي بتهمس له بإغراء: “أتمنى إن الاجتماع الجاي يكون خاص.. أنا وأنت بس”.
أمل فتحت عينيها بصصدمة وكحت جامد أول ما سمعت كلام البنت مع فارس، كانت حاسسة إن الكلمة واقفة في زورها.
فارس ابتسم لها بمجاملة باردة وسلم على والدها.
